Jehová munan «lealtarta munanaycuta» (Miqueas 6:8, Biblia de Jerusalén, 2009). Matrimoniopi cá alli can, imaraycu si mana lealtar tían mana confiansa tían. Y confiansa tianan tían chayna múnay huiñanánpaj.

Cunan puchau, lealtar casarasckaspi chincacushcan. Matrimoniuyquít huackaycháypaj, íshcay imastis ’ruayta decidiscka tianayqui tían.

BIBLIA NISCKANTA: «[Aseguracunayquísh tían] astaan alli imastismanta» (Filipenses 1:10). Matrimoniuyqui causayniyquimanta astaan alli canan tían. Túcuy atenciunniyquita ckonayqui tían.

Jehová munan ima ckam conyugeyquillápaj ñahuisniyquita apinayquita y cusca ishcaynin causaymanta cusiscka canayquishta (Eclesiastés 9:9). Pay allít yachachera ima ama aicappas conyugeyquita descuidanayqui tían manapé mascayta imaina cusichiyta (1 Corintios 10:24). Conyugeyqui ckaanan tían ima ckam payta precisanqui y valoranqui.

IMÁT ’RUAYTA ATINQUI:

• Conyugeyquian tiáypaj tiempót máscay y túcuy atenciunniyquita ckoy

• Ishcayniyquishpi pénsay, mana ckamllapi

BIBLIA NISCKANTA: «Pi suj huarmít mana ckaayta sacken ímaj cachun payuan apinaas, na sonckonpi payuan adulteriút cometera» (Mateo 5:28). Si pipas mana pensayta sacken mana alli imastis suj ckarian o suj huarmian apinaas, na conyugenta engañashcan.

Jehová nin sonckoycuta huackaychanaycuta precisu can (Proverbios 4:23; Jeremías 17:9). Y cháypaj ckaasckayquian cuidau ápiy (Mateo 5:29, 30). Job ’ruasckanta yachapianayqui tían pay decidiscka tiara ni aicappas suj huarmita desiayta ima mana huarmin can (Job 31:1). Decidiscka tianayqui tían mana pornografiát ckaayta. Ni aicappas desianayqui tían pi mana conyugeyqui can.

IMÁT ’RUAYTA ATINQUI:

• Ckaachicunayqui tían suj sinchi compromisu conyugeyquian apisckayquita

• Conyugéyquip sentimientusninta respétay y mayckan cachun relaciun ima mana huarmiyquita o ckosayquita mana gustapun, chayllapi pitinayqui tían