ACHCA gentecunami Yaya Dios ñucanchij mañashcacunata uyaj cashcata o mana uyaj cashcata yachasha nincuna. Pero Bibliapi nishca shinaca Diosca ñucanchij mañashcacunataca uyanmi. Pero ¿ñucanchij mañashcacunata pai uyachunca imatataj rurana canchij?

Jesusca religionta pushajcunataca mishqui shimi, jayaj shungu nishpami rimarca. Paicunaca gentecunapaj ñaupajpi alli ricurisha nishpallami Diosta mañajcuna carca. Chaimantami Jesusca paicuna japina cashcataca ñami japincuna nirca. Pero Diosca chai runacuna mañashcataca mana uyarcachu (Mateo 6:5). Cunan punllacunapish achca gentecunami paicuna munashcallapi yuyashpa mañancuna. Dios imata munashcataca mana yuyarincunallapishchu. Pero Bibliapi mandashcacunata gentecuna mana cazujpica Yaya Diosca paicunapaj mañashcacunataca mana uyangachu.

Shinashpaca ¿Jehová Dios ñucanchij mañashcacunata uyanchu? Bibliapica: ‘Pi cashpapish Taita Diospaj ñaupajpica tucuicunami chai shinallataj maijan llajtapi causaj cashpapish Taita Diosta manchashpa allita rurajtami Taita Diosca alli nin’ ninmi (Hechos 10:34, 35). Yaya Dios ñucanchij mañashcacunata uyachunca shujtaj razamanta cana, shujtaj llajtamanta cana, charij o pobre canaca mana minishtirinchu. Diosta manchaj runaca Diostami tucui shungumanta respetan, mana allita rurashpa llaquilla sintichinataca mana munanchu. Shinallataj allita ruraj runaca paipaj munaita o shujtajcunapaj munaita ruranapaj randica Diospaj munaita rurangapajmi esfuerzota ruran. Chaimantami Jehová Dios ñucanchij mañashcacunata uyachunca Bibliapi tiyaj consejocunata catina canchij.

Achca gentecunami ñucanchij mañashcacunata Dios shuj milagrohuan contestachun shuyancuna. Pero ñaupa punllacunapica Diosca huaquinllapimi shuj milagrohuan mañashcacunata contestaj carca. Por ejemplo, Bibliapica shuj milagro tiyashcamantaca achca huatacuna qꞌuipami shujtaj milagro tiyaj carca ninmi. Shinallataj milagrocunaca apostolcuna huañujpimi tucurina carca (1 Corintios 13:8-10). Shinashpaca ¿Diosca ñucanchij mañashcacunataca uyanchu? Cunan punllacunapi Dios ima shina ñucanchij mañashcacunata contestaj cashcata huaquin ejemplocunahuan ricushun.

Diosca alli yachaitami cun. Alli yachaica Jehová Diosmantami shamun. Chaimantami paita mashcajcunaman, pai mandashcata cazujcunamanca cushicushpa alli yachaita cun (Santiago 1:5).

Diosca espíritu santotami cun. Espíritu santoca Diospaj fuerza, Diospaj podermi can. Chai podertaca Diosllami charin. Diospaj espíritu santota charishpami ima llaquicunatapish chꞌimbapurai tucunchij. Yallitaj sustarishca cashpaca tranquilomi sintiri tucunchij. Cꞌuyaj, llaquij, mana utca pꞌiñarijpishmi cai tucunchij (Gálatas 5:22, 23). Shinallataj Jesusca espíritu santota mañajcunamanca Diosca cungallami nircami (Lucas 11:13).

Diosca paimanta yachasha nijcunatami ayudan. Hechos 17:26, 27-pi nishca shinaca muyundij Allpamanta achca gentecunami Diosta mashcancuna. Paicunaca Diospaj shuti maijan cashcata, cai Allpahuan, gentecunahuan Dios imata ruragrishcatami yachanata munancuna. Shinallataj Diospajman cꞌuchuyangapaj imata rurana cashcatami yachasha nincuna (Santiago 4:8). Testigo de Jehovacunaca casi siempremi chashna laya gentecunahuan tupancuna. Paicunaca gentecuna charishca tapuicunatami Bibliahuan contestan.

¿Chaimantachu quiquinca cai revistata liyicungui? ¿Yaya Diostachu mashcacungui? Shina cajpica Diosmi cai revistapi tiyaj yachaicunahuan cambaj mañashcata contestacun.