1, 2. ¿Cada huatapica imamantataj Jesús huañushcata yuyarina tandanacuiman rinchij?

 CASI 2.000 huatacuna huashamanmi Jesusca ñucanchijmanta paipaj causaita curca. Chaimantami ñucanchijca huiñaita causana oportunidadta charinchij. Jesús huañunapaj ashalla horascuna faltajpimi chai tutaca Jesusca paipaj discipulocunahuan shuj uchilla tandanacuita rurarca. Chai tandanacuipica ashalla tandata, ashalla vinotapishmi utilizarca. Qꞌuipacarin paipaj discipulocunataca pai cꞌuyashcata yuyarichunmi chai tandanacuita rurashpa catichun mandarca (1 Corintios 11:23-26).

² Ñucanchijpish Jesusta achcata cꞌuyashcamantami pai mandashcataca pajtachinchij (Juan 14:15). Chaimantami Jesús huañushcata yuyarina tandanacui manaraj chayajpica paipaj sacrificiota valorashcata ricuchinchij. Por ejemplo, Jehová Diosta mañangapaj, Jesús imamanta huañushcata yuyaringapajpishmi tiempota llujchinchij. Shinallataj chai tandanacui ñucanchijpaj achca valishca cashcamantami tucui pudishcata rurashpa gentecunata chai tandanacuiman invitangapaj esforzarinchij. Ashtahuancarin chai tandanacuiman ringapajca ima jarcachunpish mana saquinchijchu.

3. ¿Cai yachaipica imacunatataj yachashun?

³ Jehová Diosta sirvijcunaca Jesús huañushcata yuyaringapajmi achcata esforzarishcanchij. Cai yachaipica caimantami yachashun. Puntapica, Jesús nishca shina chai tandanacuita rurashcatami ricushun. Ishquipica, shujtajcunatapish chai tandanacuiman richun invitashcatami ricushun. Quimsapica, jarcaicuna tiyajpipish chai tandanacuita ruranata manataj saquishcatapishmi ricushun.

4. a) ¿Jesús huañushcata yuyarina tandanacuipica imallatataj yachanchij? (Lucas 22:19, 20). b) ¿Caicunamanta intindinaca imamantataj valishca can?

⁴ Jesús huañushcata yuyarina tandanacuiman huatan huatan rishpaca shuj alaja conferenciatami uyanchij. Chai conferenciapica Bibliahuanmi huaquin tapuicunata cutichin. Por ejemplo, Jesús imamanta huañuna cashcata, Jehová Dios ñucanchij juchacunata ima shina Jesusmanta perdonai tucushcatami yachanchij. Shinallataj picunalla chai tandanacuipi tandata micuna cashcata, picunalla vinota ubyana cashcatapishmi ricuchin. Tandapish, vinopish imata ricuchishcatapishmi yachanchij (Lucas 22:19, 20-ta liyipai). Shinallataj chai conferenciata uyacushpaca cai Allpapi causagrijcuna ima bendicioncunallata chasquigrishcatami yuyarinchij (Isaías 35:5, 6; 65:17, 21-23). Caicunata intindinaca dimastij valishcami can. Achca gentecunaca caicunataca mana intindincunachu, Jesuspaj sacrificio valishca cashcatapish mana intindincunachu. Ashtahuancarin Jesús mandashca shinaca pai huañushcataca mana yuyarincunachu. Achca gentecuna imamanta caicunata mana yachashcatami ricushun.

5. ¿Casi tucui apostolcuna huañushca huashaca ima panda crishcacunataj tiyai callarirca?

