Biblia shu cutilla tatuajegunamanda riman Levítico 19:28​i, chibi nin: “Shinallara canguna aichai tatuajegunara ama ruraichichu”. Dios israelitagunama cai mandashcara cuca paiguna mayanlla llactaunai causajcuna cuinta mana ruranuchu, paiguna aichai yanga diosgunahua shutiunara, dibujugunara churarij anuca. (Deuteronomio 14:2). Cuna punzhaunai Diosta sirvijcuna israelitagunama cushca leyra mana catinchi, shinajpi cai ley yachachishcamanda yachana ministinchi.

¿Diosta sirvij tatuajegunara ruraringaj alichu an?

 Maican Bibliamanda textogunara ricushun ima rurana ashcara yachangaj.

•   Biblia nin: “Shinallara huarmiuna […] ali quillparisha” churarinuchu (1 Timoteo 2:9). Cai mandashcara cariunas casuna anun. Diosta sirvijcuna, shujcuna sintishcaunara valichina anchi ñucanchira ricungajlla, ahuayachingajlla imaras mana rurasha.

•   Maican runauna tatuajegunara rurarinun shu muntun runaunamanda ashcara ricuchingaj, randi shujcuna rurarinun paiguna aichai imaras rurangaj quiquin ajllana ashcara ricuchingahua. Shinajpi, Biblia Diosta sirvijcunara casna nisha mandan: “canguna aichara Diosta cuyaichi, shu causaj sacrificiora cuinta, chuyajlla, Dios chasquihuajllami. Caimi canguna Diosta iyaihua alabana” (Romanos 12:1). Camba ‘iyaira’ utilizana yachangaj yanapanga imarasha shu tatuaje rurangaj munangui. Iyari, ¿ashca runauna tatuaje rurarishcamanda cambas ruraringaj munangui? ¿Shu muntun runaunamanda ashcara ricuchingaj munangui? Timpu pasashcai camba iyai turcana ushan, chimanda tapuri: ¿Imara rurashairi ñuca tatuaje ña mana gustajpi, rurashcamanda aripintirijpi? Tucui caigunara alira iyarisha shu ali iyaira apina ushangui (Proverbios 4:7).

•   Biblia nin: “Shu ali tarbaj runa iyarishca sirtu pacha alimi llucshinga, randi, nuspachishcara ruraj pugri tucunga” (Proverbios 21:5). Ashca runauna shu tatuaje rurarinun yanga munashcamandalla. Shinajpi shujcunahua apanunai, paiguna tarbanai tatuajegunara charishcamanda ashca problemagunara charinun. Astaumbas shu tatuajera llucchingaj ashca cullqui valin shinallara yapa nanachin. Ashca runauna shu tatuaje rurarishca huasha aripintirinushca, chimanda tatuajegunara llucshingaj ashca negocioguna tian.