¿Tucuipajchu shuj ley tiyachun minishtinchij?

JOVENCUNA cajpica ñucanchij yaya mamaca chꞌican chꞌican mandatocunatami curcacuna. Ña huiñashpami chai mandatocuna ñucanchij allipaj cashcata intindinchij. Paicunahuan ña mana causashpapish paicuna ima shina yachachishcata yuyarishpami causanchij.

Ñucanchij Yaya Jehová Diospish paipaj Shimi Bibliapica rurashcalla dioscunata ama adorachun, ama huainayachun, ama shuhuachun nishpami mandashca (Éxodo 20:​1-​17; Hechos 15:28, 29). Tucuipi espiritualmente huiñashpami cai mandashcacunata ñucanchij allipaj Jehová Dios cushcata cuentata cunchij. Paipaj mandashcacunata pajtachinaca mana sinchichu can (Efesios 4:​15; Isaías 48:17, 18; 54:13).

Bibliapica caita o chaitami rurana can nishpaca mana tucuita mandanchu. Chaimantami Bibliapi imata rurangapaj shuj mandato mana ricurijpica maijancunaca: “Ñucanchij munashcata ruranallami canchij. Dios munashpaca chaipajpishmi shuj mandatota churanman carca” nishpa yuyancuna.

Chashna yuyajcunaca mana alli yuyashpa decidishcamantami tiempohuanca arrepintirincuna. Paicunaca Bibliapica mana leycunalla tiyashcata, ashtahuanpish Dios imata munashcacuna o mana munashcacunapish tiyashcatami cungarincuna. Bibliata estudiashpami Jehová Dios imata munashcata yachai tucunchij. Shinallataj pai yuyashca shina imatapish decidi tucunchij. Chashna rurashpami Diospaj shunguta cushichinchij, alli decisioncunata agllashcamantapish ñucanchijllataj beneficiarinchij (Efesios 5:1).

Bibliapi tiyaj alli ejemplocuna

Ñaupa punllacunapi Diosta sirvijcunaca shuj ley mana tiyajpipish paicunapaj causaipica Dios imata yuyashcatami alli ricurcacuna. Por ejemplo, José causashca punllacunapica huainayana juchamanta shuj leyca manaraj tiyarcachu. Shinapish Joseca Potifarpaj huarmi paihuan siririchun nijpica shuj ley mana tiyajpipish chaita rurana mana alli cashcatami cuentata curca. Paica mana paipaj concienciallapi mana alli sintirina cashcata, ashtahuanpish ‘Diosta pꞌiñachishpa juchallina’ cashcatami yacharca (Génesis 39:9). Shinallataj Joseca huainayana juchapi urmashpaca Edén huertapi Dios imata mandashcata mana cazucushcatami intindirca (Génesis 2:​24).

Shujtaj ejemplopi yuyashun. Hechos 16:3-pica Timoteoca congregacioncunata Pablohuan visitangapajca circunsicionta rurana cashcatami nin. Chaimantami Pabloca Timoteotaca circuncisionta rurarca. Pero verso 4-pi liyishca shinaca qꞌuipamanca paicunaca: ‘Apostolcunahuan, cunaj yuyajcunahuan Jerusalenpi yuyarinacushcatami tucui pueblocunapi huillashpa rircacuna’ ninmi. Chai yuyarishcacunapica Jesusta catijcunaca circuncisionta rurangapaj ña mana obligadoschu can nishpami quillcashca carca (Hechos 15:​5, 6, 28, 29). Shinapish ¿Pabloca imamantataj Timoteotaca circuncisionta rurarca? Timoteopaj yaya griego cashcata tucui chaipi causaj judiocuna yachashcamantami chaita rurarca. Pabloca mana shujtajcunata ñitcachinata munarcachu. Ashtahuanpish “Diospaj ñaupajpi ñucanchij ima shina cashcata, cancunapaj yuyaillapitaj ricuchunmi mingarinchij” nircami (2 Corintios 4:2; 1 Corintios 9:​19-​23).

