¿Respetoca imamantataj chingaricun?
CAUSAITA MANA RESPETANCUNACHU
Mana allicunata rurashpaca ñucanchij causaitapish, shujtajcunapaj causaitapishmi peligropi churanchij. Chashnami causaita mana respetashcata ricuchinchij.
-
Tabacota fumashpaca cancerhuanmi unguri tucungui. Fumashpa catishpacarin cáncer ungüitaca mana mishanguichu. Achcacunami pulmonpi cancerta charishcamanta huañushcacuna. Paicunamantaca casi 90 porciento gentecunami fumashcamanta o tabacopaj cushnita ashnachishcamanta huañushcacuna.
-
Cada huata escuelacunapi armacunahuan disparashcamantami achca gentecunaca yallitaj mancharishca cancuna. Estados Unidosmanta Universidad de Stanfordca: “Chai armacunamanta quishpirijcunapishmi achca huatacunata dimastij sustarishca causancuna” ninmi.
-
Carrota manejajcunaca drogarishca cashcamanta o tragota ubyashcamantami carreterapi cajcunataca peligropi churancuna. Paicunaca causaita mana valorashcamantami achca gentecunata llaquichincuna.
¿IMATATAJ RURAI TUCUNGUI?
Cambaj saludta cuidai. Fumashpa, yallitaj tragota ubyashpa, drogarishpaca ñucanchij cuerpotami llaquichinchij. Shujtajcunapaj causaitapish, ñucanchij familiapaj causaitapish mana respetashcatami ricuchinchij. Shinapish caicunatami saqui tucunchij.
Cambaj causaita cuidai. Accidentecuna ama tiyachun cambaj huasita alli allichishcata chari. Cuidadohuan manejangapajpish esforzari. Carrotapish alli allichishpa chari. Cambaj causaita llaquichij, huañuchij ruraicunata rurachun nijpipish ama cazuichu.
Shujtajcunata llaquishcata ricuchi. Maimanta cajpipish, mashna cullquita charijpipish, estudiashca cajpipish respetota ricuchishpaca causaitapish respetashcatami ricuchinchij. Pꞌiñanacuicuna, guerracunaca shujtajcunata mana ricunayachishcamantami tiyashca.
¿TESTIGO DE JEHOVACUNACA IMATATAJ RURANCHIJ?
Shujtajcuna alli causaita charichunmi ayudanchij. Bibliamanta ñucanchijhuan yachashcamantami achcacunaca paicunapaj mana alli viciocunata saquishpa paicunapaj causaita cambiashcacuna.
Tandanacuna huasicunata, edificiocunata shayachicushpaca ama llaqui tucungapajmi achcata cuidarinchij. Chaicunata shayachishpa ayudajcunaca accidentecunapi ama urmangapajmi cursocunata charincuna. Ñucanchij edificiocunaca leycuna mandashca shinami rurashca can. Chaita pajtachingapajmi ricurashpa catinchij.
Shujtajcunatami ayudanchij. Muyundij allpapica casi 200 chꞌican chꞌican llaquicunami tiyashca. Chaimantami ñucanchij organizacionca casi shuj huatata cai llaquicunapi ayudashca. Cai llaquicunata charishca gentecunata ayudangapajmi casi 12 millones de dólares cullquita donashcanchij.
2014 huatapica Ébola ungüimi África Occidental llajtacunapi callarirca. Cutin 2018 huatapica chai ungüillatajmi República Democrática del Congopi callarirca. Chaimi testigo de Jehovacunaca ama chai ungüihuan contagiarichun achcacunata yachachircanchij. Por ejemplo, huaquin huauquicunataca “Cazunami causaita quishpichi tucun” nishca conferenciata achcacunapaj ñaupajpi cuchunmi cacharcanchij. Shinallataj ñucanchij tandanacuna huasi yaicunpipish maquicunata maillarichunmi yacuta churarcanchij. Imamanta maquita maillana cashcatapish, ama contagiaringapaj imallata rurana cashcatapishmi yachachircanchij.
Sierra Leona llajtapica testigo de Jehovacunaca shujtaj Testigocunatapish, shujtaj gentecunatapish Ébola ungüihuan ama contagiarichunmi ayudarcacuna. Chaita rurashcamantami shuj radiopica cutin cutin Testigocunata felicitarcacuna.
Liberiapica Ébola ungüihuan ama contagiaringapajmi manaraj tandanacuiman yaicushpa maquicunata maillangapaj shuyacuncuna.
a Ñaupa Oriente Mediopi tiyaj llajtacunapica cashna laya huasicunata shayachinami familiapaj causaita, shujtajcunapaj causaitapish cuidana valishca cashcata ricuchirca.
