Satanás y supaycunacka, Diusman siruinaych ta mana munancuchu. Aica persunasman atincu, Diusmanta carunchachipucuyta tratancu. ¿Imaina? Suj manerát ʼruapúypaj, llulla religiunhuan can (2 Corintios 11:13-15). Suj religioncka llulla can, si Biblíap checkanta mana yachachin. Llulla religioncka, llulla caj ckoshckét ina can: checkaan llijchacuyta atin, pero mana ni imát valeyta. Astaan, ashca problemasta apamuaychta atin.

Jehová checkamanta Diuscka casckanraycu, religiosa llullasta mana cusichipuyta atincuchu. Aícap Jesús Asphpapi tiara, cháckay tiempumanta pusajcuna religiunesmanta payta huañuchipuyta munarancu. Caycuna imaina adorarancu, allít casckanta pensarancu. Nerancu: “Suj Tatalla apiycu, Diuscka”. Pero ¿Jesuscka quiquinta pensarachu? Mana. Pay contestapucora: “Ckamcuna Supaycka tatayquichismanta amunquichis” (Juan 8:41, 44). Cunan punchau, ashca persunascka creencu ima Diusman adorashcancu, pero, checkát, Satanasta y supaycunát siruishcancu (1 Corintios 10:20).

 Quiquin suj poshckoscka tacko mana alli frutusta ckon, llulla religioncka, persunasta mana alli imasta ʼruachincu. Gentecka mana alli imasta ʼruasckancuraycu, cay mundocka unta problesmasníoj can. Mapa cajta, mackanacuycunát, suaycunát, soncko ñitichiycunát, huañuchiycunát y violaciunesta can. Ashca persunascka ima cay cosasta ʼruancu, suj religiunta apincu, pero cá religioncka, mana paycunát alli cajta ʼruayta cuyuchin. Si mana, mana alli imasta ʼruayta sackencuchu, mana Diuspa yanasusnin cayta atincuchu (Mateo 7:17, 18).

Llulla religioncka, imagenesta mañacuyta gentét yachachin. Diuscka niáych mana imagenesta mañanáych tian. Caycka súmaj can. Si pipas ni aícap no ckaycuan ʼrimayta munara, pero, fotografiaycuan ʼriman, ¿chayta munaaychman? Chay persunacka, ¿yanasúych cayta atin? Mana, mana atin. Jehová persunascka payhuan ʼrimanancuta munan, mana suj estatuamanchu ni suj mana causayníoj estampamanchu (Éxodo 20:4, 5).

Llulla religioncka yachachin, ima guerra tiempupi sujcunát huañuchiyta atincu. Jesús nera ima Diuspa yanasusnin sujan sujan munacuncuman. Persunasta ima munáych mana huañuchíych (Juan 13:35). Ni alli can, piña gentét huañuchinaychta. Aícap Jesuspa enemigusnin arrestayta ʼrerancu, paycka discipulusninta payraycu peleanancút mana sackerachu (Mateo 26:51, 52).

Llulla religiun yachachin, ima mana alli persunascka infiernupi sufrenckancu. Manapé, Biblia yachachin, ima uchacka huañuyman pusan (Romanos 6:23). Jehová suj Dios munaymanta can. Suj munácoj Diuscka, ¿genteman túcuy tiempúpaj torturayta atinmanchu? Manami. Paraisupi suj religiunlla cancka, religioncka ima Jehová allít ckaan (Revelación 15:4). Túcuy suj religiunescka ima Satanaspa llullanta yachachincu, chincachiscka canckancu.