⁵ Casi tucui apostolcuna huañushca huashallami congregacionpica panda yachachijcuna tiyai callarirca (Mateo 13:24-27, 37-39). Paicunaca llullacunata yachachishpa Jesusta catijcunata caruyachishpami paicunahuan pusharcacuna (Hechos 20:29, 30). Por ejemplo, chai panda yachachijcunaca Cristo achcacunapaj juchacunata apangapaj shuj cutinlla huañushcataca mana yachachircacunachu, chaipaj randica Jesús cutin cutin huañuna cashcatami yachachi callarircacuna (Hebreos 9:27, 28). Cunan punllacunapish achca gentecunaca chai panda yachachishcacunatami crishpa catincuna. Por ejemplo, huaquincunaca cada semana o tucui punllacuna iglesiaman rishpaca comunión o eucaristía nishcata japinamanmi rincuna. b Shujtaj religioncunapica Jesús huañushcata yuyarina tandanacuita mana cada punlla rurashpapish, chaipi cajcunamanca Jesús imamanta huañushcataca mana yachachincunachu. Shujtaj religioncunapicarin, “Jesús huañushca cajpipish ¿maitataj Yayitu Diosca ñucanchij juchacunata perdonangayari?” nishpami yachachincuna. Chaimantachari achcacunaca, “¿Jesús huañushcallamantachu Yayitu Diosca ñuca juchacunata perdonanga?” nishpa tapurincuna. Pero ¿Jesusta alli catijcunaca imatataj rurashcacuna?

6. ¿1872 huatapica Bibliamanta yachacujcunaca imatataj yachaj chayarcacuna?

⁶ 1870 huatamantami Charles Russellca shujtajcunahuanpish Bibliamanta ashtahuan estudiai callarircacuna. Paicunaca Jesús imamanta huañushcata, Jesús huañushcata ima shina yuyarina cashcatapishmi yachanata munarcacuna. Chaita estudiashpaca 1872 huatapimi Jesús tucuicunapaj juchacunamanta huañushcata intindircacuna. Chaita yachaj chayashpaca shujtajcunapish yachachunmi, imata yachashcata librocunapi, periodicocunapi, revistacunapipish churarcacuna. Qꞌuipacarin apostolcuna rurashca shinallatajmi, cada huatapi shuj cutinlla Jesús huañushcata yuyarina tandanacuita rurai callarircacuna.

7. ¿Achca huatacuna huashaman huauqui panicuna Bibliata estudiashcamantaca ima shinataj beneficiarishcanchij?

⁷ ¿Chai huauqui panicuna Bibliata alli estudiashcamantaca ima shinataj beneficiarishcanchij? Jehová Diosca paicunapaj esfuerzocunataca achcatami bendiciarca. Chaimantami ñucanchijpish Jesús imamanta huañushcata, Jesús huañushcamanta achca bendicioncunata  charigrishcatapish alli intindishcanchij (1 Juan 2:1, 2). Shinallataj Jehová Dios jahua pachapi causachun ashacunallata agllashcatami yachashcanchij. Cutin achca millón gentecunata paraíso Allpapi causachun bendiciagrishcatapishmi yachashcanchij. Jehová Dios ñucanchijta achcata cꞌuyashcamanta imata rurashcata yuyarishpa, Jesuspaj sacrificiopish ñucanchijta ima shina ayudashcata yuyarishpaca, Jehová Diospajmanmi ashtahuan cꞌuchuyashun (1 Pedro 3:18; 1 Juan 4:9). Chaimantami achca huatacuna huashaman huauqui panicuna rurashca shinallataj, cai tandanacuiman shamuchun shujtajcunatapish invitangapaj esforzarinchij.

8. ¿Diosta sirvijcunaca Jesús huañushcata yuyarina tandanacuiman invitangapajca imallatataj rurashcacuna? (Fotocunamanta parlapai).

⁸ Testigo de Jehovacunaca achca huatacunatami Jesús huañushcata yuyarina tandanacuiman gentecunata invitashcanchij. 1881 huatapica cai revistapica Estados Unidos llajtamanta huauqui panicunataca, Jesús huañushcata yuyarichunmi Allegheny, Pennsylvania llajtapi tiyaj shuj huasiman invitarca. Chai huashaca cada congregacionmi cai tandanacuita rurai callarirca. 1940 huatamanta marzo quillapica cai tandanacuiman risha nijcunata invitachunmi tucui huauqui panicunata mañarcacuna. 1960 huatapica Betelmantami cai tandanacuipaj imprimishca invitacioncunataca por primera vez tucui congregacioncunaman cacharca. Chai punllamantami testigo de Jehovacunaca tucui huatacunapi achca millón gentecunaman cai invitacioncunata cushcanchij. ¿Chashna gentecunata invitangapajca imamantataj achcata esforzarinchij?

9, 10. ¿Jesús huañushcata yuyarina tandanacuimanca picunallatataj invitanchij? (Juan 3:16).

