Paraisocka mana cunan mundu ina canckachu. Diuscka, cay mundu unta problemasníoj y ancha nanaycunát tiasckanta, ni aícap munara. Ámoj tiempupi, Diuscka Ashpamanta suj paraisút ʼruancka. ¿Imaina cancka? Ckaáych imát Biblia nin.

Alli persunascka. Paraisocka, Diuspa yanasusninmanta huasin cancka. Caycuna, alli cosasta sujcunápaj ʼruanckancu y Jehóvap checka huellanpi causanckancu, pay munasckan ina (Proverbios 2:21).

Ancha ashca micuna. Paraisupi, mana pipas yarckayta tiancka. Biblia nin: “Ashpapi ashcát granumanta [o micuna] caj ʼrin” (Salmo 72:16).

Alli huasis y súmaj llámcay. Paradisíaca Ashpapi, túcuy familiascka paycunallápaj huasincút apenckancu, y túcuy causajcuna, cusichicúypaj llamcayta apenckancu (Isaías 65:21-23).

 Pascka túcuy mundupi. Gentecka, ni aicappas mackanaconcka ni guerrapi huañoncka. Diuspa Palabran nin: “[Diuscka] guerrasta tucuchin” (Salmo 46:8, 9).

Alli saludcka. Biblia nin: “Ni suj causajcunamanta [Paraisumanta] nencka: ‘Onckoscka tiani’” (Isaías 33:24). Ni upas, mana ʼrimaj atejcuna, mana ckáaj atejcuna ni rengos canckachu (Isaías 35:5, 6).

Mana huañuyta ni nanayta ni llaquiyta canckachu. Diuspa Palabrancka nin: “Huañoycka mana aícap canckachu, na mana aícap ni nanayta ni ckapariyta canckachu. Ñaúpaj cosasta crusarancu” (Revelación [Apocalipsis] 21:4).

Na mana alli persunascka mana canckachu. Jehová nin: “Uchallicojcuna [mana alli persunascka], ashpamanta cuchuscka canckancu; y upalleroscka caymanta sorckoscka canckancu” (Proverbios 2:22).

Persunascka sujan sujan munaconckancu y respetaconckancu. Mana ni chejniyta ni illucuynát ni sinchi tratút ni injusticiát canckachu. Persunascka sujllayascka canckancu y Diuspa checka huellanpi causanckancu, pay munasckan ina (Isaías 26:9).