Yanasus ʼruacuyta y chayta mana chincáypaj anchát esforsacunaycu tian. Esfuersuníych Diuspa yanasusnin canáychpaj y amistadninta mana chincáypaj ashca bendiciunesta apamuanckachis. Jesús nera picunaman paypi creerancu: “Checkát ckeshpichiponckachis” (Juan 8:32). ¿Imát niyta munara?

Ckeshpimanta cunan cusicuyta atíych. Llulla yachachisckasmanta ckeshpichiaychta atíych y llullasmanta ima Satanascka túcuy lauman chayachera. Astaanpas, chúsaj suyaymanta ckeshpichiaychta atíych, ima causayninta ancha ancha ashca persunasmanta untachin, persunas ima Jehovaman mana ʼrejsincuchu (Romanos 8:22). Diuspa yanasusnin mana “huañuypa manchayninmanta” esclavus cancu (Hebreos 2:14, 15).

Diuspa mósoj mundunpi ckeshpimanta cusicuyta atisúych. ¡Ima ancha súmaj ckeshpi ámoj pachapi tiasúych! Ashpacka suj paraisút captin, mana guerrasta, onckoycunát ni sajra ʼruanas canckachu. Mana yarcka ni huajchasckas canckachu. Huañuymanta y morckoyaycunamanta ckeshpichicuanckachis, quiquinta manchaymanta, sinchi trataycunamanta y mana checka casckanmanta. Bibliacka Diusmanta nin: “Maquiyquita quicharinqui y túcuy causayniojpa munaynincuta ckonqui” (Salmo 145:16).

 Diuspa yanasusnin unáypaj causanckancu. Unáypaj causayta suj súmaj ckoscka can, ima Diuscka ckoncka picunaman amistadninta mascancu (Romanos 6:23). Utulitát pénsay, ima unáypaj causayta ckámpaj niyta munan.

Ashca imasta ʼruáypaj tiempót apisúych. Munasuychmanchá yachayta suj instrumentút musicamanta huackachiyta, retratusta pintayta, telarcunapi aayta o caspian llamcayta. Plantasmanta o uyuasmanta yachayta munasuychmanchá. O viajayta munasuychmanchá y suj paisesta y gentesninta ʼrejsiyta. Imaina mana tucúcoj causayta apisúych, cay túcuy cosasta ʼruayta atisúych.

Yanasus ʼruacúypaj, ashca tiempót apisúych. Imaina unáypaj causasúych, Diuspa ashca suj yanasusninmantát ʼrejsiyta atisúych. ʼRuayta atisckancuta y allin cajnincuta ʼrejsisúych y paycunamanta yanasusnincupas ʼruacusúych. Munapucusúych y paycuna nockaycuta munaanckancu (1 Corintios 13:8). Imaina mana tucúcoj causayta apisúych, túcuy Ashpa tiacojcunamanta yanasus ʼruacuyta atisúych. Astaan súmaj cancka, Jehovaan amistadniychta tiempuan astaan sinchít ʼruaconcka. ¡Unáypaj Diuspa yanasusnin cáych!