YACHACHINA 8
¿Picuna Diuspa enemigusnin cancu?
Diuspa huámaj caj enemigun, Súpay Satanás can. Pay suj ángel can, ima Jehóvap contranpi churacora. Satanascka Diuspa contranpi churacuspa purin y humanusta ashca problemasta apamun. Satanás suj mana alli ángel can, llulla y huañúchej (Juan 8:44).
Suj angelescka Diuspa contranpi Satanashuan cuscayacorancu. Bibliapi supaycuna sutichascka cancu. Supaycuna, ima sujcuna duendes ina ʼrejsipuncu, quiquin Satanascka humanuspa enemigusnin cancu. Gentét huajllichis cusicuncu (Mateo 9:32, 33; 12:22). Jehová, Satanasta y supaycunát túcuy tiempúpaj huañuchencka. Humanusta mana allít ʼruanancunápaj utula tiempót cutipucuncu (Revelación 12:12).
Si Diuspa yanasusnin cayta munáych, imát Satanás ʼruachianaychta munan, mana ʼruanáych tian. Satanás y supaycunacka Jehovát chejnincu. Diuspa enemigusnin cancu y nockáych chayta canaycutapas munancu. Chayraycu, ajllanáych tian, piman cusichiyta munaycu: Jehovát o Satanasta. Si unáypaj causayta munáych, Diuspa munayninta ʼruayta ajllanáych tian. Satanascka yachan ashca manerasmanta gentét engañayta y chayta ʼruapúypaj, ashca trampasta churan. Chay maneramanta, ashca persunasta engañayta atin (Revelación 12:9).