Tucuicunahuan alli apanacungapaj
Achca gentecunapajca shujtajcunahuan alli apanacunaca mana facilchu can. Chaimantami cai yachaipica shujtajcunahuan alli apanacungapaj imata rurana cashcata Bibliahuan yachashun.
SHUJTAJCUNAPI YUYAI
BIBLIAMANTA CONSEJO: “Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij” (Filipenses 2:4).
¿IMATATAJ NISHA NIN? Shujtajcunahuan alli apanacungapajca imata mana shuyashpami shungumanta cujcuna cana canchij. Ñucanchijllapi yuyashpaca shujtajcunamantami caruyashun. Por ejemplo, maijan cusa huarmi paicunallapi yuyashpaca shujtajcunahuanmi juchapi urmai tucunga. Cutin maijancunaca, ñucaca caita o chaitami charini, ñucami alli yachani nishpa alabarishpaca amigo illajmi saquiringa. El camino del carácter libropica: “Chashna yuyanaca ima favorta mana ruranchu” ninmi.
¿IMATATAJ RURAI TUCUNGUI?
-
Shujtajcunata ayudai. Alli amigopimi confiai tucunchij. Shuj alli amigoca siempremi imapi ayudangapaj listo can. Huaquin investigacioncunapica, ‘shujtajcunata ayudanata yachajcunaca mana tanto depresión ungüita charincunachu, ashtahuanpish cushillami causancuna’ nincunami.
-
Shujtajcunata llaquij cai. Shujtajcunata llaquij cashpaca paicuna ima shina sintirishcata intindishpami alli tratana cangui. Shinallataj paicunamanta burlarishpa, ima mana allita nishpaca mana llaquichinachu cangui.
Llaquij cashpaca shujtajcunatami respetashun. Chashnami shuj persona shujtaj llajtamanta cajpi, shujtaj culturamanta cajpi, shujtaj razamanta cajpipish mana yanganchishpa paicunahuan alli apanacushun.
-
Shujtajcunahuan tiempota pasai. Shujtajcunata alli rijsingapajca paicunahuanmi tiempota pasana cangui. Shuj alli amigota charisha nishpaca importante cosascunamantami parlana cangui. Shinallataj cambaj amigo ima problemata charishcata parlajpica allimi uyana cangui. Shuj investigacionpica, “importante yuyaicunamanta parlanata yachaj gentecunaca ashtahuan cushillami cancuna” ninmi.
ALLI AMIGOCUNATA MASHCAI
BIBLIAMANTA CONSEJO: “Mana allicunahuan tandanacujpica, cancuna alli causacushcataca pandachingami” (1 Corintios 15:33, QC, 1989).
¿IMATATAJ NISHA NIN? Alli amigocunaca allita rurachunmi animanga, cutin mana alli amigocunaca mana allicunata rurachunmi pandachinga. Yachaj runacunapish, ‘fumaj amigocunata charishpa o divorciarij amigocunata charishpaca, ñucanchijpish chaillatajmi rurai callarishun’ nincunami.
¿IMATATAJ RURAI TUCUNGUI? Alli yuyayuj, shujtajcunata alli trataj, alli shungu, cꞌuyaj amigocunata mashcai. Chashna amigocunata charishpami canpish paicuna laya cai tucungui.
BIBLIAMANTA SHUJTAJ CONSEJOCUNA
Cusa huarmipaj, jovencunapaj, huahuacunapajca Bibliamanta sumaj videocunami tiyan. Chaitaca jw.org paginapimi ricui tucungui.
LLAQUICHIJ SHIMICUNATA AMA NICHU
“Maijancunaca imata rimashpapish, espadahuan chugrichishca shinami saquincuna” (PROVERBIOS 12:18).
ALLI SHUNGU CAI
“Shujtajcunapaj allita rurajcunaca charijyancunami” (PROVERBIOS 11:25).
SHUJTAJCUNATA ALLI TRATAI
“Shujtajcuna cancunapaj allita rurachun nishpaca, cancunapish paicunapaj allita ruraichij” (MATEO 7:12).