Pablopish Timoteopish siempremi chashna yuyajcuna carca. Romanos 14:15, 20, 21 y 1 Corintios 8:​9-​13; 10:23-​33 versocunapica shujtajcuna Diospaj ñaupajpi alli ricurichun Pablo ima shina preocuparishcatami ricuchin. Ashtahuantajca jahualla ñitcarijcunamantami sustarij carca. Shinallataj Pabloca Timoteomantaca cashnami escribirca: “Ñuca yuyashca shina yuyajtaca, pi shujtajta mana charinichu. Pai shina cancunamanta sustarijtajca mana tiyanchu. Tucuicunami paicunapaj allipajlla mashcancuna, Cristo Jesuspajca mana yuyancunachu. Ashtahuanpish pai alli cashcataca ñami yachanguichij. Yayandij churindij shinami, alli huillaipica sirvircanchij” (Filipenses 2:​20-​22). Pablopish Timoteopish alli ejemplotami saquircacuna. Shuj ley mana tiyajpipish paicunaca mana paicuna alli canallatachu mashcarcacuna. Paicuna imata decidishpapish shujtajcunata ama llaquichichunmi Jehová shina, Jesús shina cꞌuyaita charishcata ricuchircacuna.

Cunanca Jesucristopi yuyashun, paica tucuimanta yalli shuj alli ejemplomi can. Sermón del Monte nishcapimi Jesusca, Diospaj leyta intindijcunaca caitami rurana cangui, caitaca mana ruranachu cangui nishpa mandachunca mana shuyanchu nircami (Mateo 5:​21, 22, 27, 28). Josepish Pablopish Timoteopish Jesuspish shuj ley mana tiyashcallamanta paicuna munashcata ruranataca mana yuyarcacunachu. Ashtahuanpish paicunaca Dios yuyashca shinami rurarcacuna. Jesusca ‘Diostapish shujtajcunatapish cꞌuyangui nishca mandashcacunami ashtahuan importante can’ nircami. Chai mandashcacunata pajtachishpami paicunaca causarcacuna (Mateo 22:36-​40).

Cunan punllapi Diosta sirvijcunamanta

Bibliataca leycunata quillcana librota shinaca mana ricunachu canchij. Shuj ley mana tiyajpipish Jehová imata munashcata, pai imata yuyashcatami ñucanchij ruraicunahuanca ricuchina canchij. Caitami rurana cangui, caitaca mana ruranachu cangui nishca mandashcata shuyanapaj randica ‘Jehová Diospaj munai ima cashcatami alli intindina canchij’ (Efesios 5:​17; Romanos 12:2). ¿Chaita rurashpaca imatataj Jehová Diosmanca ricuchinchij? Ñucanchij ima munashcallata ruranapaj randica pai munashcata rurana ashtahuan importante cashcatami ricuchinchij. Shinallataj ñucanchijta cꞌuyashcamanta agradicishpami pai shinallataj cꞌuyajcuna casha ninchij (Proverbios 23:15; 27:11). Dios quillcachishcacunapi nishca shina rurashpaca espiritualmentemi alli cashun, ñucanchij cuerpopipish allimi sintirishun. Chaitaca mana cungarinachu canchij.

Dios nishcacunata ñucanchij causaipi ima shina pajtachina cashcata ricushun.

Imata uyanata, imata ricunata alli agllashunchij

Shuj jovenpi yuyashun. Paica achca musicacunata charij shuj CD-tami randinata yuyacun. Chai CD-pi tiyaj musicacunatami achcata uyanata munan. Shinapish cai musicacunaca mapa, huainayana ruraicunahuan chagrushca letracunatami charin. Shinallataj cantaj runapish yallitaj colerashca cashcata, macasha nicushcatami ricuchin. Cai jovenca Jehová Diosta cꞌuyashcamantami pai imata yuyajta, pai ima shina sintijta yuyarin. Shinapish ¿Diospaj munai maijan cashcata yachangapajca imatataj ruran?

