YACHACHINA 13
Timu sujcunát yanapayta munara
Timu sujcunát yanapasckanraycu suj cusiscka moso cara. Pay sujcunata yanapáypaj ashca lausman ʼrera. Chayraycu huaquin cutis, paypa causaynin sinchi cara, pero ancha súmaj momentusta crusara. ¿Paymanta uyariyta gustasunmanchu?—
Tímup abuelan y maman Jehovamanta payta ʼrimápoj carancu
Timu Lístrap ciudarninpi uyuacora. Pay suj utulita huaa captinlla, abuelan Loida y maman Euni, Jehovamanta yachachiyta ckallarerancu.
Áicap Timu mosolla cara, Pablocka payuan predicanánpaj, suj lausman ʼríypaj payta mañara. Timu payta nera: «¡Ari!» Pay ʼríypaj y sujcunata yanapáypaj dispuestu tiara.
Timu Pablúan Greciaman ʼrera, suj ciudarman Tesalónica sutichascka. Chayman chayáypaj, paycuna suj suni huellát marchanancu tiara y suj barcupi llockanancu tiara. Áicap chayman chayayta aterancu, paycuna ashca persunasta Jehovamanta aprendeyta yanaparancu. Pero huaquin persunascka, ancha piñacorancu y paycunata huanchicuyta munarancu. Chayraycu Pablu y Timu sujcuna lausman predicáypaj ʼrinancu tiara.
Timu súmaj y sajra causayta apera
Chaymanta huaquin meses ñauckepi, Pablu Timút mañara, Tesalonicaman voliacunanta y ckaayta imaina huauckescka tiarancu. ¡Chá mana alli ciudarman voliacúypaj ashca corajét apinan tiara! Pero, Timu chackaycuna huauckesraycu ancha preocupascka tiara, chayraycu chayman ʼrera. Chaymanta, pay alli noticiasuan voliacora, mayman Pablu tiara. Y ¡huauckesta Tesalonicamanta alli ʼripucushcara!
Timu Pablúan ashca huatasta llamcara. Pablo suj cutis escribera Timu astaan alli persuna casckanta, ima pay, congregacionesta yanapacunánpaj cachayta atera, Jehovát y gentét munasckanraycu, chayta ʼruara.
¿Ckam gentét munanquichu?, y, ¿Jehovamanta aprendeyta paycunata yanapayta munanquichu?— Si chayna ʼruanqui, ckam, Timu ina, suj súmaj y sajra momentusta apiyta atinqui, pero, causayniyqui, ¡ancha cusiscka caj ʼrin!