⁹ Jehová Diospish, Jesuspish ñucanchijmanta imata rurashcata yachachunmi gentecunamanca  Jesús huañushcata yuyarina tandanacuiman invitanchij (Juan 3:16-ta liyipai). Gentecuna chai tandanacuiman rishpa Jehová Diosta rijsina munaita charichun, paita sirvina munaitapish charichunmi munanchij. Pero ñucanchijca shujtajcunatapish invitangapajmi esforzarinchij.

¹⁰ Ñucanchijca Jehová Diosmanta caruyashcacunatapishmi cai tandanacuiman invitanchij. Paicunaca chai tandanacuiman rishpaca Jehová Dios paicunata cꞌuyashpa catishcata, Jehová Diosta sirvishpa cushilla causajcuna cashcatapishmi yuyaringacuna. Chaimantami paicuna chai tandanacuiman rijpica achcata cushiyarinchij. Pani Monicapaj ejemplopi yuyashunchij. c Paica COVID-19 tiyai horasmi cutin huillai callarirca. 2021 huatapaj Jesús huañushcata yuyarina tandanacuiman rishpacarin paica: “Cai tandanacuica ñucapajca dimastij valishcami cashca. 20 huatacuna qꞌuipami punta cutin shujtaj gentecunaman cutin tigra huillai callarishcani. Jesús huañushcata yuyarina tandanacuimanpishmi invitai tucushcani. Jehová Diospish, Jesuspish ñucamanta ima rurashcata agradicingapajmi caitaca tucui shunguhuan rurarcani” ninmi (Salmo 103:1-4). Gentecuna ñucanchij invitacionta chasquijpipish o mana chasquijpipish tucui pudishcatami ruranchij. Jehová Dios tucui ñucanchij esfuerzota valorashcatami yachanchij.

11. ¿Gentecunata invitashcamantaca Jehová Diosca ima shinataj bendiciashca? (Ageo 2:7).

¹¹ Jesús huañushcata yuyarina tandanacuiman invitashcamantami Jehová Diosca achcata bendiciashca. Por ejemplo, 2021 huatapica COVID-19 ungüi tiyajpipish 21.367.603 gentecunami tandanacurcanchij. Chaipica muyundij Allpapi tiyaj tucui Testigocunata shuj cutinhuan yallimi tandanacurcanchij. Jesús huañushcata yuyaringapajca mana nunca chashna achca gentecuna tandanacushcachu carcanchij. Jehová Diosca chashna achca gentecuna tandanacushcata ricushpaca achcatami cushiyarishcanga. Paica chai tandanacuiman rishca cada unomantami achcata preocuparin (Lucas 15:7; 1 Timoteo 2:3, 4). Gentecunata chai tandanacuiman invitacujpica Jehová Diosca alli shungu gentecunata tarichunmi ayudan (Ageo 2:7-ta liyipai).

12. ¿Ima jarcaicuna tiyajpitaj Jesús huañushcata yuyarina tandanacuita ruranaca sinchi canga? (Fotomanta parlapai).

¹² Jesusca cai tucuri punllacunapi chꞌican chꞌican llaquicuna tiyanata, familiapish jarcaicunata churanata, contracuna catirashpa llaquichinata, guerracunapish, ungüicunapish tiyanatami huillarca (Mateo 10:36; Marcos 13:9; Lucas 21:10, 11). Cai tucui llaquicunata chari horasca Jesús huañushcata yuyarina tandanacuita ruranaca sinchimi can. Pero ¿achca huauqui panicunaca chashna jarcaicunata charishpapish imatataj rurashcacuna? ¿Jehová Diospish paicunataca ima layataj ayudashca?

13. ¿Huauqui Artem, Jesús huañushcata yuyarina tandanacuita carcelpi rurashcamantaca Jehová Diosca ima shinataj bendiciarca?