Apóstol Pabloca galatascunaman quillcashpaca aichapaj ruraicuna maijan cashcata, Diospaj espiritupaj grano maijan cashcatapishmi ricuchirca. Diospaj espiritupaj granoca cꞌuyaimi, cushimi, sumaj causaimi, mana utca pꞌiñarinami, alli shungumi, alli cajmi, crijmi, manso shungumi, quiquinllataj jarcarijmi. Shinapish ¿aichapaj ruraicunaca imacunallataj can? Pabloca: “Aichapaj ruraicunaca ricunalla, caicunami: Huainayana, apanacushpa causana, imapish millananata rurana, aicha munaita mana jarcarina, rurashcalla dioscunata adorana, brujiana, pꞌiñanacushcalla causana, cꞌamina, huañurina, jahualla pꞌiñarina, pꞌiñanacuicuna, chꞌicanyarinacuna, panda yachachicuna, envidiaicuna, huañuchicuna, machaicuna, maipish cachun fiestacuna, imapish chai shina ruraicunapishmi tiyan. Chaicunamantaca ñaupaman ña huillashca shinallatajmi, cancunataca mandani. Chaicunata rurajcunaca, Dios mandacujpi cana cajca mana cai tucunchu” nishpami escribirca (Gálatas 5:​19-​23).

Aichapaj ruraicuna imacunalla cashcata parlashca qꞌuipami Pabloca: “Imapish chai shina ruraicunapishmi tiyan” nirca. Chashna nishpaca cai ruraicunalla aichapaj ruraicuna cashcataca mana nisha nircachu. Maijanpish: “Ima ruraicuna Pablo parlashca aichapaj ruraicunapaj ucupi mana cajpica Dios quillcachishcacunapica rurachun saquinllami” nishpaca mana yuyanachu can. Chai ruraicuna aichapaj ruraicuna ucupi mana cashpapish “chai shina” ruraicunapurapi cashcata ricungapajmi alli yuyana can. “Chai shina” ruraicunata rurashpa catijcunaca Diospaj Gobierno cushca bendicioncunataca mana chasquingacunachu.

Shinaca ¿Dios imata mana munashcata yachanaca jahuallachu can? Cai ejemplopi yuyashun. Shuj doctorchari frutacunata, verduracunata micuchun mandan. Cutin mishqui micunacunata, heladocunata, shujtaj micuicunatapish ama micuchun nishpachari mandan. Shinapish ¿bizcochocuna maijan micunapurapi cashcata ricunaca jahuallachu canga? ¿Ñajaman parlashca musicacunaca Diospaj espiritupaj grano ucupichu can? Mana cashpaca ¿aichapaj ruraicuna ucupichu can? Chai musicacunapica cꞌuyaita, llaquij canata, quiquinllataj jarcarij canata, Diospaj espiritupaj grano shujtaj ruraicunatapish mana ricuchinchu. Chaimantami cai musicacuna Dios yuyashca shina mana cashcata yachangapajca shuj leyca mana minishtirin. Imata liyingapaj, peliculacunata ricungapaj, televisionta ricungapaj, video juegocunata pugllangapaj o imata Internetpi ricungapajpish shuj ley tiyachun mana minishtirin.

Alli yuyashpa churarishunchij

Bibliapica ima shina churarinamanta, ima shina allichirinamantami consejocuna tiyan. Chai consejocunaca sumajta alli churaringapajmi Diosta sirvijcunataca ayudan. Maijanpish Jehová Diosta cꞌuyashpaca mana pai munashcatachu ruran, ashtahuanpish Diosta cushichinatami mashcan. Ña ricushca shinaca Jehová Diosca tucuipaj leycunata mana cushpapish maipish cachun causachunca mana munanchu. Maijan ladocunapica chꞌican layami churarincuna. Shujtaj laya churanacunapishmi cada rato llujshin. Shinapish Diosca paita sirvijcunamanca maipi causajpipish, ima tiempopi causajpipish paipaj consejocunata cushpami catin.

