Amistadcka munaypi basacun. Aica astaan Jehovamanta yachanqui, astaan páypaj munayniyqui cancka y deseoyqui siruipúypaj. Caycka Jesucrístop yachachicojnin canayquita yanapasoncka (Mateo 28:19). Si ckam cuscayacunqui, cusiscka familianman Jehóvap testigosninmanta, Diuspa amistadninhuan unayta cusicuyta atinqui. Paycunamanta canayquípaj, ¿imatátaj ʼruanayqui tian?

Leyesninta casucuspa, ckaáchiy ima Diusta munanqui. “Caycka can, imát Diuspa munaynin niyta munan: mandamientusninta casunaychta; y, mandamientusnin mana lásaj cancu” (1 Juan 5:3).

Imát yachaspa ʼrinqui, ʼruanayqui tian. Jesús suj historiát huillara ima cayta sumajta ckaachin. Suj yachayníoj ckari, ʼrumi saanpi huasinta ʼruara, y suj mana yachayníoj ckari, arena saanpi ʼruara. Aica suj atun para amora, chay huasi ʼrumi saanpi ʼruascka, sayascka cutera, pero chay huasi arena saanpi ʼruascka, ashca ruidút ʼruaspa urmacora. ¿Picuna yachayníoj ckari ina cancu, ima ʼrumi saanpi huasinta ʼruara? Jesús nera, persunascka ima paypa yachachisckasninta uyarincu. Astaan, Jesús nera picuna paypa yachachisckasninta uyarincu, pero mana chayta ʼruancuchu, mana yachayníoj ckari ina cancu, ima arena saanpi huasinta ʼruara. ¿Mayckanman cay íshcay ckarimanta, ckam llijchacuyta munanqui? (Mateo 7:24-27).

 Diusman dedicácuy. Chayta ʼruayta atinqui, oraciunpi Jehovát nipuspa, ima túcuy tiempúpaj Munayninta ʼruayta munanqui. Si Diuspa munayninta ʼruáych, Jesucrístop yachachicojnin casckaycuta ckaachíych (Mateo 11:29).

Bautisácuy. “Bautisácuy y uchasniyquita máyllay sutinta invocaspa” (Hechos 22:16).

Untata Diusman síruiy. “Ímaj cachun ʼruashcayquíych, Jehovápaj ina túcuy almaan chaypi llamcaychis, y mana ckaríspaj” (Colosenses 3:23).