Chiapas México, San Juan Chancalaíto ichilla llactai pagaricani. Chol runauna anchi, mayas miraigunamanda. Ñuca yayauna 12 huahuauna charinuca, ñuca pichca ani. Ñuca huahua ashcai, ñuca huauqui paniunahua Bibliara estudiaj acani. Shinajpi, Biblia camachishcaunara mana pactachicanichu.

 13 huata charishcai drogara upij shuhuajpas acani. Huasimanda risha maitas purij acani. 16 huata charishcai, marihuanara tarpunai tarbasha callaricani. Chibi ñaca shu huata tupu tarbaushcai, shu tuta barcoi ashca marihuanara apaushca huraspi shuj drogara catuj muntunmanda ñucanchira huañuchingaj callarinuca. Ashca illapaunahua shamunuca, huañuchijcunamanda quishpiringahua yacuma saltasha yacu ucui saquiricani, huasha huaitasha risha llucshicani. Miticungahua Estados Unidos llactama ricani.

 Chima pactashcai, drogagunara catusha catishcamanda llaquiunara charisha caticani. 19 huatauna charishcai, shuashcamanda, runara huañuchina munashcamanda carcelma apahuanuca. Carcelbi shu manali rurajcuna muntunma pasasha macanunaunai satirisha caticani. Chiraigumanda carcelbi mandajcuna shu mana llucshina ushangaj carcelma cachahuanuca, Lewisburg (Pensilvania) llactai.

 Lewisburg carcelbi ashcai, ñuca rurashcauna mas manali tucuca. Shu manali rurajcuna muntunmanda tatuaje charishcaraigu, chi muntunmanda carcelbi tiajcunama llutaringahua mas ahualla aca. Mas manali ruraj tucusha macanunaunai satirina mana saquicani. Shu punzha carcel patioibi shu manali rurajcuna muntunhua shinzhi macanungaj callaricani beisbol pujllangaj caspiunahua gimnasio tiaj pesagunahua utilizasha. Guardiaguna gas lacrimógeno utilizanuca macanunara shayachingaj. Huasha carcelbi mandajcuna, yapa manali rurajcunaj ishcana puistuma apahuanuca. Yapa manali shimiunahua rimaj, uctalla piñarij runa acani. Ima cosasgunamanda macanusha ali sintij acani, chi tucui manali rurashcaunamanda manali sintirina mana charicani.

 Yapa manali rurajcunaj ishcana puistui ñaca intiru punzhai pasaj acani. Mana amichishca sintiringaj Bibliara leangaj callaricani. Huasha, shu guardia huarmi Usted puede vivir para siempre en el paraíso en la Tierra nishca librora cuhuaca. a Chi Bibliara estudiangaj librora leasha, huahua ashcai Jehovahuaj testigogunahua tucui yachashcara iyaringaj callaricani. Ñuca manali rurashcaunara iyarisha manali sintiricani. Shinallara iyaricani ñuca aillura. Ñuca ishqui paniuna Jehovahuaj testigo tucushcara, paiguna huiñai huiñaigama causangaraushcara. Chiraigu tapuricani: “¿imarasha ñuca mana?”. Chi ratui ali iyaira turcangaj apicani.

 Shinajpi ñuca yachacani turcangaj yanapaira ministishcara. Chimanda pundaibi Jehová Diosta mañacani ñucara yanapahuachu. Chi huasha Jehovahuaj testigoguna Estados Unidos llactai sucursalma quillcacani Bibliamanda yachachihuachu mañangaj. Sucursal mañaca ñuca mayambi tiaj congregacionmanda shu huauqui cayahuachu. Chi timpui ailluunallara ñucara pasiangaj rina ushanuca. Chiraigu congregacionmanda shu Jehovahuaj testigo animachingaj cartagunara cachamuhuaca shinallara Bibliamanda quillcaunara shinzhiyachingaj, ñuca causaira turcachingaj yanapahuaca.

 Ñuca causaira sirtu turcana munasha, ashca huatauna manali rurajcuna muntunmanda llucshingaj iyaricani. Chi muntunmanda jefe ñuca ishcana puistui ñucahua pariju aca, samana huras paihuajma llutarisha paita nicani ñuca Jehovahuaj testigo tucuna munani nisha. Pai cutipahuaca: “Can sirtu rimashaga rurai, Dios munashcahua cuntra rina mana munanichu. Shinajpi can ñucanchi muntunmandalla llucshina munajpi ña yachangui ima tucunga”.

 Ishqui huatauna huasha, carcelmanda guardiaguna ñuca turcariushcara riparanuca. Chimanda ñucara mas ali tratangaj callarinuca. Por ejemplo, ishcana puistumanda bañoma ringaj maquiunara ña mana huatasha pushahuanuca. Shu guardia ñucajma llutarisha animachihuaca ñuca causaira turcachisha catingaj. Carcelmanda apuuna shu mana yapa ishcashca lugarma apahuanuca, ñuca puchucai huata carcelbi tianamanda chibi pasacani. Chunga huatauna carcelbi pasashca huasha 2004 huatai llucshicani, carcelmanda autui cachahuanuca México llactama.

 Ansa timpu México llactama pactashcai, Jehovahuaj testigoguna shu Reinomanda Yachana Huasira tupacani. Ñuca punda tandarinama carcelmanda uniforme churarisha ricani mas ali churana mana charishcamanda. Manali ñuca ricurijpis, Jehovahuaj testigoguna llaquishcahua chasquihuanuca. Chi llaquishcara ñucara ricuchishcai, paiguna sirtu Jesusta catijcuna ashcara sinticani (Juan 13:35). Chi punzhallaira congregacionmanda tandarijcunara cuirajcuna yanapahuanuca maican ñucara Bibliara yachachihuachu. Shu huata huasha, 3 de septiembre de 2005 huatai Jehovahuaj testigo cuinta bautisaricani.

 Enero de 2007 huatai, intiru timpu sirvingaj callaricani, caran quilla setenta horasguna shuj runaunara Bibliamanda yachachisha. 2011 huatai Escuela Bíblica para Varones Solteros nishcai graduacani (cuna ricsishca an Escuela para Evangelizadores del Reino). Cai escuela ashcara yanapahuaca congregaciombi tarbanaunara ali pactachingaj.

 2013 huatai ñuca llaquishca huarmi Pilarhua casaracani. Ñuca pasashcamanda cuintashcai asishcahua nin, shinzhi an quiringaj ñuca shina ashcara. Mana cuti ñaupa cuinta rurangaj caticanichu. Ñuca huarmihua quirinchi ñuca causaira turcashcara ricuchin Biblia sirtu runauna causaira turcachingaj ushaira charishcara (Romanos 12:2).

 Lucas 19:10 Jesús rimashca, ñucamanda rimashca cuinta sintini. Chi textoi pai nica: “shamucani chingarishcara mascangaj quishpichingajpas”. Ña mana pandarishca sintirini. Ña mana shujcunara huaglichisha causani. Bibliara yachashcamanda cuna ñuca alira rurasha cushi causani. Tucui runaunahua ali apanuni, astaun ñucara Ruraj, Jehová Dioshua ali amigo tucushcara mas valishca an.