Por ejemplo, 1 Timoteo 2:​9, 10-pica: “Shinallataj huarmicunapish sumaj churanacunata churarishpaca, ama pinganayajta maipish cachun churarichun: Ajchatapish ama maipish cachun allichirichun, curitapish, perlatapish, achca valij churanacunatapish ama churarichun. Chaipaj randica allicunata rurashpa, Diosta yuyarij huarmicuna rurana cashca shinallataj rurachun” ninmi. Chaimantami Diosta sirvij cꞌaricunapish, huarmicunapish paicuna causashca ladocunapica paicunapaj churarishcahuan Diosta tucui shunguhuan adorajcuna cashcata ricuchina can. Shinallataj pai ima shina churarishcata ricushpa Bibliamanta yachachijpi shujtajcuna chasquinata o mana chasquinatami alli yuyana can (2 Corintios 6:3). Diosta alli sirvijca mana pai imata munashcallamanta o paipaj derechocunallamantachu preocuparin. Ashtahuanpish shujtajcunata ama ñitcachingapajmi preocuparin (Mateo 18:6; Filipenses 1:​10).

Diosta sirvijcunaca paicuna ima shina churarishca shujtajcunata ñitcachijpica Pablopaj ejemplota catishpami paicunapaj munaita huashaman saquishpa, shujtajcunapaj allita mashcana can. Pabloca: “Cristota ñuca catij shinallataj, ñucata ricushpa catichij” nircami (1 Corintios 11:1). Shinallataj Cristomanta quillcashpaca: “Cristopish paipaj allipajllaca mana rurarcachu” nircami. Romanos libropipish Diosta sirvijcunamanca alli consejocunatami curca. Chaipica: “Sinchi crijcunaca, irqui crijcuna mana apai tucushcacunataca cꞌuyaihuanmi apana canchij. Mana ñucanchijpajlla alli canata yuyanachu canchij. Cada quiquinmi ñucanchijca, shujtajpaj imapish alli canapaj, paita sinchiyachinapaj ayudana canchij” ninmi (Romanos 15:1-3).

Ima alli cashcata o mana alli cashcata yachashunchij

¿Shuj ley mana tiyajpipish ima shinataj Dios imata munashcataca yachai tucunchij? Punllanta Bibliata liyishpa, alli estudiashpa, cutin cutin yuyashpami ima alli cashcata, ima mana alli cashcataca intindi tucushun. Shinapish chaitaca mana rato rurai tucunchijchu. Ima shinami shuj huahuaca asha asha huiñashpa catin, chashnallatajmi ñucanchijpish espiritualmenteca asha asha huiñashpa catinchij. Chaimantami ima cambiocunata ruracushcata mana chai rato ricushpapish mana desanimarishpa pacienciahuan shuyashpa catina canchij. Qꞌuipamanmi ima alli cashcata, ima mana alli cashcataca ña jahualla intindishun. Ima shinami ricushcanchij, Diospaj Shimita estudiangapaj, chaipi nishcata pajtachingapajpish ñucanchij pudishcatami rurana canchij (Hebreos 5:​14).

Diospaj leycunaca ñucanchij cazuj cashcata o mana cazuj cashcatami ricuchichunmi ayudan. Cutin Diospaj consejocunaca ñucanchij espiritualmente ima shina cashcata, Diosta cushichisha nishcata o mana cushichisha nishcatapish ricuchichunmi ayudan. Espiritualmente huiñashpaca Jehová Diospaj ejemplota, Jesuspaj ejemplotapishmi ashtahuan catinata munashun. Shinallataj Yaya Dios yuyashca shinami imatapish decidinata munashun. Ñucanchij ruraicunahuan Diosta tucuipi cushichishpaca ñucanchijpishmi cushilla sintirishun.

[Foto]

Tucui ladocunapi mana chashnallataj churarijpipish Diospaj consejocunata catishpami sumajta churarinata agllana canchij.