Ñucaca Guatemala inti yaicun ladoman saquirij Acul shuti shuj pueblopimi huacharircani. Jahua urcumanmi chaica saquirin. Ñuca familiaca ixiles nishca runacunamantami can. Chai runacunaca cultura mayamantami cancuna. Español shimita parlashpapish ñuca propio shimitapishmi yacharcani. Ñuca uchilla cajpica ñuca causan llajtapica sinchi macanacuimi tiyarca. 36 años qꞌuipami chai macanacuica tucurirca. Chai macanacuipica achca ixiles runacunami huañurca.

Ñuca chuscu huatacunata charijpimi ñuca huauqui huañurca. Paica 7 huatacunallatami charirca. Shuj granada bombahuan pugllacujpimi chai granada tugyajpi huañurca. Ñucapish chaipimi ñahuita pirdircani. Chai tiempomantami ñucaca ciegocunapaj shuj institucionpi pasarcani. Chaica ciudad de Guatemalapimi saquirirca. Chaipimi braille nishcapi liyinatapish yacharcani. Chaipi trabajajcunaca shujtaj huahuacunahuan tandanacuchun, parlachunca mana saquijcunachu carca. Imamanta chaita rurashcataca mana intindircanichu. Ñuca compañerocunapish ñucahuan tandanacunataca mana munajcunachu carca. Ñucallami pasaj carcani. Chaimantami ñuca mamahuan pasanata munaj carcani. Ñuca mamahuanca ishqui quillacunatami pasaj carcani. Paica achcatami ñucataca cꞌuyaj carca. Pero ñuca 10 huatacunata charijpimi huañurca. Pailla ñucata cꞌuyaj cashcatami sintircani. Chaimantami pai huañujpica llaquilla saquirircani.

11 huatacunata charishpami ñuca causan puebloman tigrarcani. Chaimi ñuca lahuauquihuan, paipaj familiahuan causanaman rircani. Paicunaca imalla minishtirishcatami curcacuna. Pero ñuca ama llaquilla sintirichunca mana ayudai tucurcacunachu. Huaquinpica caparishpami Diosta mañaj carcani. Ñucaca, “¿Imamantataj ñuca mama huañurca? ¿Imamantataj ciego saquirishcani?” nijmi carcani. Gentecunaca Diospaj munai cashcamantami canca chashna llaquicunata charingui nijcunami carca. Chaimantami Diosca millai cashcata, mana justo cashcata yuyarcani. Ñucallataj huañurinatami munarcani. Pero ima shina mana chaita rurai tucushpami mana huañurcani.

Ñahuita pirdishcamantami pi imata rurajpipish mana difindiri tucurcani. Shinallataj llaquilla, ñucalla cashcatami sintirij carcani. Huahuaraj cajpica achca cutinmi ñucataca violashpa llaquichircacuna. Pero chaica pipaj mana importanchu nishpami chaitaca mana denunciaj carcani. Gentecunaca ñucahuan parlanataca casi mana munajcunachu carca. Llaquillami pasaj carcani. Shujtajcunapi mana confiashcamantami shujtaj gentecunahuan canataca mana munaj carcani.

Ñuca 13 huatacunata charijpimi testigo de Jehová shuj cusa huarmi ñucahuan parlanaman shamushcacuna carca. Escuelapi recreo horasmi parlarcacuna. Shuj profesorami ñucata llaquishcamanta paicuna ñucata visitachun mañashca carca. Chai cusa huarmica Bibliahuanmi, ciegocunapaj ñahuicunaca pascaringami, huañushcacunapish causaringami nishpa yachachircacuna (Isaías 35:5; Juan 5:28, 29). Paicunata uyanatami munaj carcani. Pero shujtajcunahuan mana parlana costumbreta charishcamantami upalla saquirij carcani. Ñuca chashna cajpipish paicunaca pacienciata charishpa, cꞌuyaita ricuchishpami Bibliamanta yachachingapaj ñucata visitashpa catircacuna. Paicunaca ñuca causan puebloman chayangapajca 10 kilometrostami urcuta purina carcacuna.

