1, 2. a) ¿Jesús manaraj huañushpa ima tucushcata yuyarishpa, pai cai Allpapi imallata rurashcatapish yuyarishpaca ima shinataj sintirinchij? b) ¿Cai yachaipica imacunatataj yachashun?

 SHUJ cꞌuyashca familia huañujpica achcatami llaquirinchij. Chai cꞌuyashca familia manaraj huañushpa achcata sufrishcata yuyarishpacarin ashtahuanmi llaquirinchij. Pero tiempohuanca pai ñucanchijta ima shina animashcata, imata yachachishcata o imata rurashcata yuyarishpami cushiyarinchij.

² Chai shinallatajmi Jesús huañushcata yuyarinapaj tiempopica, paipaj sacrificiopi yuyangapaj ashtahuan tiempota surcunchij. Jesús manaraj huañushpa achcata sufrishcata, paita achcata llaquichishcata yuyarishpaca dimastijmi llaquirinchij (1 Corintios 11:24, 25). Shinapish Jesús cai Allpapi cai horas pai imata nishcata, pai imata rurashcata yuyarishpaca achcatami cushiyarinchij. Cunan punllacunapipish Jesús imata ruracushcata, shamuj punllacunapipish Jesús imata ruragrishcata yuyarishpacarin ashtahuan contentosmi sintirinchij. Chashna yuyarishpaca Jesustapish, Jehová Diostapish ñucanchij ruraicunahuanmi agradicisha ninchij. Caita ima shina pajtachinataca cai yachaipimi ricushun.

3. ¿Jesús huañushcamantaca imamantataj agradecidos cana canchij?

³ Jesuspaj causaipi, Jesuspaj huañushcapipish yuyashpaca achcatami agradicinchij. Paica cai Allpapi cashpaca Diospaj Gobierno ima bendicioncunata apamunatami yachachirca.  Ñucanchijpish chaicunata yachashcamantami cushilla sintirinchij. Jesús huañushcamanta Dioshuanpish, Jesushuanpish alli apanacui tucushcata yachashpapish achcatami contentarinchij. Jesucristopi feta churajcunaca para siempre causana esperanzata, paicunapaj huañushca familiacunata cutin ricuna esperanzatapishmi charincuna (Juan 5:28, 29; Romanos 6:23). Ñucanchijca cai bendicioncunataca mana mericinchijchu. Jehová Diostapish, Jesustapish mana imata pagai tucunchijchu (Romanos 5:8, 20, 21). Pero paicunataca ñucanchij ruraicunahuanmi agradici tucunchij. ¿Chaitaca ima shinataj pajtachishun?

4. ¿María Magdalenaca Jesushuan agradecida cashcataca ima shinataj ricuchirca? (Fotomanta parlapai).

⁴ Shuj judía huarmimanta yachashun. Paica María Magdalenami carca. Paitaca siete demoniocunami japirishca carca. Chaimantami achcata sufricurca. Mariaca paipi demoniocuna cashcamantami pi mana ayudai tucushcata yuyashcanga. Shinapish Jesús demoniocunamanta paita quishpichijpica Jesushuanmi dimastij agradecida sintirirca. Chaimantami paica Jesuspaj catij tucurca. Paipaj tiempohuanpish, fuerzahuanpish, charishca cosascunahuanpishmi Jesusta ayudarca (Lucas 8:1-3). María Magdalenaca Jesús paita ayudashcamantami achcata agradicirca. Shinapish Jesús gentecunata quishpichingapaj tucuicunamanta huañugrishcataca manaraj yachashcangachu (Juan 3:16). Chashnapish María Magdalenaca Jesustaca tucuipimi apoyarca. Jesús caspipi huarcushca cajpica Mariaca Jesustapish, chaipi cajcunatapish apoyashpami chai cꞌuchullapi saquirirca (Juan 19:25). Jesús huañushca qꞌuipaca Mariapish, shujtaj ishqui huarmicunapish mishquijllata ashnacuj qꞌuihuacunatami Jesuspaj pambana jutcuman apashpa rircacuna (Marcos 16:1, 2). Mariaca cai tucuita rurashcamantami achca bendicioncunata chasquirca. Paica Jesús causarishca huashami paita ricui tucurca,  paihuanpishmi parlai tucurca. Shujtaj discipulocunaca Jesús causarishca huasha paitaca mana ricui tucurcacunachu. Pero María Magdalenaca cai bendiciontami chasquirca (Juan 20:11-18).

