Jehovahuaj testigogunaj ashca valishcami an ailluuna gunlla anuchu. Ailluunara ashca valichinchi, Yaya Dios callarichishcamanda (Génesis 2:​21-24: Efesios 3:​14, 15). Bibliai, Yaya Dios ali camachishcaunara cun chi ashca runaunara yanapashca cushi, gunlla aillura charingaj.

 Ursarinchi Biblia mandashcaunara casungaj ali cari, huarmi yayaunas angaj (Proverbios 31:10-31; Efesios 5:22-6:4; 1 Timoteo 5:8). Biblia shinallara yanapana ushan aillu ucui shuj religiongunamanda anujpis (1 Pedro 3:1, 2). Ricushun maican runauna mana testigoguna rimashcara paigunahua cari, huarmi Jehovahuaj testigoguna tucushcai.

•   Clauir shutiyuj huauqui Brasilmanda nin: “Punda sucta huatauna casarashcamanda tucui huras macanusha mana ali causai acanchi. Shinajpi ñuca huarmi Ivete Jehovahuaj testigo tucushcai, llaqui, chapaisiqui shungura ricuchingaj callarica. Pai turcarishcamanda pariju catinchi”.

•   Agness pani Zambiamanda nin: “Ñuca cari Chansa shutiyuj, Bibliara estudiangaj callarishcai ñuca iyacani Jehovahuaj testigoguna ailluunara chicanyachinun nisha, chiraigu mana munacani. Shinajpi cuna quirini Biblia ñuca aillura yanapashcara”.

 Runaunara Bibliamanda yachachishcai yachanun imasna Biblia ailluunara caita rurangaj yanapan:

•   Casarangahua shu ali cari, shu ali huarmi mascangaj

•   Punda casarashca huatai turbarishcaunara alichingaj

•   Cari, huarmi yayaunahua ali apanungaj

•   Cullquira ali utilizangaj

•   Piñarinara saquingaj

•   Perdonangaj yachana anchi

•   Huahuaunara ali iñachingaj

 Huaquimbi ari. Shu empresa de investigación Sofres shutiyuj 1998 huatai shu comunicado quillcaca, chibi nica shu caran 20 casarashcaunamanda shinzhi turbarishcauna charinuca cari, huarmi Jehovahuaj testigo tucujpi.

 Jesús paita catijcunara nica turbarinauna huaquimbi ailluunahua tianga (Mateo 10:32-36). Historiador Will Durant nica romanos timpuunai “Jesusta catijcunara culpanuca ailluunara chicanyachinguichi nisha”. a Cuna shinallara Jehovahuaj testigogunara chigunamandallara culpanun. Shinajpi, ¿Jehovahuaj testigoguna turbarishcauna charijpi culpayuj anun?

 Aillu ucui Jehovahuaj testigoguna tiajpi turbarinamanda rimasha, