¿CHECKÁT ima saanpi? Huaquin astaan importantét tapunasmantá, ima humanuscka ʼruacorancu. Ckam quiquin huaquin cuti cayta tapucoranqui:

• ¿Yaya nockaychpi interesacunchu?

• Suj punchau, ¿guerrascka y usunát tucuconckancuchu?

• Huañuptíych, ¿imát sucedeáych?

• Huañusckáspaj, ¿ima esperansát tian?

• Yaya uyarianáychpaj, ¿imaina oranáych tian?

• Felicidarta, ¿imaina tarina?

Ckam, ¿maypi cay tapunasman respuestasta mascanquiman? Ancha ashca ashca libruscka tian, maypi afirmacun respuestasta ckoyta. Pero, ashca contradecicuncu. Sujcuna respuestasta ckoncu ima chayllapi ciertóyoj ʼrijchacuncu, pero mana tardancuchu anticuascka cutiyta y allichascka cayta o sujcunaan reemplasasckas.

Pero, suj librút tian, maypi ciertóyoj y confiáypaj respuestasta apin. Jesucristo oraciunpi Yayát nera: «ʼRimayqui checkát can» (Juan 17:17). Cunan chay ʼRimaycka Santa Biblia ina ʼrejsicun. Imát seguipun, suj utula resumen can, súmaj unanchascka y confiáypaj respuestasta ima Bibliát ckon, chay tapunasman cháyraj nisckas.

¿ÍMAJ CAY TAPUNA ʼRUACUN? Suj mundupi unta injusticiasmanta y crueldarmanta causáych. Ashca religionescka yachachincu, ima usunát ima padecéych Diuspa munaynin can.

IMÁT BIBLIA YACHACHIN. Yaya ni aícap sajrát ʼruan. Job 34:10 nin. «¡Caru verdaderu Diusmanta cachun, sajrát ʼruayta, y Túcuy Atiyniojmanta injusticiát ʼruayta!». Yaya, munayninpi, humanúspaj suj ancha súmaj propositút apin, chayraycu, Jesús oraciunpi mañacuyta yachachiáych: «Tatáych ima cieluspi tianqui [...]. Reinuyqui amuchun. Munayniyquít ʼruacuchun, quiquin cielupi, ashpa saanpipas» (Mateo 6:9, 10). Ciertót can, ima Yaya nockaychraycu ancha ashcát interesacun, ima suj ancha atun sacrificiút ʼruara, munasckanta ʼruacunánpaj (Juan 3:16).

Caytapas ckáay Génesis 1:26-28; Santiago 1:13; 1 Pedro 5:6, 7.

¿ÍMAJ CAY TAPUNA ʼRUACUN? Guerrapi ancha ashca persunascka huañuspa seguincu. Y tucoycka suj o suj rasonraycu usúych.

IMÁT BIBLIA YACHACHIN. Yaya túcuy Ashpapi pas apamuyta prometera. Celestial Reinunpi —o gobiernu—, persunascka na mana «astaanchu guerrát apréndej ʼrincu», y «espadasnincút araupa quiruncunapi» tranfórmaj ʼrincu (Isaías 2:4). Astaan, Yaya injusticiát y usunát túcoj ʼrin. Humanusmanta, Biblia cayta nin: «[Yaya] ñahuisnincumanta túcuy hueckét pichancka, y huañoycka mana aícap canckachu, na mana ni aicappas nanayta ni nanaymanta ckapariyta cancka. Ñaúpaj cosasta [chaycunaspi injusticiasta y usunát] crusarancu» (Revelación [Apocalipsis] 21:3, 4).

Caytapas ckáay Salmo 37:10, 11; 46:9; Miqueas 4:1-4.

¿ÍMAJ CAY TAPUNA ʼRUACUN? Yacka túcuy religionescka yachachincu, huañuspá imallapas persúnap ucunpi causaspa seguin. Sujcuna nincu, huañojcunacka causayníoj cajcunát mana allít ʼruayta atincu, o Yaya mana allis cajcunát túcuy tiempúpaj condenacus y usuchicus infiernupi castigan.

IMÁT BIBLIA YACHACHIN. Huañuptíych causayta sackéych. Eclesiastés 9:5 nin ima «huañusckas [...] mana imapáspaj concienciáyoj cancu». Mana yachayta atincuchu, sentiyta, ni imátaj ʼruayta, chayraycu mana causajcunát perjudicayta atincuchu, ni ima maneramanta paycunát yanapacuyta (Salmo 146:3, 4).

Caytapas ckáay Génesis 3:19; Eclesiastés 9:6, 10.

¿ÍMAJ CAY TAPUNA ʼRUACUN? Túcuy causayta munáych y munascka persunashuan cusca causaymanta disfrutanaaychta. Chayraycu natural can, deseanaychta munascka huañusckasniychta cutis ckaacuyta.

