Sajra cosasta ima Ashpapi crusashcancu, ckaachincu ima Paraisocka ckayllanchacun. Bibliacka ñaúpaj tiempumanta nera ima nockáych ancha sajra tiempusta ckaaycuman, yacka, ñaupajpi Paraísup amusckanmanta. Cunan chay tiempuspi causashcáych. Bibliacka nera, caycuna cancu huaquin cosascka ima crusanancu tiara:

Atun guerras. “Reinu reinu contranpi y naciun naciun contranpi atariconcka” (Mateo 24:7). Cay profeciascka cumplicora. 1914 huatamantapacha íshcay mundial guerrasta cara y ashca suj utula guerrascka. Ancha ancha ashca persunasmanta chaypi huañorancu.

Ashca lugarespi onckoycuna. “Suj y suj lugarpi huanúchej onckoycuna” cancka (Lucas 21:11). ¿Cay señalcka cumplicora? Ari. Cancerta, sonckomanta onckoycunát, soncko yurajmanta onckót, paludismút, sidát y suj onckoycunát ancha ancha ashca persunasman huañucherancu.

Chúsaj micunasmanta. Túcuy mundupi gentét taricun, ima micúypaj utulát apincu. Túcuy huatapi ancha ancha ashca persunascka yarckaymanta huañuncu. Cá suj señalcka can, ima Paraisocka mana únaj caypi tiancka. Biblia nin: “Micunamanta escasescunát cancka” (Marcos 13:8).

 Ancha sinchi ashpa chucucuycuna. “Suj y suj lugarpi ancha sinchi ashpa chucucuycuna [...] cancka” (Mateo 24:7). Caycka, tiempusniychpipas cumplicora. 1914 huatamantapacha ñauckenman, astaan suj millonmanta persunasmanta ancha sinchi ashpa chucucuycunaraycu huañorancu.

Mana alli gentét. Persunascka ‘ckoshcketa munanckancu’ y ‘paycunalla munaconckancu’. ‘Munacojcuna placercunamanta astaan Diusmanta munacojcuna’. Huaas “tatancuman mana casucojcuna” canckancu (2 Timoteo 3:1-5). ¿Mana creenquichu ima cunan punchaupi ashca chay gentemantát taricun? Mana Diusta respetancu y picunaman paymanta yachayta munancu, problemasta ʼruapuncu.

Mana alli ʼruascka. “Ashcayascka mana alli ʼruasckasmantapas” cancka (Mateo 24:12). Ckam quiquinta pensanquichá, ima sajra ʼruasckas cay ckepa huataspi anchát ashcayara. Túcuy partespi gentecka, suajcunamanta y llullacojcunamanta y mana allít ʼruacojcunamanta, manchayhuan purincu.

Cá túcuy imasta ckaachin, ima Diuspa Reinun ckayllanchacun. Biblia nin: “Cay imasta sucedeyta ckaaptiyquichis, yachaychis ima Diuspa reinun ckayllanchacun” (Lucas 21:31). Pero ¿ima Diuspa Reinun can? Diuspa celestial gobiernun can, ima cay Ashpaman suj paraisút ʼruancka. Túcuy humanu gobiernuspa lugarninta apencka (Daniel 2:44).