Imaina ckaaranqui cá folletopi, Biblia ashca principiustas apin, ima ckamta y familiayquita yanapapuyta atin. Jehová cusiscka canayquishta munan. Nátaj prometen ima si huámaj lugarpi adoraciunninta churanquísh «túcuy sujcuna imastis yapa ina chásquej ’rinquísh» (Mateo 6:33). Yaya yanasuyqui cayta munan. Chayraycu mayckan cachun oportunidar aprovéchay amistarniyquita payuan huiñachíypaj, cay astaan alli tucuymanta can, ima suj persuna apiyta atin (Mateo 22:37, 38).

BIBLIA NISCKANTA: «‹Nocka ckamcunápaj tata caj ’rini y ckamcuna huaasniy y chinitasniy caj ’rinquísh›, Jehová nin» (2 Corintios 6:18). Yaya suj alli yanasu ckammanta cayta munan, y oracion suj laya payman ckemicúypaj can. Chayraycu Jehová niáysh: «Ama orayta sackeychis» (1 Tesalonicenses 5:17). Pay munan ima preocupacionesniyquita y pensamientosniyquita astaan ucuyquimanta nipunayquita (Filipenses 4:6). Familiayquian oraptiyqui paycuna ckáaj ’rincu ima Jehová ckámpaj suj Yaya causáynioj can.

Manalla Yayaan ’rimanayqui tían manapé uyaripunayqui tían. ¿Imaina ’ruayta atinqui? Bibliát estudias y revistasta, librusta y folletusta ima Bibliapi basascka tiancu (Salmos 1:1, 2). Aprendesckayquimanta allít pénsay (Salmos 77:11, 12). Yayát uyaríypaj ni aicappas tantacunasman chusanayqui tían (Salmos 122:1-4).

Suj laya sinchiyachíypaj amistarniyquita Yayaan can sujcuna personastas paymanta ’rimapucuyta. Áicap astaan paymanta ’rimanqui, astaan ckaylla paymanta tíaj ’rinqui (Mateo 28:19, 20).

IMÁT ’RUAYTA ATINQUI:

• Túcuy punchaus tiempót sórckoy, oráypaj y Bibliát leéypaj

• Familiayquita yanápay, huámaj lugarpi imastis espiritualesta churáypaj y entretenimientosta huasa lugarpi churayta

BIBLIA NISCKANTA: «Yayaman ckemicuychis y pay ckamcunaman ckemícoj ’rin» (Santiago 4:8). Chúray suj punchau y suj hora sapa semana, familiaan Bibliát estudiáypaj (Génesis 18:19). Mana chayllachu can: sapa punchaus Yayát cuentapi ápiy y sinchiyáchiy amistar ima familiayqui payuan apin. Biblia nin: «[Jehovamanta] ’rimapucunayqui tían, ckam huasiyquipi tiacuptiyqui y ckam ñanpi marchaptiyqui y ckam siricuptiyqui y ckam ataricuptiyqui» (Deuteronomio 6:6, 7). Decisionniyqui Jósuep ina cachun, pi nera: «Nocka y huasiycumanta, nockaycu Jehovát siruisajcu» (Josué 24:15).

IMÁT ’RUAYTA ATINQUI:

• ’Rúay suj arreglo Bibliát estudiáypaj sapa semana, según sapa suj familiayquimanta precisan