Aícap suj yanasu apíych piman atenciunhuan ckaaycu y respetaycu, quiquin pay cayta trataycu. Biblia nin: “Jehová allít y checkát can” (Salmo 25:8). Diuspa yanasus cáypaj, allít y checkát persunascka canáych tian. Biblia nin: “Yachapíaj Diusmanta ʼruacuychis, munascka huaas ina, y munaypi purispa seguiychis” (Efesios 5:1, 2). Cay suj ejempluslla cancu, Jehovát yachapiayta atináychpaj:

Sujcunát yanapaspa. “Tucúypaj alli casckanta ʼruáych” (Gálatas 6:10).

Alli llamcajcuna caspa. “Pi suan, na mana astaanchu suanan tian, manapecka, astaan, sinchi llamcayta ʼruachun, alli llámcay cajta maquisninhuan ʼruaspa” (Efesios 4:28).

Cuerpupi y moralpi limpiu caspá. “Túcuy mapachaycunamanta, aichamanta y espiritumanta limpiacúych, Diuspa manchayninpi, santidadta sumajta allichaspa” (2 Corintios 7:1).

 Aillusniychta respetuan y munayhuan trataspa. “Sapa suj ckamcunamanta [...] huarminta munachun, imaina pay quiquin munacun; quiquin, huarmecka ckosanman ancha súmaj respetút apinan tian. Huaas, tatayquichisman casúcoj caychis” (Efesios 5:33–6:1).

Sujcunát munaspa. “Sujan sujan munacuspa seguíych, imayraycu munaycka, Diusmanta can” (1 Juan 4:7).

Paispa leyesninta casucuspa. “Túcuy almacka [gobiernút] casucunan tian [...]. Tucuyta ckoychis imát ckockopucunan tian: pi impuestút mañan, impuestút” (Romanos 13:1, 7).