Ñuca huauquimi paicuna ima shina cashcata parlarca. Paica chai cusa huarmica pobre cashpapish alajata churarishcami purincuna nircami. Ñucaca paicuna uchilla regalitocunata siempre cujpimi ñucata cꞌuyashcata sintircani. Shinallataj Jesusta alli catijcunallami chashna sacrificiocunataca ruranga nishpami convencido carcani.

Braillepi tiyaj publicacioncunata utilizashpami Bibliata estudiaj carcani. Ima yachacushcataca intindijmi carcani. Pero huaquin yachachishcacunataca mana tucui shunguhuanchu crij carcani. Por ejemplo, Yaya Dios ñucata cꞌuyashcata, shujtajcunapish Dios shina ñucata cꞌuyashcataca mana crijchu carcani. Yaya Dios imamanta llaquicuna tiyachun saquishcata intindishpapish paita shuj cꞌuyaj Yayata shina ricunaca sinchimi carca. *

Bibliata asha asha yachashpami ñuca yuyaicunata cambiarcani. Por ejemplo, ñucanchij sufrijta ricushpaca Yaya Diospish llaquilla sintirij cashcatami yacharcani. Paita sirvijcuna llaquita apacujta ricushpaca Yaya Diosca: ‘Ñuca agllashcacuna ima shina llaquita apacujtaca ñucatajmi ricuni. Paicuna llaquita apacujtaca ñuca ñahuihuantajmi ricuni’ ninmi (Éxodo 3:7). Jehová Dios cꞌuyaj Dios cashcata yachashpami ñuca causaita paiman mingashpa paipaj munaita ruranata decidircani. 1998 huatapimi bautizarircani.

Bautizarishca casi shuj huata qꞌuipami ciegocunapaj cursota chasquingapaj Escuintla ciudadman rircani. Chai ciudadmanta shuj ancianoca Acul pueblopi tandanacuicunaman rina ñucapaj sinchi cashcatami cuentata curca. Tandanacuiman ringapajca ñucaman Bibliamanta yachachij cusa huarmi purishca urcucunallatatajmi rina tucurca. Chaimantami chai ancianoca ñucata ayudangapaj Escuintla ciudadpi shuj familiahuan parlarca. Chai familiaca paicunapaj huasipi puzachishpami tandanacuicunaman richunpish ayudarca. Chai familiaca cunancamami ñucataca shuj familia shina cuidashpa catin.

Huauqui panicunaca ñucata cꞌuyashcata ricuchingapajca chꞌican chꞌican cosascunatami rurashcacuna. Testigo de Jehovacunahuan cashpami Diosta alli sirvijcunapurapi cashcata tucui shunguhuan crini (Juan 13:34, 35).

Cunanca imapaj mana valishcata, o esperanza illaj shinaca mana sintirinichu. Cunanca imapaj causashcatami yachani. Bibliamanta shujtajcunaman yachachingapaj ñuca tiempota utilizashpami mana ñuca llaquicunallapi yuyashpa causani. Shinallataj congregacionpica pushaj ancianomi cani. Y cꞌuchulla congregacioncunapimi conferenciacunata cuni. Shinallataj jatun tandanacuicunapipish achca gentecunapaj ñaupajpimi conferenciata cushpa yachachina oportunidadta charini. Chaimantami agradecido cani.

2010 huatapimi El Salvador llajtapi Escuela de Entrenamiento Ministerialmanta graduarircani (cunanca chai escuelataca Escuela para Evangelizadores del Reino nishpami rijsinchij). Cai escuelami congregacionmanta huauqui panicunata alli cuidachun ayudashca. Shinallataj chai escuelaman rishpami Jehová Dios ñucata cꞌuyashcata, valorashcata yachashcani. Jehová Diosmi maijanmanpish paipaj munaita ima shina pajtachinata yachachi tucun.

Jesucristoca: “Imatapish cujmi, cushcata japijta yalli cushicun” nircami (Hechos 20:35). Cunanca cushillami cani. Mana nunca yuyashca cashpapish cunanca shujtajcunatami ayudai tucuni.