Alli yuyaicunata charingapaj
Bibliapica mana alli yuyaicunamanta, mana alli ruraicunamanta jarcarishpa allicunata rurachunmi animan.
AMA RATO COLERAICHU
BIBLIAMANTA CONSEJO: “Mana utca pꞌiñarij runaca, pitapish jahualla mishajta yalli allimari” (Proverbios 16:32).
¿IMATATAJ NISHA NIN? Ama animalta pꞌiñaringapaj jarcarinatami yachana canchij. Maipica ima mana alli cajpimi pꞌiñarishun. Pero mana jarcarishpaca shujtajcunatami llaquichishun. Maijancuna yallitaj pꞌiñarishca cashcamanta imata nishpa, imata rurashpaca qꞌuipamanca llaquillami sintirincuna.
¿IMATATAJ RURAI TUCUNGUI? Yallitaj pꞌiñarishca cashpaca mana allicunata ruranamanta mana jarcari tucunguichu. Huaquincunaca pꞌiñarishpa imatapish rurashpaca cꞌari cꞌari cashcatami ricuchinchij nincunami. Pero, ¿chaica ciertochu can? Mana. Ashtahuanpish jahualla pꞌiñarishpaca mana sinchi runa cashcatami ricuchishun. Bibliapica: “Jahualla pꞌiñarinata yuyaipi mana jarcarij runaca, muyundij pirca urmashca pueblo shinami” ninmi (Proverbios 25:28). Ima problema tiyajpica mana utca pꞌiñaringapajmi puntaca ima tucushcata alli yachanaraj, shujtajcunata alli uyanaraj canchij. Proverbios 19:11-pica: “Alli yuyaiyuj runaca, pꞌiñarishpapish jarcarinmi” ninmi.
AGRADECIDO CAI
BIBLIAMANTA CONSEJO: “Pagui nijcuna caichij” (Colosenses 3:15).
¿IMATATAJ NISHA NIN? Maijancunaca agradecidos cashpami cushilla causai tucunchij nincunami. Familiata pirdijcuna o valishca cosascunata pirdijcunapish chashnallatajmi yuyancuna. Paicunaca ima pirdishcallapi yuyashpa yallitaj llaquirinapaj randica, imata charishcamanta agradecidos cashpami ñaupajman cati tucunchij nincunami.
¿IMATATAJ RURAI TUCUNGUI? Tucui punllacuna imallacunamanta agradici tucushcata yuyai. Por ejemplo, shuj punllahuan causaita charishcamanta, alaja pacarijta ricushpa, shuj cꞌuyashca familiahuan cashcamanta agradecido cai. Chashnami cushilla sintiringui.
Cambaj familiata, amigocunata cꞌuyashcata ricuchingapajpish paicunata agradici. Chaipajca shuj cartata escribishpa, shuj mensajeta cachashpa imamanta agradecido cashcata ni. Chashnami paicunahuan alli apanacungui. Shinallataj shujtajcunamanta allicunata rurashpami cushilla sintiringui (Hechos 20:35).
BIBLIAMANTA SHUJTAJ CONSEJOCUNA
Bibliamanta grabashca audioca 40 shimicunapimi tiyan. Caitaca jw.org paginamantami descargai tucungui.
AMA LITUNACUICHU
“Pꞌiñanacuita callarichijca, jatun yacuta cacharij shinami. Pꞌiñanacui manaraj callarijpi anchuringui” (PROVERBIOS 17:14).
SHAMUJ PUNLLACUNAMANTA AMA YALLITAJ SUSTARICHU
“Caya punllaca imashi tucushun nishpa, ama huañuricuichijchu. Punllantami ima llaqui cashpapish tiyan. Chaimanta cayapajca cayallatajmi yuyarina canguichij” (MATEO 6:34).
IMATA MANARAJ RURASHPA ALLI YUYAI
“Chashna rurajpica, cai alli shimicunaca canta huaquichingami. Cai alli yuyaicunaca imamantapish quishpichingami” (PROVERBIOS 2:11).
Caitapish yachai
RIJCHARI
¿Estresta charishpaca imatataj rurai tucungui?
Estrés ungüita mishangapaj imata rurai tucushcata yachai.