5. ¿Jehová Diostapish, Jesustapish agradicingapajca imatataj rurana canchij?

⁵ Ñucanchijca Jehová Dioshuanpish, Jesushuanpish agradecidos cashcatami ricuchi tucunchij. Chaipajca ñucanchij tiempohuan, fuerzahuan, cullquihuanpish Diosta sirvingapajmi esforzarina canchij. Por ejemplo, Diosta adorana huasicunata, edificiocunata shayachishpa, allichishpami ayudai tucunchij.

6. ¿Jesús canmanta huañushcataca imamantataj cringui?

⁶ Jehová Dios ñucanchijta achcata cꞌuyashcata yuyarishpa, Jesús cada unomanta huañushcatapish yuyarishpaca paicunata cꞌuyashcatami ricuchisha ninchij (1 Juan 4:10, 19). Apóstol Pablopish chaicunatami yuyarirca. Paica: “Jesusca ñucata cꞌuyashpami paipaj causaita ñucamanta curca” nircami. Chaita yuyarishcamantami Pabloca achca agradecido sintirirca (Gálatas 2:20). Jehová Diosca cantapish cꞌuyashcamantami paipaj puebloman pushamushca, paipaj amigo cachunpishmi saquishca (Juan 6:44). ¿Jehová Dios canta cꞌuyashcata, canta agllashcata yachashpaca manachu tucui shunguhuan agradicisha ningui? ¿Jesús canmanta huañushcata yachashpacarin manachu Jehová Diostapish, Jesustapish cꞌuyashcata ricuchisha ningui? Cunanca caita ima shina pajtachinatami ricushun.

7. Fotopi ricushca shinaca ¿Jehová Diosta, Jesusta cꞌuyashcataca ima shinataj ricuchina canchij? (2 Corintios 5:14, 15; 6:1, 2).

⁷ Jehová Diosta, Jesustapish cꞌuyashcamantami shujtajcunata cꞌuyanata yachanchij  (2 Corintios 5:14, 15; 6:1, 2-ta liyipai). Shujtajcunata cꞌuyashcata ricuchingapajca tucuicunaman predicangapajmi esforzarina canchij. Gentecuna ima razamanta, ima llajtamanta cajpipish, pobrecuna, charijcuna cajpipish paicunamanmi predicasha ninchij. Jehová Diosca tucui laya gentecuna quishpirichun, mana llullata alli yachaj chayachunpishmi munan. Chaimantami ñucanchijpish tucuicunaman predicangapaj esforzarina canchij (1 Timoteo 2:4).

8. ¿Huauqui panicunata cꞌuyashcata ricuchingapajca imatataj rurana canchij?

⁸ Jehová Diosta, Jesustapish cꞌuyashcata ricuchingapajca huauqui panicunatami cꞌuyana canchij (1 Juan 4:21). Chaimantami huauqui panicunamanta preocuparina canchij. Paicuna llaquicunata chari horaspishmi ayudana canchij. Paicunapaj cꞌuyashca familiacuna huañujpica cushichinami canchij. Paicuna ungushcacuna cajpi o desanimados cajpica paicunata animanaman, visitanamanmi rina canchij (2 Corintios 1:3-7; 1 Tesalonicenses 5:11, 14). Shinallataj ñucanchijca Santiago 5:16-pi ima nishcataca allimi yuyarinchij. Chaipica: “Cashcata ruraj runapaj mañaica poderta charinmi” ninmi. Chaimantami Jehová Diosta ñucanchij huauqui panicunamanta mañashpa catina canchij.

9. ¿Huauqui panicunata cꞌuyashcata ricuchingapajca imata rurangapajtaj listos cana canchij?

