Ckoshckét túcuy precisáysh, familiayshta ckóypaj túcuy imastis precisasckancuta (Proverbios 30:8). Astaanpas, ckoshcke tucúypaj siruiáysh (Eclesiastés 7:12). Huaquin cutis mana chaynalla can familiaan ckoshckemanta ’rimayta, pero ama sackeychu ima cay, matrimoniuyquita usuchinanta (Efesios 4:32). Confianayquísh tían ckamcunapura y cuscas decidiyta imapi ckoshcketa gástaj ’rinquísh.

BIBLIA NISCKANTA: «¿Pi ckamcunamanta ima suj torre ’ruayta munan, maachu huamajta tiacus y gastustas sorckon, ckaáypaj si puchucáypaj apin precisasckanta?» (Lucas 14:28). Alli can cuscas decidinayquishta imaina ckoshcketa gástaj ’rinquísh (Amós 3:3). Ckaaychis imát ’rantiyta precisanquísh y aicata gastayta atinquísh (Proverbios 31:16) Si ckoshcketa apinquísh tucuymanta ’rantíypaj, cá mana niyta munan ima tucuyta gastanayquísh tían. Ama endeudacuychis, manapé ckoshcke apisckayquishllata gastanayquísh tían (Proverbios 21:5; 22:7).

IMÁT ’RUAYTA ATINQUI:

• Deudastas pagaracus y túcuy precisasckayquishta ’rantis, y si ckoshcke cutisunquísh, cuscas ’rimaychis imapi gástaj ’rinquísh

• Deudastas apispá, allít ckaanayquísh tían mana ashcata gastáypaj. Por ejemplu mana gastayta imastispi ima mana precisanquísh

BIBLIA NISCKANTA: Alli casckanta ’rúay «manalla Jehóvap ñauckenpi, manapé ckarispa ñauckenpipas» (2 Corintios 8:21). Conyugeyquita ama llullapuychu, nípuy aicát cobranqui y aicát gastanqui.

Conyugeyquian ’rímay manáraj suj atun gastút ’ruas (Proverbios 13:10). Gastusmanta ’rimaychis, chá yanapasunquísh matrimoniupi pas apinayquíshpaj. Cobrasckayqui mana ckampalla can, manapé túcuy familiayquimanta can (1 Timoteo 5:8).

IMÁT ’RUAYTA ATINQUI:

• Conyugeyquian ’rímay aica ckoshcketa sapa suj gastayta atin mana tapunacus

• Ama suyaychu imastis o ckoshcke chusasunanta cháyraj ’rimáypaj