Jehovahuaj testigoguna estudiangaj ashca Bibliaguna utilizanushca. Shinajpi, Traducción del Nuevo Mundo nishca Bibliara ashcara valichinun Diospa shutira charishcamanda, mana turcachishca, intindinalla ashcamanda. Cai Biblia ashca shimiunai tian.

•   Diospa shutira charin. Maican Bibliaguna Diospa shutira mana charinun. Por ejemplo, shu Biblia setenta shuj shimima pasachij runauna shutira charin, shinajpi Diospa shuti Jehová mana shu cutilla churanuca.

   Chi randi Traducción del Nuevo Mundo Biblia, Diospa shutira huaranga cuti charin ñaupa punda Bibliamanda quillcashcaunai tiashca cuinta, astaumbas cai Biblia rurangaj yanapajcuna shutira mana charin.

•   Mana turcachishca an. Maican Bibliagunai ñaupa punda Bibliamanda quillcashcaunai yachachishcaunara turcachinushca. Por ejemplo, Mateo 7:13 casna quillcanushca: “Quishqui pungura icuichi. Anzhu punguga atun ñambiga ucu pachama pushan chingachingaj”. Ñaupa punda Bibliamanda quillcashcaunai mana nin “ucu pacha”, maspas nin “huañuna”. Chi Bibliagunara quillcajcuna quirij anuca mana ali runauna ucu pachai huiñaigama rupachishca ashcara. Shinajpi Biblia chita mana yachachin. Chiraigumanda Traducción del Nuevo Mundo Biblia chi textoi intindichin “huañuna” ashcara imasna ñaupa punda quillcashcaunai nin.

•   Intindinalla an. Biblia mana turcachishca ashcara valijmi an, shinajpi ahualla intindingaj ministirishca an. Shu ejemplo ricushun. Ashca Bibliagunai Mateo 5:3 casna quillcanushca: “Cushiunami ‘Almai pugri anchi’, nijcuna”. Shinajpi cuna timpui cai shimiuna intindingaj shinzhi an. Chiraigumanda Traducción del Nuevo Mundo Biblia shina nin: “Cushiunami espiritual ministishcauna charinchimi nisha quirijcuna”.

 Cai Biblia Diospa shutira charin, mana turcachishca shinallara intindinalla shimiunahua Yaya Dios yachachishcaunara intindichin, astaumbas Traducción del Nuevo Mundo Biblia maican runa mana randisha charina ushan. Shina huaranga huaranga runauna cullqui mana charishas Bibliara leana ushanun paiguna quiquin shimii.