Testigo de Jehovacunaca diezmota mana paganachu canchij. Pero Diospaj organización ñaupajman catichunca shungumanta cullquita cushpami ayudanchij. Shinaca ¿diezmota cuna costumbreca ima shinataj tiyai callarirca? Testigo de Jehovacunaca ¿imamantataj chai costumbreta mana catinchij?

 Moisesman cushca leypimi israelitacunataca sacerdotecunaman diezmota cuchun mandarca. Chaica charishca cosascunamanta chungamanta shujta cunami carca. Bibliaca Jesusta catijcunaca Moisesman cushca leytaca ña mana catina cashcatami yachachin. Chaimantami diezmota cuna mandashcatapish ña mana catinchij (Hebreos 7:5,18; Colosenses 2:13,14).

 Diezmota o shujtaj cosascunata cunapaj randica testigo de Jehovacunaca punta Jesusta catijcuna shinallatajmi ruranchij. Paicunaca shungumanta cullquita cushpa, gentecunaman Diosmanta yachachishpami ayudarcacuna.

 ¿Imamantataj chashna ruranchij? Bibliapica cashnami nin: “Tucuicuna quiquin shungupi yuyarishca shina cuichij. Ama llaquirishpa, ama cuichij nishcallamanta cuichijchu. Cushicushpa cujtamari, Diosca cˈuyan” (2 Corintios 9:7).