Shu huarmi quiquin munaimanda huahuara shullujpi Biblia shu ley mana cunzhu. Shinajpi Biblia ricuchin imasna Yaya Dios sintirin chita ruranujpi, shinallara Diospaj shu mana pagarishca huahua paihua causai valishca ashcara.

 Causaiga Yaya Diosmanda shu valishca cuyashcami an (Génesis 9:6; Salmo 36:9). Diospa ñaupai tucui causajcuna valishcami anun. Chiraigu maican huarmi paihua quiquin munaimanda huahuara shullujpi Diospa ñaupai shu huanchij tucun.

 Israelitagunara Dios cushca ley rimaca: “Huaquin runauna paigunapura macanunusha shu icsayuj huarmira huajlichijpi manara timpu pactajllaira huahua pagarijpi mana pis huañusha, huarmihua cari ima mañashcara huajlichij runa pagana an. Taripajcuna rimashca cuinta pagana an. Astaun pi runas huañujpi, causaipura causaipura pagana angui” (Éxodo 21:22, 23). a

•  ¿Ima huras causai callarin?

•  ¿Quiquin munaimanda huahuara shullujpi Yaya Dios perdonanzhu?

•  ¿Mama, huahua huañungaraun nishcai shullujpi alichu an?

 Yaya Dios nin shu huarmi icsayuj tucushca hurasllai ña causai callarinmi. Paihua Shimii ashca cuti intindichin paihua ñaupai mana pagarishca huahua shu runa an. Shinashaga Yaya Dios mana pagarishca huahua, pagarishca huahua cuinta ricun. Caimanda huaquin textogunara ricushun.

•  Biblia nin rey David Diosta rimaca: “Camba ñahuiuna ricucami ñuca huahua tucushcai” (Salmo 139:16). Cai ricuchin Yaya Dios ñaupai David manara pagarishcallaira ña shu runa aca.

•  Caita iyarishun, profeta Jeremías manara pagarishcallaira Yaya Dios paihuaj ña shu valij mingashcara charica. Paita nica: “Ñuca camba mama icsai canda manara rurashcallaira, canda ña ricsicani; can manara pagarishcallaira canda ajllacani. Llactaunaj profeta ruracani” (Jeremías 1:5).

•  Bibliamanda quillcaj Lucas doctor aca, pai manara pagarishca huahuamanda, pagarishca huahuamandas rimashcai shu tunu shimilla utilizaca (Lucas 1:41; 2:12, 16).

 Ari, Yaya Dios perdonana ushanmi. Paiguna shulluna yapa manali ashcara intindishcamanda Jehová cuinta causaira valichijpi, pai mana munan culpayuj sintirisha catinuchu. Biblia nin: “Jehová yapa sintij shunguyuj an, ali shunguyuj [...]. Imasna indi llucshina partimanda indi icuna partigama yapa carui tian, pai shinallara ñucanchi uchaunara ñucanchimanda yapa carui churashca” (Salmo 103:8-12). b Shullunara, shuj atun uchaunara ñaupa rurashcara shungumanda aripintirijpi Jehová perdonangami (Salmo 86:5).

 Diospa ñaupai mana pagarishca huahua causai yapa valishca ashcamanda huahua, mama ungurina ushashcanga nijpis shulluna manali an.

 ¿Imara rurana ushan huahua pagarina huras pactarijpi mama, huahua causai llaquii ajpi? Chita tucujpi caran yaya mamauna ima ruranara ajllana anun.