Jehovahuaj testigoguna sirtu pacha quirinchi Yaya Dios mana munan cumpleaños istaunara ruranuchu, chimanda mana ruranchi. Biblia cai istaunara mana rurangaj mana nijpis, huaquin iyaigunara cun intindingaj imasna Yaya Dios ricun cumpleaños istaunara. Ricushun chuscu iyaigunara, shinallara cai iyaigunamanda Biblia ima yachachishcara.

1.   Cumpleaños ista panda religiongunamanda shamun. Shu diccionario enciclopédico, cumpleaños istara imasna tiai callarishcamanda rimasha nin, cumpleaños punzhai “espirituguna ayaunas cumpleañosta rurauj runara llaquichina munanun”, shinajpi “paihua tiaj amigoguna, ali munai rimashcaunas paita cuirana ushan” (Funk & Wagnalls Standard Dictionary of Folklore, Mythology, and Legend). Shuj libro intindichin ñaupa timpui runauna pagarishca punzhaunara quillcaj anuca, chi “valij aca astrología yachachishcara catisha horóscopo nishcara rurangaj”. Shinallara cai libro riman: “Runauna quirinun cumpleaños velaguna ushaira charin cumpleaños ruraj runa munaigunara pactachingaj” (The Lore of Birthdays).

    Shinajpi, Biblia ricuchin tucui tunu sagrana ruranaunara, shuj casna ruranaunaras Yaya Dios chijnin. (Deuteronomio 18:14; Gálatas 5:19-21) Yaya Dios ñaupa Babilonia llactai causaj runaunara taripaca sagrana rurajcuna ashcamanda (Isaías 47:11-15). Jehovahuaj testigoguna mana yachana munanchi caran istauna maimanda llucshishcara, shinajpi Biblia pasajta ricuchin sagrana ruranaunara Yaya Dios chijninmi, chimanda tucui sagrana ruranaunamanda anzhurinchi.

2.   Punda Jesusta catijcuna cumpleaños istaunara mana ruraj anuca. Shu enciclopedia nin, paiguna quirij anuca “cumpleaños istara rurana yanga diosgunara adurajcunamanda shamushcara” (The World Book Encyclopedia). Biblia ricuchin Jesús cai Allpai ashcai paita catijcunara yachachica imasna Yaya Diosta ali adurana ashcara, chimanda paiguna yachachishcaunara, paiguna rurashcaunara catisha Diosta adurana anchi (2 Tesalonicenses 3:6).

3.   Jesús paita catijcunara pai huañushcara iyaringaj mandaca, mana pai pagarishcara (Lucas 22:17-20). Biblia nin “huañuna punzha pagarishca punzhamanda mas ali an” (Eclesiastés 7:1). Jesús cai Allpai ashcai, paihua Yaya ñaupai ali ricurica huañuna hurasgama casuj ashcamanda chiraigu paihua huañuna punzha mas valishca aca pagarina punzha randimanda (Hebreos 1:4).

4.   Bibliai mana ricuchinzhu shu Diosta sirvij cumpleaños istara rurashcara. Astaun Biblia riman ishqui Diosta mana sirvij runauna cumpleaños ista rurashcara, shinallara ricuchin cai ishqui istaunai manali rurashcauna pasashcara (Génesis 40:20-22; Marcos 6:21-29).

 Ali yayauna cuinta Jehovahuaj testigoguna paiguna huahuaunara llaquinunmi. Chiraigu, paiguna huahuaunara huatamanda maicans punzhaunai cuyanaunara cunun, shinallara istaunara ruranun paiguna huahuauna cushi pasanuchu. Ursarinun Yaya Dios ejemplora catingaj, pai tucui huras ali cosasgunara cun paita sirvijcunara (Mateo 7:11). Chiraigumanda Jehovahuaj testigo huahuauna cumpleaños istaunara mana rurashcamanda mana llaqui sintirinun. Paiguna cuintashcara shina ricuchin:

•   Tammy 12 huatayuj nin: “Yapa cushi sintirini mana chapashca punzhai shu cuyanara apishcai”.

•   Gregory 11 huatayuj nin: “Ñuca yayauna, ñuca pagarishca punzhai shu cuyanara mana cuhuanun, shinajpi maicans punzhaunai cuhuanun. Chi ñucara yapa gustahuanmi”.

•   Eric 6 huatayuj nin: “Cumpleaños istara ruraj huahuauna pastelgunallara micunun, cantanun. Chi istauna mana gustahuanzhu maspas ñuca huasii rurashca istauna yapa sumaj an”.