¿Jesús imasna ricurij aca?
Biblia cutipashca
Mana pis yachan Jesús imasna ricurij ashcara, Biblia chita mana riman. Cai ricuchin pai imasna ricurij ashcara yachana mana yapa ministishca an. Shinajpi Biblia rimashcara yachangaj yanapan pai imasna ricurij ashcangachari.
Imasna ricurij aca: Jesús judío aca, paihua mama Sem miraimanda ashcaraigu paiguna cuinta ricurij aca (Hebreos 7:14). Shuj runauna cuinta ricurij ashcamanda shu punzha Galileamanda Jerusalenma riushcai runauna paita mana ricsinuca (Juan 7:10, 11). Paihua pariju purij discipuloguna cuinta ricurishcangachari. Iyarishun imasna piñarishca muntun runauna Jesusta apingaj riushcai Judas Iscariote Jesús pita ashcara ricuchina aca (Mateo 26:47-49).
Accha: Biblia nin, shu cari ‘suni accha charisha pingarishca’ tucun, chimanda Jesús suni accha mana charicachu (1 Corintios 11:14).
Barba: Jesús barbayuj aca. Judiogunama cushca leyra casuca, chi ley cariunara mandaca barba puchura mana pitina ashcara (Levítico 19:27; Gálatas 4:4). Astaumbas, Jesús turmindarinamanda profecía paihua barbamanda riman (Isaías 50:6).
Aicha: Jesús shinzhi runa aca. Pai Bibliamanda yachachiushcai ashca kilometroguna purica (Mateo 9:35). Astaumbas ishqui cuti temploi tiaj catujcunara llucchica mesagunara vultiachisha, huagraunaras huascahua llucchica (Lucas 19:45, 46; Juan 2:14, 15). Shu enciclopedia nin: “Tucui evangelio cuintashcauna ricuchin Jesús shinzhi aicha charishcara” (Cyclopedia de M’Clintock y Strong, volumen IV, página 884).
Ñahui cara: Jesús llaquij, ali shunguyuj aca, paihua ñahuihua casna ashcara ricuchica (Mateo 11:28, 29). Tucui tunu runauna paita mascanuj aca cushiyachinara yanapairas charingaj (Lucas 5:12, 13; 7:37, 38). Huahuaunas yapa cushi sintirinuj aca paihua pariju ashcai (Mateo 19:13-15; Marcos 9:35-37).
Jesús imasna ricurishcamanda panda iyaiguna
Huaquinguna quirinun: Apocalipsis libroi rimashcamanda maicanguna quirinun Jesús yana ashcara, chibi nin paihua accha illma cuinta ashcara, shinallara paihua chaquiuna bronce “paila cuinta chiujlla ricurij” ashcara (Apocalipsis 1:14, 15, Mushuj pactachina shimi).
Biblia sirtu yachachina: Apocalipsis libro ejemplogunahua quillcashca an (Apocalipsis 1:1). Cai libroi Jesuspa accha, chaquiunamanda rimashcai ejemplogunahua intindichina munan pai causarishca huasha imasna ashcara. Mana ricuchingaj munan Jesús cai Allpai causaushcai imasna ricurij ashcara. Apocalipsis 1:14 “paihua uma, paihua accha yuraj anauca yuraj illma cuinta, rasu cuinta ricurij aca” nishcai, yuraj colormanda riman. Yuraj accha charishcara ricuchin Jesús ashca huatauna causashcamanda sabiru an (Apocalipsis 3:14). Cai texto paihua acchamanda rimashcai mana intindichingaj munan illma, rasu ricurij cuinta ashcara.
Astaumbas cai Jesusmanda ricuchinai paihua chaquiuna bronce “paila cuinta chiujlla ricurij anauca, ninai churashca pucayashca cuinta” (Apocalipsis 1:15). Shinallara “paihua ñahui indi cuinta aca pai shinzhi aitashcai ricurijsna” (Apocalipsis 1:16). Cai textoguna rimashca aicha color mana pis charin, chimanda yachanchi cai textoguna ejemplogunamandalla riman. Maspas intindichina munan Jesús causachishca huasha imasna ashcara, maibi causashcaras, chimanda Biblia nin “mana pactaihuaj punzhai causaj” an (1 Timoteo 6:16).
Maicanguna quirinun: Jesús samba, irqui runa ashcara.
Biblia sirtu yachachina: Jesús mana samba, mana manzhaj runa aca. Iyarishun imasna piñarishca muntun runauna Jesusta apingaj riushcai mana manzhasha, ñuca ani nisha rimaca (Juan 18:4-8). Astaumbas Jesús carpintero runa ashcamanda pai shinzhi runa ashcara yachanchi (Marcos 6:3).
Shinajpi ¿imarasha Jesús huañuna caspira apangaj yanapaira ministica? ¿Imarasha quinsandimanda pai ñaupa punda huañuca? (Lucas 23:26; Juan 19:31-33). Manara huañushcallaira paihua aicha yapa samba aca. Intiru tuta mana puñuna ushaca nanajta turmindarishcamanda (Lucas 22:42-44). Judioguna chi tutai paita turmindachinuca, astaumbas cayandi punzha romanoguna azutinuca (Mateo 26:67, 68; Juan 19:1-3). Chimanda dsaslla huañuca.
Huaquinguna quirinun: Jesús tucui huras llaquirishca aca.
Biblia sirtu yachachina: Jesús tucui huras paihua Yaya cuinta aca, Jehovamanda Biblia nin, pai cushi Diosmi an (1 Timoteo 1:11 TNM; Juan 14:9). Astaumbas Jesús shujcunara yachachica imasna cushi anara (Mateo 5:3-9; Lucas 11:28). Chimanda yachanchi paihua ñahui cara tucui huras cushi ricurij aca.
Cai temagunaras leana munanguichari
ENSEÑANZAS IMPORTANTES DE LA BIBLIA
Bibliai tiaj shimiunara ¿imarasha quirina anchi?
Bibliaga Diospa shimi ashcamanda, shuj librogunamanda mana chi tunullarachu an.
ÑUCANCHIMANDA
Bibliamanda yachanara mañai
Pasiachu mañai Jehovahuaj testigogunahua Bibliamanda shu temara yachangaj shinallara Bibliamanda gratis yachangaj mañana ushangui jw.org paginai tiaj formulariora quillcasha.