Diuspa yanasun cayta astaan súmaj can, ima sucedesuyquita atin. Diuscka yachachisoncka imaina seguridadta y cusi cayta tariyta; ashca pantascka creenciasmanta ckeshpichisoncka y costumbresmanta imát dañút ʼruancu. Mañapusckayquita uyarencka. Sonckoyquipi pascka ckosoncka y ckamllapi confiansata apinayquita (Salmo 71:5; 73:28). Aícap sinchi momentusta crúsaj ʼrinqui, Diuscka yanapasoncka (Salmo 18:18). Astaan, Diuscka únay causayta regalu inát ofrecesun (Romanos 6:23).

Aícap Diusman ckayllanchacúych, Diuspa yanasusninman ckayllanchacúych. Diuspa yanasusnin, ckámpaj yanasus cayta chayanckancupas. Ari á, turasniyqui ina ckámpaj canckancu. Paycuna Diusmanta yachachicushcancumanta cusiconckancu, animasonckancu y yanapasonckancu.

Mana quiquin Diuscka caycuchu. Diuspa amistadninta mascaspá, importantét imata unanchanáych tian: mana quiquin can, Diusan amistadta apiyta, ima humanusan amistadta apiyta. Paycka nockaychmanta astaan huatasníoj can, y atiyníoj y ancha astaan yachayníoj can. Paylla Gobernajníych cáypaj derechút apin. Chayraycu, si paypa yanasusnin cayta munáych, uyaripunáych tian, y ʼruayta imát pay mañaáych. Túcuy tiempót Diusta casucuyta, allinníychpaj cancka (Isaías 48:18).