Biblia mana yachachinzhu santogunara rezana ashcara. Astaun yachachin Diosllara oracionda rurana anchi Jesuspa shutii. Jesús paihua catijcunara nica: “Cangunaga casna mañaichi: Ñucanchi ahua pachai tiaj Yaya, camba shutira ahuayachishca achu” (Mateo 6:9). Jesús mana yachachicachu santogunara, angeldas oracionda rurangaj, astaun pai yachachica Yaya Diosllara oracionda rurana ashcara.

 Jesucristo shinallara rimaca: “Ñuca ñambi ani, sirtu shimi ani, causais ani. Mana pihuas Yayajma shamunzhu mana ñucahua shamujpi” (Juan 14:6). Jesusllami ñucanchira Diospajma pushana ushan (Hebreos 7:25).

¿Yaya Diosta santogunaras mañana alichu an?

 Cai Chunga Mandashca shimiunai Dios nica: “Ñuca Jehová camba Dios ani, ñucallara adurana angui” (Éxodo 20:5). “Ñucallara adurana angui” nisha ¿imara intindichingaj munan? Intindichin mana shuj diosgunara adurana anchi. Oracionda rurashcai Diosta adurana an (Isaías 48:11).

 Ñucanchi shu santora, shu angelda, shuj diosgunara oracionda rurajpi Yaya Diosta mana gustanzhu. Apocalipsis libroi nin, shu punzha apóstol Juan tuama urmasha shu angelda adurangaj munajpi, chi ángel piñarisha “Ama casna raichu”, nica, “ñuca canhua pariju sirvij ani camba uquiunahua, paiguna Jesuspa shimira huacachijcunami. Diosllara aduraichi” (Apocalipsis 19:10).