Ari. Tata Yaya preocupacun fieles siervusninraycu onckosckas tiasckancuta. Paycunata Biblia prometepucun: «Jehová yanápaj ’rin onckosckasta camapi tiaptin» (Salmos 41:3). Caypi tían quimsa imastis ’ruayta atisckayshta, apispa suj ónckoy mana ampiyníyoj:

1.   Mañanáysh tían Tata Yayayshta fuersas aguantanáyshpaj. «Tata Yáyap pasnin ima astaan atun can túcuy pensamientusmanta», yanapáaj ’ríysh y ckóaj ’ríysh fuersas precisasckayshta seguináyshpaj ñauckeman mana preocupacus (Filipenses 4:6, 7).

2.   Suj alli actitur apiyta. Bibliapi nin: «Apispa suj soncko cusiscka, chay can suj alli remediuta, pero pi llaquiscka tían mana fuersáyoj can» (Proverbios 17:22, Dios habla hoy [Versión Popular]). Ancha ashcát asicuyta ’ruan llaquisckas mana tianayshta y alli salur ckoáysh.

3.   Esperansát sinchiyachiyta. Esperansát yanapaáysh cusisckas canáyshpaj usuptíysh huaquin onckoycuna (Romanos 12:12). Biblia niáysh punchau cháyaj ’risckanta ni pipas nencka: «onckoscka tiani» (Isaías 33:24). Tata Yaya sórckoj ’rin túcuy onckoycunasta ima ckaris mana sorckoyta aterancu. Paypas allimanta ’rúaj ’rin picunas moroyasckas cancu mositus ina cayta chayanancuta, chayraycu Biblia nin: «Aichan astaan mósoj ’ruacuchun, cutis voliacuchun áicap mositu ina cara» (Job 33:25).

 Astaan yacháypaj: Jehóvap testigusnin confiaycu Tata Yáyap yanapayninpi, pero onckoptiycu mascaycu yanapa medicusmanta (Marcos 2:17). Pero ni pipasta nipuycu mascananta suj tratamientu medicu, pues sapa suj ajllanan tían mayman ’riyta ampiscka canánpaj.