Armagedón an puchucai guerra Dios runa gobiernogunahua. Cai gobiernoguna paiguna yanapajcunas Yaya Diospa cuntra asha, pai rimashca shimiunara mana casuna munanun (Salmo 2:2). Armagedón guerra cai tucui runa gobiernogunara tucuchinga (Daniel 2:44).

 Armagedón shimi shu cutilla Bibliai ricurin, Apocalipsis 16:16 partii. Cai profecía ricuchin “hebreo shimii Armagedón nishca pambai” cai guerra anga, tucui ‘cai pacha rey apuuna’ macanungaj tandachishca anunga “Tucuira Ushaj Diospa atun punzhai” (Apocalipsis 16:14).

 ¿Pigunara Armagedón guerrai macanununga? Jesús ángel suldaruunara mandasha macanununga, paiguna vinsinunga Yaya Diosta chijnijcunara (Apocalipsis 19:11-16, 19-21). Tucui Yaya Dios mandana gobiernohua cuntra rijcuna, shinallara Yaya Diosta mana casujcunas tucuchishca anunga (Ezequiel 39:7).

 ¿Armagedón cai Allpa shu partii macanununga? Mana. Armagedón guerra intiru Allpaibi anga, mana shu partillai (Jeremías 25:32-34; Ezequiel 39:17-20).

 Armagedón shimi (hebreo shimii, Har Meghiddóhn) nisha nin “Meguidó Urcu”. Meguidó shu llacta aca, ñaupa israelitaguna causashca partii. Ñaupa tucushcamanda cuintashcauna intindichin chi partii atun guerraguna tiaca. Biblia maican cai guerragunamanda riman (Jueces 5:19, 20; 2 Reyes 9:27; 23:29). Shinajpi Armagedón mana ana ushan ñaupa Meguidó llactara chi partii shu urcu mana tiashcamanda. Astaumbas, Meguidó, Jezreel pambai tian, chi pambai intiru mundumanda chijnijcuna Dioshua macanungaj mana tandarina ushanun. Shinashaga Armagedombi intiru mundui ushaira charij apuuna Yaya Dios gobiernohua macanungaj tandarinunga.

 Armagedón guerrai ¿imara tucunga? Mana yachanchi chi guerrai Yaya Dios paihua ushaira imasna utilizanga, ñaupa punzhaunai utilizaca rasu rumiunara, allpa cuyunaunara, yacu undanaunara, azufrihua sindij nina tamiara, rayugunara, ungüigunaras. Cuti chigunara utilizana ushanga (Job 38:22, 23; Ezequiel 38:19, 22; Habacuc 3:10, 11; Zacarías 14:12). Maican Diospa cuntrajcuna nuspa tucusha paigunapuralla huanchinunga, shinajpi puchucaibi riparanunga Dios paigunahua macanushcara (Ezequiel 38:21, 23; Zacarías 14:13).

 ¿Armagedón cai mundura tucuchingachu? Mana, Armagedombi Allpara mana tucuringachu. Dios Allpara rurashca runauna chibi huiñaigama causanuchu (Salmo 37:29; 96:10; Eclesiastés 1:4). Chimanda ninchi Armagedón Allpara, tucui runaunaras tucuchina randimanda Diosta sirvij “ashca atun muntun runaunara” quishpichinga (Apocalipsis 7:9, 14; Salmo 37:34).

 ¿Biblia yachachinzhu Armagedón cai mundura tucuchinga? Mana, maican Bibliamanda versiculogunai mundu shimira intindichina munan cai Allpara. Shinajpi Bibliai mundu shimi, huaquimbi rimana munan Yaya Diosta mana casujcunara (1 Juan 2:15-17). Cai mana casujcunamanda rimasha Bibia nin Armagedón “mundura tucurina” punzhara apamunga (Mateo 24:3, Biblia de Jerusalén).

 ¿Ima hurasta Armagedón guerra tianga? “Atun turmindarina timpu” tucuriushcai Armagedón guerra pactamunga, cai pasangaraushcamanda Jesús rimashcai nica: “Chi punzhara, chi hurasta, pi runas pi ahuamanda angelgunas mana yachanaunzhu, ñuca Yayallami yachan” (Mateo 24:21, 36). Shinajpi Biblia intindichin Jesús shamuna punzhai Armagedón tianga, cai Jesús shamuna punzha 1914 huatai callarica (Mateo 24:37-39).