Jehová mana sackenckachu ima mana alli gentecka Paraisút huajllichinanta. Paraisupi yanasusninlla causanckancu. ¿Imatátaj mana alli genteman sucedeponcka? Respuestát yacháypaj, checka historiát Noemanta ckaanáych tian. Noecka huasapi ancha ashca huatas causara. Suj alli ckari cara, pi túcuy fuersasninhuan, Jehóvap munayninta túcuy tiempót ʼruayta munara. Pero huaquin Ashpapi causajcunamanta, mana allít portacorancu. Chayraycu, Jehová Noét nipora, suj atun para apámoj ʼrin, ima túcuy mana alli persunasta tucuchencka. Atun Para amoptencka, ni pay ni paypa familiancka mana huñunancunapajchu, suj arcát ʼruanánpaj cachara (Génesis 6: 9-18).

Noé y familiancka arcát ʼruarancu. Noé sujcunát nipucora ima túcuy Ashpapi suj Atun Para ámoj ʼrin, pero mana pipas uyaripora. Astaan astaan mana allít portacorancu. Noé arcát puchucaptin, chaypi túcuy laya animalesta yaycuchera, y cunan, paycka familiantapas yaycorancu. Chaymanta, Jehová atun parát apamora. Taa chunca punchaupi y taa chunca tutapi parara, y Ashpát yacumanta untacora (Génesis 7: 7-12).

 Mana alli persunascka huañorancu, pero Noé familianpas ckeshpicorancu. Jehová túcuy tiempót Atun Paranmanta paycunát huackaichacora y pusacora, suj Ashpaman pichascka túcuy mana allismanta (Génesis 7:22, 23). Bibliacka nin, ima cutis suj tiempót cháyaj ʼrin, maypi Jehová hañuchencka, picunaman mana checka cajta ʼruayta munancuchu. Alli persunascka mana huañuchiscka canckancuchu. Cay Ashpapi suj Paraisu ʼruascka unáypaj causanckancu (2 Pedro 2:5, 6, 9).

Cunan punchau, ashca gentecka mana alli imasta ʼruancu. Mundocka unta problemasníoj can. Jehová persunasta advertíypaj ashca cutis Testigosninta cachacun, pero ashca, Jehóvap palabrasninta mana uyariyta munancuchu. Imaina cunan causancu mana sackeyta munancuchu ni Diuscka nipucunanta imát alli can, imát mana alli can. ¿Imatátaj cay persunasta sucedeponcka? ¿Huaquin cutis cambíaj ʼrincu? Ashca persunasmanta mana ni aicappas cambiusta ʼrúaj ʼrincu. Punchau ckayllanchacun, maypi mana alli gentecka túcuy tiempúpaj huañuchiscka cancka (Salmo 92: 7).

Ashpacka mana tucuconckachu; suj paraisút caymanta ʼruaconcka. Picuna Diuspa yanasusnin ʼruaconckancu, cay Ashpapi suj Paraisupi unáypaj causanckancu (Salmo 37:29).