IMÁT BIBLIA YACHACHIN. Yacka túcuy persunascka ima huañorancu causayta voliácoj ʼrincu. Ari á, Jesuscka prometera ima «yuyaricúypaj sepulturaspi tiajcunát, ʼrimasckanta uyarenckancu y llojsenckancu» (Juan 5:28, 29). Persunascka ima cay Ashpapi causarenckancu, chaypi causanancunápaj oportunidadta ápej ʼrincu y suj paraisupi ʼruascka ckaapuyta, quiquin Yaya ckallarisckanmantapacha ʼruayta munara (Lucas 23:43). Cierto can, chay súmaj ámoj pachapi, humanuscka ima Yayaman fieles canckancu, únay causayta y ancha súmaj salurta apinancumantát cusiconckancu. Bibliacka nin: «Justoslla ashpát apenckancu, y chaypi túcuy tiempúpaj causanckancu» (Salmo 37:29).

Caytapas ckáay Job 14:14, 15; Lucas 7:11-17; Hechos 24:15.

¿ÍMAJ CAY TAPUNA ʼRUACUN? Yacka túcuy religionespi, persunascka mañancu. Pero, ashca pensancu mañasckasninta mana uyariscka cancu.

IMÁT BIBLIA YACHACHIN. Jesuscka yachachera, ima oraciunesniychpi, mana quiquin ʼrimasckasta nináych tian. Cayta nera: «Oraspa, mana quiquin cosasta suj y suj cutis ninayqui tian» (Mateo 6:7). Si Yaya uyarianaychta munáych, oranáych tian, maneramanta imaina pay munan chayna. Cháypaj, yachanáych tian mayckan paypa munaynin can y chay quiquinta orapuyta. «Mana importaspa imát mañasckaychta cachun, quiquin munayninta cas, pay uyariáych», 1 Juan 5:14 aseguraáych.

Caytapas ckáay Salmo 65:2; Juan 14:6, 14; 1 Juan 3:22.

¿ÍMAJ CAY TAPUNA ʼRUACUN? Creespa ima ckoshckét, túcuy laupi ʼrejsiscka cayta o súmaj ckaacuyta felicidarta apampuconcka, ashca persunascka huasanpi chay cosasmanta ʼrincu. Pero, mana cusiscka cayta atincuchu.

IMÁT BIBLIA YACHACHIN. Jesús yachachera mayckan cusimanta clavecka can, aícap nera: «Cusiscka cancu, picuna espiritual necesidadnincumanta concienciáyoj cancu» (Mateo 5:3). Si trancosta ckóych máyur necesidadniychta satisfacéypaj: chaquiscka Yayamanta ciertút yachanaáychta y nockáychpaj munasckanmanta, solo chayna cusiscka casunchis. Chay ciertút Bibliapi taricun y chayta ʼrejsiyta, yachayta yanapaáych, imatami importantét can, imatapas mana importantét can. Aícap decisiunesniychpi y ʼruanasniychpi guiát ckoanaychta Bibliát sackéych, causaycka astaan sentidút apin (Lucas 11:28).

Caytapas ckáay Proverbios 3:5, 6, 13-18; 1 Timoteo 6:9, 10.

 Utulallát ckaaraycu, respuestát ima Biblia shojta tapunát ckon. ¿Astaan yachayta munanquichu? Si ckam espiritual necesidadniyquimanta concienciáyoj canqui, maa dudaspa astaan yachayta munanqui. Tapucunquichá si Yaya nockaychraycu sumajta interesacun, imaraycu ashca sajrát y usunát sackera, o imaina familiamanta causayniyquita allichayta. Biblia cay y suj tapunasta ancha sumajta contestan.

Ashca persunascka, maa consultayta munancu. Suj librút ashca paginasníoj ckaapuncu y mana allít unancháypaj. Bibliapi respuestasta taríypaj, ¿yanapát apiyta munanquimanchu? Chayta ruáypaj, Jehóvap testigosnin, utilisanayquípaj íshcay instrumentusta churancu.

Huámaj can folletút Diusta uyáriy y unáypaj causanqui, persunasta yanapáypaj ʼruascka —astaan ocupadusniójpaj— importantét tapusman Biblíap respuestasninta ʼrejsinancunápaj. Huámaj huasan suj cursót can, huasispi y gratis. Maa comprometes, suj Jehóvap testigon capacitascka Biblia yachachíypaj, ganasnioj huasiyquiman ʼrencka, o maypi ckam munanqui, sapa semanát Bibliát unancháypaj, suj utula tiempót dedicancka. Ashca persunas cay cursusmanta beneficiacorancu y sonckomanta nerancu, ima cayan ciertút tarerancu.

Comprobayta atinqui, ima valorcka checkát Bibliamanta, ni imaan igualacun. Ckeshpichiáych supersticiunesmanta, confusiunmanta y manchaymanta ima huaquin creencias ckoncu y suyaymanta y cusiymanta causayniniychta untachin. Jesús nera: «Checkát ʼrejsenckancu, y checkát ckeshpichisonckachis» (Juan 8:32).