¹³ Carcelpi cai horasmi Jesús huañushcata yuyarina tandanacuita ruranaca sinchi can. Achca huauqui panicunaca carcelpi cashpapish cai tandanacuita rurangapajmi esforzarishcacuna. Huauqui Artempaj ejemplopi yuyashunchij. Paica 2020 huatapajca carcelpimi carca. Chai carcelpica 17 metros cuadradosta charij shuj cuartopimi prezu carca. Chai cuartopica hasta cinco prezucunatami churajcuna carca. Chashnapish huauqui Artemca Jesús huañushcata yuyaringapajmi huaquin cosascunata japi tucurca. Conferenciata cungapajpishmi allichirishca carca. Pero paihuan caj shujtaj prezucunaca tucui punllami fumajcuna carca, mana allicunatapish rimashpami pasajcuna carca.  Chaipimi huauqui Artemca, “shuj horallatapish fumanata saquipaichij, mana alli shimicunata rimanatapish saquipaichij” nishpa rogarca. Chaimi paipaj compañerocunaca “ari” nircacuna. Paicuna ari nijpimi huauqui Artemca Jesús huañushcata yuyarina imamanta importante cashcata yachachisha nirca. Paipaj compañerocunaca callaripi mana yachasha nishpapish tandanacuita charishca huashaca ashtahuanmi yachasha nircacuna.

14. ¿COVID-19 tiyai horasca Jesús huañushcata yuyaringapajca huauqui panicunaca imatataj rurarcacuna?

¹⁴ COVID-19 ungüi tiyai horasmi Jesús huañushcata yuyarinaca sinchi carca. COVID-19 ungüi tiyashcamantami Diosta sirvijcunaca presencialmente chai tandanacuimanca mana ri tucurcacuna. d Chashnapish achca huauqui panicunaca internetta charishcamantami videoconferenciacunapi tandanacurcacuna. Shinapish ¿internetta mana charij achca millón huauqui panicunaca imatataj rurarcacuna? Huaquin llajtacunapica chai tandanacuipaj conferenciataca televisionpi o radiopimi charircacuna. Huaquin sucursalcunapipish chai tandanacuipaj conferenciataca 500 yalli shimicunapimi grabarcacuna. Chai grabashca discursocunataca carupi caj congregacioncunamanmi cacharcacuna.

15. ¿Bibliamanta yachacuj Suemantaca imatataj yachanchij?

 ¹⁵ Achcacunapajca familiacuna jarcaita churashcamantami Jesús huañushcata yuyarina tandanacuita ruranaca sinchi can. Por ejemplo, Bibliata yachacuj Sue shuti huarmimanta yachashun. 2021 huatapica Jesús huañushcata yuyarina tandanacuipaj shuj punlla illajpimi Sueca paipaj yachachijmanca, “ñuca familia jarcaita churashcamantami Jesusta yuyarina tandanacuitaca mana uyai tucusha” nishpami huillarca. Chaimi paipaj yachachijca Lucas 22:44-ta liyirca. Paipaj yachachijca: “Ima problemata charijpica Jesuspaj ejemplota catina, tucui shunguhuan Yayitu Diosta mañanami ayudanga” nircami. Chashna nishcamantami catij punllataca Sueca tandatapish, vinotapish tucui allichirca. Qꞌuipacarin chai punllapaj agllashca versomanta shuj conferenciatami jw.org paginapi ricui tucurca. Asha horascuna huashaca paipaj cuartopi huichcarishpami Jesús huañushcata yuyarina tandanacuita telefonopi tucuita uyarca. Chaimi paipaj yachachijmanca: “Cainaca achcatami animarcangui. Chaimi chai tandanacuita uyangapajca tucui pudishcata rurarcani. Yayitu Diosmi ñucataca ayudarca. Chaimantami dimastij cushilla sintirini. Cantapish achcatami agradicini” nishpami quillcarca. Canpish chashna laya jarcaicunata charishpaca, Yayitu Dios canta ayudanapimi tucui shunguhuan crina cangui.

16. ¿Jesús huañushcata yuyarina tandanacuiman rishpaca imamantataj Jehová Dios bendicianataca seguros canchij? (Romanos 8:31, 32).

¹⁶ Ñucanchijcunaca Yayitu Dios ñucanchijmanta tucuita rurashcamantami agradecidos canchij. Chaimanta Jesús huañushcata yuyarina tandanacuipaj tiempopipish Yayitu Diospajca ashtahuan rurashunchij. Chai tandanacuita ama pirdingapajpish tucui pudishcata rurashunchij (Romanos 8:31, 32-ta liyipai). Chaita rurajpica Yayitu Diosca ñucanchijtami achcata bendicianga.