¿Respetoca imamantataj chingaricun?
SHUJTAJCUNATA MANA RESPETANCUNACHU
Shujtajcunata respetajpica problemacunaca ña mana ashtahuan jatunyangachu.
-
Proverbios 15:1-pica: “Sumajta cutichishca shimica, pꞌiñarishcatapish anchuchinmi. Ashtahuanpish maipish cachun rimashca shimica ashtahuan pꞌiñachinllami” ninmi. Ñucanchij shimicunahuan, ruraicunahuan mana respetota ricuchishpaca ninapi ashtahuan yantata churacuj shinami problemacunata ashtahuan mirachishun.
-
Jesusca Mateo 12:34-pica: “Shimica shungupi ima tiyashcatami riman” nircami. Por ejemplo, ñucanchijcunaca shujtaj llajtamanta cajcunata, chꞌican chꞌican costumbrecunata charijcunata mana respetashpaca ñucanchijcuna ima laya cashcatami ricuchinchij. Chashna cashpaca ñucanchijrajchari chai yuyaicunataca cambiana canchij.
28 llajtacunapica 32.000 yalli gentecunatami encuestarcacuna. Paicunapuramantaca chaupi yallimi, cunan shina mana respetajcunataca mana nunca ricushcanchijchu nircacuna.
¿IMATATAJ RURAI TUCUNGUI?
Shujtajcuna can yuyashca shina mana yuyajpipish tucuicunahuan respetohuan parlai. Ama huashalla rimashpa puringapajca canpish, paipish munashca temacunamantami parlana cangui.
Ima shinami canta tratachun munangui, chashnallataj shujtajcunatapish tratai. Shujtajcunata cꞌuyajpi, paicunahuan alli cajpica paicunapish canhuan chashnallatajmi cangacuna.
Perdonangapaj listo cai. Pi canta llaquichijpica pai mana munashpa llaquichishcata yuyai. Chashnami paita rato perdonangui.
¿TESTIGO DE JEHOVACUNACA IMATATAJ RURANCHIJ?
Maipi causashpapish, trabajashpapish Testigocunaca tucuicunatami respetanchij. Shujtajcunatapish respetachunmi yachachinchij.
Tucuicunamanmi Bibliamanta gratis yachachinchij. Shinapish paicuna ñucanchij shina yuyachun, ñucanchij shina crichunca mana obliganchijchu. Chaipaj randica 1 Pedro 3:15-pi nishca shinami ñucanchij crishcacunamantaca ‘manso shunguhuan, achca respetohuan parlanchij’ (2 Timoteo 2:24).
Tucuicunatami igual tratanchij. Pi ñucanchij tandanacuiman shamujpi, Bibliamanta yachasha nijpica cꞌuyaihuanmi yachachinchij. 1 Pedro 2:17-pi nishca shinacarin ‘tucui laya gentecunatami respetanchij’, tucuicunatami alli tratanchij.
Autoridadcunatami respetanchij. Ñucanchij llajtapi tiyaj leycunatami cazunchij, impuestocunatapishmi paganchij (Romanos 13:1). Shinallataj politicacunapi mana chagrurishpapish shujtajcuna paicunallataj decidichunmi saquinchij.
