Biblia Jesusmanda rimasha “Diospa Churi” an nin (Juan 1:49). Cai “Diospa Churi” shimiuna nisha nin Yaya Dios Ruraj, Paimanda causaira shamushcara, cai ricuchin Yaya Dios Jesusta causaira cuca (Salmo 36:9; Apocalipsis 4:11). Biblia mana ninzhu Yaya Dios paihua churiuna runauna cuinta charishcara.

 Biblia shinallara nin angelguna sirtu “Diospa churiuna” anun (Job 1:6). Shinallara yachachin ñaupa punda runa Adán, “Diospa churi” aca (Lucas 3:38). Shinajpi Biblia ricuchin Jesús, Dios mas valij Churi an paita ñaupa punda rurashcamanda, astaumbas paita pitijta rurarca mana pis yanapasha.

•  ¿Manara cai Allpama shamushcallaira Jesús ahua pachai causaca?

•  Manara cai Allpama shamushcallaira ahua pachai ¿imara rurauca?

 Ari. Manara shu runa cuinta pagarishcallaira, Jesús ahua pachai shu ángel aca. Paillara rimaca: ‘ahua pachamanda irgumucani’ (Juan 6:38; 8:23).

 Yaya Dios ñaupa punda Jesusta rurarca. Jesusmanda Biblia nin:

•   Pai an “tucui causajcunamanda ñaupa punda pagarij” (Colosenses 1:15).

•   Pai an “Dios Iñachishcara Callarij” (Apocalipsis 3:14).

 Jesuspi cai rimashca profecía pactarica, chi profecía nica pai callari timpumanda an, unaimanda tiaj (Miqueas 5:2; Mateo 2:4-6).

 Jesús ahua pachai shu valishca puistura charica. Jesús ñaupa charishca puistura iyariushcai casna mañaca: “Yaya, ñucara sumajyachihuangui […] ñuca ñaupa huras canhua pariju charishca sumajhua, cai pacha manara tiashcaira” (Juan 17:5).

 Jesús paihua Yayara yanapaca tucui tiaj cosasgunara rurangaj. Jesús paihua Yayahua tarbaca “shu ali yachaj tarbaj cuinta” (Proverbios 8:30). Jesusmanda rimasha Biblia nin: “Tucuira paihuajllai rashca anauca, ahua pachai tiajcunara cai pachai tiajcunaras” (Colosenses 1:16).

 Yaya Dios Jesús yanapaihua angelgunara tucui tiaj cosasgunaras rurarca (Apocalipsis 5:11). Imasna shu arquitecto planogunara ruran randi shu albañil huasira shayachin, shinallara Jehová paihua Churi Jesushua pariju tarbanuca.

 Shimi aca. Manara cai Allpama shamushcallaira, Biblia Jesusta “Shimi” nin (Juan 1:1). Cai nisha nin Yaya Dios paihua Churira utilizaca yachachishcaunara cuintashcaunaras shuj angelgunama cungaj.

 Jesús shinallara Yaya Diosmanda yachachishcaunara runaunama apaca. Jehová, Jesusta utilizashcangachari Adan Evaras paraisoi yachachishcaunara cungaj (Génesis 2:16, 17). Jesús ashcangachari israelitagunara chaquishca pambai chimbachingaj yanapaj ángel, paitas casuna anuca (Éxodo 23:20-23). a