Áicap Jehovamanta gentét ʼrimapucuycu, Huaquin cutis nockaycúan piñacuncu o burlacuncu. Caycka, Jehovamanta ʼrimayta sackechiayshta atin. ¿Chay huaquin cutis ckamta crusasorachu?​— Bibliacka suj ckari mosumanta niáysh, ima Jehovát munara, pero yacka Jehovamanta ʼrimayta sackera. Paypa sutin Jeru cara. Paymanta aprendesúysh.

Áicap Jeru suj ckari mosolla cara, Jehová nipora, ima pay gentét nipucunan tiara, mana alli imastistas ʼruayta sackenancúpaj. Caycka Jerúpaj ancha sinchi cara, y sustuscka tiara. Pay Jehovát nipora: ‹Mana yachani imát nísaj. Nocka suj mositulla cani.› Pero Jehová nipora: ‹Ama sustucuychu. Nocka ckamta yanapasúsaj.›

Chaymantá Jeru gentét nipucuyta ckallarera, si paycuna mana alli imastistas  mana ʼruayta sackencu, reprendescka caj ʼrincu. Ckam, ¿creenquichu ima gentecka Jeru nisckanta casucorancu?​— Mana. Huaquin Jerumanta burlacorancu y sujcuna payuan ancha piñacorancu ¡oh!. Astaanpas, ¡huaquin huanchiyta munarancu! ¿Imaina Jeru churacora?, ckam, ¿imát creenqui?​— Pay sustuscka tiara y nera: ‹Mana Jehovamanta astaan ʼrimasajchu.› Pero pay, ¿ʼrimayta sackerachu?​— Mana, mana chayta ʼruarachu. Pay Jehovát ancha munara, chayraycu paymanta ʼrimayta, mana sackeyta atera. Jeru mana ʼrimayta sackesckanraycu, Jehová payta ckeshpichera.

Suj punchau, huaquin mana alli ckaris, Jerút suj suni posuman unta pantanumanta chockarancu. Pay ni micunát ni yacút apera. Chay ckaris, huañunancama Jerút chaypi sackeyta munarancu. ¡Pero Jehóvap yanapanuan, chaymanta payta sorckorancu!

Jérup ejemplunmanta, ¿imát aprendeyta atinqui?​— Caypi ckaaraycu ima huaquin cutis sustuscka tiara, pero Jehovamanta mana ʼrimayta sackerachu. Jehovamanta ʼrimaptiyqui, gentecka ckammanta burlacuyta o piñacuyta atin. Ckam penckacuyta atinqui o sustucuyta. Pero ni aicappas Jehovamanta ʼrimayta sackeychu. Chayna, imaina Jehová Jerút yanapara, pay túcuy punchauspi ckamta yanapasoncka.