Testigo de Jehová tucungapaj bautizarishca qꞌuipa huillanata saquijpi, congregacionhuan ña mana tandanacujpica paicunamanta mana caruyanchijchu. Ashtahuanpish espiritualmente sinchi tucushpa cutin Diospaj organizacionman tigrachunmi ayudanchij.

 Shuj testigo de Jehová bautizarishca qꞌuipa jatun juchata rurajpimi congregacionmantaca llujshichincuna. Shinapish caitaca mana llujshichina cashcallamanta congregacionmantaca llujchincunachu. Ashtahuanpish jatun juchata ruraj Diospaj mandashcacunata mana cazushpa juchata rurashpa catijpi, mana arrepintirijpimi congregacionmantaca llujchincuna. Congregacionpi caj huauqui panicunapish juchata rurajhuanca ña mana apanacunachu can. Bibliapica achijtami cashna nin: “Cancunapurapi caj millaita rurajtaca, llujshichichij” (1 Corintios 5:13).

 ¿Shuj huauquita congregacionmanta llujchijpi paipaj huarmi, paipaj huahuacuna, testigo de Jehová cashpa catijpica imataj tucun? Diostaca ña mana tandalla sirvishpa cati tucuncunachu. Shinapish paipaj huarmihuan, paipaj huahuacunahuan cꞌuyaita ricuchinata, apanacunataca mana saquincunachu.

 Congregacionmanta llujchishcacunaca ñucanchij tandanacuicunaman shamui tucuncunami. Shinallataj paicuna munashpaca ancianocunapaj ayudatapish chasqui tucuncunami. Chashnami paicunaca testigo de Jehová cutin cangapaj imallata rurana cashcata yachangacuna. Congregacionmanta llujchishcacuna jatun juchata ruranata saquijpi, Bibliapi mandashca shina causai callarijpica cutinllatajmi congregacionman tigrai tucuncuna.