Bibliát leespa Jehovát ʼrejsiyta atíych. Ashca tiempu ñaupajpi, Diuscka paypa ideasninta escribinancunápaj huaquin ckarista ajllara. Chá escriturascka Biblia ina ʼrejsicuncu. Cunan Bibliát leespa Diusta ʼrejsiyta atíych. Caypi Jehóvap nisckanta apin, o huillasckanta, chayraycu Diuspa Palabran ina ʼrejsicun. Biblíap nisckanpi creeyta atíych, ímaj Jehová ni aícap llullan. “Diuscka llullananta, mana átej can” (Hebreos 6:18). Ari á, Diuspa Palabrancka checkát apin (Juan 17:17).

Diusmanta ashca valurníoj regalusta aperáych, suj caycunamanta Bibliát can. Carta ina can, imaina munácoj tata huahuasninta escriben. Niáych imát Diuscka prometen, ima Ashpamanta suj ancha súmaj lugarta maypi causayta ʼruancka, o suj paraisút. Niáych imaina Diuscka ñaupajpi ʼruara, imaina cunan ʼruashcan, imátaj checka caj huahuasnínpaj ámoj tiempupi ʼruancka. Problemasniychta allichayta y cusít taripaytapas yanapaáych (2 Timoteo 3:16, 17).

 Jehóvap testigosnin Diuspa yanasusnin cancu; paycuna imát Biblia yachachin unanchayta yanapasonckancu. Biblia yachayta munani nipucunallayqui tian. Yachachisunayquípaj mana ckoscketa mañásoj ʼrincu (Mateo 10:8). Nátaj, cristiana tantacuycunaman ʼriyta atinqui. Caycunacka, adoráypaj lugarpi ʼruacuncu, Salón Reinumanta huajyacuscka. Tantanacuspá, Diusmanta ligerút y ashcát ʼréjsej ʼrinqui.

Diusta ʼrejsiyta atíych, pensaspa cosaspi ima pay ʼruara. Ejemplút churáypaj, Biblia nin: “Dios cielusta y ashpát ʼruara” (Génesis 1:1). Aícap Jehová “cielusta” ʼruara, Intitapas ʼruara. Caycka, ¿imatátaj Diusmanta yachachiáych? Ima Jehová ancha atiyníoj can. Paylla ʼruayta atera, suj cosata astaan atiyníoj imaina Intít can. Ckaachiaychpas ima Jehová yachayníoj can, Inti ʼruáypaj á, yachayta precisacun, cay Inti ima canchayta y ʼrupayta ckoáych, y ni aícap tucucun.

Jehóvap ʼruasckasnin ckaachiáych, ima pay munaáych. Pénsay, túcuy frutaspi ima Ashpapi taricuncu y tucoycka mana quiquin cancu. Jehová suj laya frutamantalla ckoaraychta atera, o ni suj frutát. Ichacka, ashca laya frutasmanta ckoáych, utulas, atúchaj, muyus y suniyasckas, ashca colurcunamanta y ashca saburcunamanta. Caycka ckaachiáych ima Jehová munaáych y alli soncko, maquin quichariscka y atentu casckantapas (Salmo 104:24).