Jesucristo Jehóvap Huaan can y pay astaan ckayllayascka yanasun y munascka can. Manáraj Ashpapi ckari ina causas, Jesuscka suj atiyníoj ángel ina anajpi causara (Juan 17:5). Ñauckenpi chaymantá, persunasman Diuspa checkanta yachachíypaj Ashpaman amora (Juan 18:37). Astaan, casucojcunát huañuymanta y uchamanta salvacunancunápaj, causayninta ckora (Romanos 6:23). Jesús cunancka, Diuspa Reinunmanta Rey can, suj celestial gobiernu ima Ashpamanta suj paraisút ʼruancka (Revelación 19:16).

Angelespas Diuspa yanasusnin cancu. Angelescka mana Ashpapi humanus ina causayninta ckallarerancu. Manáraj Diuscka Ashpát ʼruashcaptin, cielopi ʼruascka carancu (Job 38:4-7). Ancha ashca ashca angelescka cancu (Daniel 7:10). Cay celestiales yanasus Diusmanta, persunascka Jehóvap checkanta yachanancunát munancu (Revelación 14:6, 7).

Diuscka Ashpapipas yanasus apin; paycunát testigosnin huajyapucun. Suj testigocka pi suj tribunalpa ñauckenpi taricun, ima pipasmantát o imamantát yachan, chayta nin. Jehóvap testigosnin sujpersunasta Jehovamanta y Propositunmanta ʼrimancu (Isaías 43:10). Cay Testigoscka, quiquin angelescka, Jehóvap checkanta yachanayquípaj, yanapasuyta munancu. Ckampas Diuspa yanasun canayquita munancu.