⁹ Huauqui panicunata cꞌuyashcata ricuchingapajca paicunahuanmi alli apanacuna canchij. Chaimantami Jehová Dios shinallataj paicunata perdonangapaj listos cana canchij. Jehová Diosca ñucanchij juchacunamanta paipaj cꞌuyashca Churi huañuchunmi saquirca. Chaita yuyarishpaca ¿manachu ñucanchijpish, huauqui panicuna pandarijpipish o llaquichijpipish perdonanalla canchij? Ñucanchijca Jesús parlashca millai sirvij shinaca mana casha ninchijchu. Chai millai sirvijpaj amoca paitaca shuj jatun dibitami perdonashca carca. Chashnapish chai millai sirvijca shujtaj sirvij paiman ashallata dibijpipish mana perdonasha nircachu (Mateo 18:23-35). Shinaca congregacionpi maijanhuan ima problemata charishca cashpaca ¿Jesús huañushcata yuyarina tandanacui manaraj chayajpi paihuan alli tucungapajchu canraj esforzaringui? (Mateo 5:23, 24). Chaita rurashpaca Jehová Diostapish, Jesustapish cꞌuyashcatami ricuchingui.

10, 11. ¿Ancianocunaca Jehová Diostapish, Jesustapish cꞌuyashcata ricuchingapajca imatataj rurana can?

¹⁰ Ancianocunaca Jehová Diosta, Jesustapish cꞌuyashcata ricuchingapajca huauqui panicunatami alli cuidana can (1 Pedro 5:1, 2-ta liyipai). Jesucristoca apóstol Pedrotaca chaita rurachunmi yachachirca. Apóstol Pedroca Jesusta mana rijsishcataca quimsa cutincunami nishca carca. Pero Pedroca arrepintirishpami Jesús causarishca huasha de verdadtaj paita cꞌuyashcata ricuchisha nishcanga. Jesusca Pedrotaca : “Juanpaj churi Simón, ¿ñucata cꞌuyanguichu?” nishpami tapurca. Pedro ari nijpica Jesusca: “Ñuca ovejacunata michingui” nircami (Juan 21:15-17). Chai punllamanta huichimanca apóstol Pedroca Jesusta cꞌuyashcata ricuchingapajmi huauqui panicunata cꞌuyaihuan cuidanataca manataj saquirca.

¹¹ Ancianocunapish ¿Jesús nishca shimicunata pajtachingapajca imatataj rurana cancuna? Paicunaca huauqui panicunata animashpa, visitashpa, congregacionmanta caruyashcacunatapish animashpami Jehová Diosta, Jesustapish cꞌuyashcata ricuchincuna (Ezequiel 34:11, 12). Ashtahuancarin Jesús huañushcata yuyarina tandanacuipica  Bibliamanta yachacujcunata, punta cutin rijcunatapish alli chasquingapajmi esforzarina cancuna. Chashnami paicunataca Jesuspaj discipulocuna tucuchun ayudangacuna.

12. ¿Juan 16:32, 33-pica Jesucristoca ima sinchiyachij shimicunatataj nirca?

¹² Jesusca pai huañunapaj ashalla horascuna faltajpica paipaj discipulocunamanca: “Cai pachapica achca llaquicunatami charigringuichij. Shinapish ¡ama manchaichijchu! Ñucaca cai pachataca ñami mishashcani” nircami (Juan 16:32, 33-ta liyipai). Jesuspaj contracuna paita huañuchishun nijpipish ¿paica imamantataj huañungacama Diosta sirvishpa catirca? Paica Jehová Diospi tucui shunguhuan confiashcamantami chaita rurarca. Jesusca paipaj discipulocunapish chashna laya llaquicunata charigrishcataca allimi yacharca. Chaimantami Jehová Diostaca paicunata cuidachun mañarca (Juan 17:11). Jehová Dios ñucanchijtapish cuidacushcata yachashcamantami mana manchaj cai tucunchij. Jehová Diosca ñucanchijpaj contracunata yalli achca podertami charin (1 Juan 4:4). Paica ñucanchijmantami achcata preocuparicun. Chaimantami paillataj ñucanchijta manchaita mishachun ayudanga.

13. ¿Arimatea llajtamanta José shuti runaca manchaita mana charishcataca ima shinataj ricuchirca?

