Shujtajcuna ima shina sintirishcata intindi
¿Huaquincunaca imamantataj mana allita juzgancuna?
Shujtajcuna ñucanchijmanta diferente cashcallata ricushpaca paicuna pandaricushcata, ima mana allita rurashcatami yuyashun. Chaimantami paicunataca yangata shina ricui callarishun. Shujtajcunata mana allita ricui callarishpaca paicuna ima shina sintirishcata, imata yuyashcataca mana jahualla intindi tucushunchu.
Bibliamanta consejo
“Cushicujcunahuanca cushicuichij, huacajcunahuanca huacaichij” (ROMANOS 12:15).
¿Imatataj nisha nin? Shujtajcuna ima shina sintirishcatami alli intindina canchij. Chashnami ñucanchijpish paicuna shina sintirishun.
¿Shujtajcunamanta sustarinaca ima shinataj ayudan?
Shujtajcuna ima shina sintirishcata intindishpaca ñucanchijpish paicuna shinallataj sintishcata, paicuna shinallataj imatapish ruraj cashcatami cuentata cushun. Shinallataj tucuicuna shuj familia shina cashcatami intindishun. Shujtajcuna ñucanchij shinallataj cashcata intindingapaj esforzarishpaca paicunataca mana malta juzgashunchu.
Shujtajcunamanta sustarij cashpaca respetohuanmi pitapish tratashun. Senegal llajtamanta Anne-Marie huarmica yangata shina ricushca grupocunamanta gentecunataca mana allitami ricuj carca. Shinapish paicunamantami sustari callarirca. Paica: “Chai gentecuna mashnata sufrijta ricushpaca, ‘ñucapish paicuna layallataj llaquicunahuan chꞌimbapurana cashpaca ima shinashi sintiriman’ nishpami yuyaj carcani. Chashnami mana paicunata yalli importante cashcata intindircani. Shujtajcunata yalli cashcata yuyangapajpish imata mana rurashcanichu nijmi carcani” ninmi. Shujtajcunapaj problemacunata intindingapaj esforzarishpaca mana yangamanta juzgashunchu.
¿Imatataj rurai tucungui?
Shuj grupo gentecunamanta mana allita yuyashpaca, paicunahuan imapi igual cashcata ricungapaj esforzari. Por ejemplo, paicuna caicunata rurashpa ima shina sintirijta yuyai:
Shujtajcuna ima shina sintirishcata intindishpaca tucuicuna shuj familia shina cashcatami cuentata cushun.
Familiahuan micushpa.
Punlla enterota trabajashca huasha.
Amigocunahuan pasashpa.
Paicuna munashca musicata uyashpa.
Canpish chai grupomanta cashcata yuyai. Tapuri:
¿Shujtajcuna ñucata yangata shina ricujpica imatashi ruraiman?
¿Pi ñucata manaraj rijsishpa mana allita juzgajpica ima shinashi sintiriman?
¿Ñuca chai grupopi cashpaca ima shina tratachuntaj munaiman?
Caitapish yachai
HUILLAJ
¿Llaquicunahuan cajpica Diosca llaquirinchu?
Bibliapica Diosca ñucanchij ima shina sintirijta, imata yuyajta, ricucunmi ninmi.
RIJCHARI
Alli causai: Tucuicunahuan alli apanacungapaj
Shujtajcunahuan alli apanacungapajca imatapish mana shuyashpami shungumanta cujcuna cana canchij.