¹³ Arimatea llajtamanta José shuti runapi yuyashunchij. Judiocunaca paitami respetajcuna carca. Joseca Sanedrín nishcapi tribunal supremopimi juez carca. Paica Diospaj Gobiernomantami yachanata munarca. Jesuspipishmi feta churarca. Pero judiocunata manchashcamanta, paita ña mana respetanata manchashcamantami Jesuspi crishcataca piman mana huillarca (Juan 19:38). Shinapish Jesús huañushca huashaca ima manchaita mana charishpami Pilatopajman rishpa Jesuspaj cuerpota mañarca (Marcos 15:42, 43). Chaita rurashpami tucuicunapaj ñaupajpi Jesuspi feta churashcata ricuchirca.

14. ¿Canpish manchaita charishpaca imatataj rurana cangui?

¹⁴ ¿Canpish manchashcamantachu escuelapi o trabajopi Jehová Diosta sirvicushcata manaraj huillashcangui? ¿O gentecunata manchashcamantachu publicador canata o bautizarinata manaraj decidishcangui? Chashna manchashpaca Jehová Diosta fuerzasta cuchunmi mañana cangui. Pai cambaj mañashcacunata ima shina cutichijta ricushpaca mana manchashpami allicunata ruranata decidingui (Isaías 41:10, 13).

15. ¿Discipulocunaca cushilla sintirishcamantaca imatataj rurashpa catircacuna? (Lucas 24:52, 53).

¹⁵ Discipulocunaca paipaj amigo Jesús huañujpica esperanza illaj, achca llaquillami sintirishcangacuna (Lucas 24:17-21). ¿Canpish chaipi cashca cashpaca ima shinataj sintirinman carcangui? Shinapish Jesusca causarishca huashaca paipaj discipulocunataca huaquin profeciacuna paipi pajtaricushcatami intindichirca. Paicunamanca tucuicunaman huillachunpishmi mingarca (Lucas 24:26, 27, 45-48). Jesús jahua pachaman rishca 40 punllacuna huashaca Jesuspaj discipulocunaca cushillami sintirircacuna. Paicunaca Jesús causarishcata, paicunata ayudagrishcata yachashpaca punllanta Diosta alabashpami catircacuna (Lucas 24:52, 53-ta liyipai; Hechos 5:42).

16. ¿Jesuspaj discipulocunapaj ejemplota catingapajca imatataj rurana canchij?

¹⁶ ¿Discipulocunapaj ejemplotaca ima shinataj cati tucunchij? Jehová Diosta tucui punllacunami cushicuihuan sirvingapaj esforzarina canchij. Chaipajca Diospaj Gobiernotami punta lugarpi churana canchij. Por ejemplo, huaquin huauqui panicunaca ashtahuan predicangapaj, tandanacuicunaman ringapaj, paicunapaj familiahuan Diosmanta yachangapajpishmi, paicunapaj trabajopaj horariota cambiashcacuna. Cutin shujtajcunaca congregacionpi ashtahuan ayudangapaj o huillana minishtirin lugarpi huillanaman rishcamantami valishca cosascunata saquishcacuna. Chashna Jehová Diosta cushicuihuan sirvishpa catingapajca achca esfuerzotami minishtinchij. Pero chashna esforzarijpica Jehová Diosca ñucanchijtami achcata bendicianga (Proverbios 10:22; Mateo 6:32, 33).

17. ¿Jesús huañushcata yuyarina tandanacui manaraj chayajpi, chai tandanacui huashapish imatataj rurana canchij? (Fotomanta parlapai).

¹⁷ Jesús huañushcata yuyaringapajca martes 4 de abril punlla chayachunmi achcata munacunchij. Chai punlla chayangacamaca Jesuspaj causaipi, Jesuspaj huañushcapipish yuyangapajmi tiempota surcuna canchij. Jehová Diospish, Jesuspish ñucanchijta achcata cꞌuyashcata yuyaringapajpishmi tiempota surcuna canchij. Por ejemplo, español Bibliapica Apéndice B12-pimi “La última semana de Jesús en la tierra (Parte 1)” y “La última semana de Jesús en la tierra (Parte 2)” nishca yachaita liyi tucunchij. Jesuspaj causaimanta Bibliapi yachacushpaca Diosta ima shina agradicinapi, paita cꞌuyashcata ima shina ricuchinapi, manchaita ima shina mishanapi, Diosta cushicuihuan sirvinapi yuyai. Caicunata pajtachingapaj esforzarijpica Jesusca ñucanchijtaca achcatami valoranga (Apocalipsis 2:19).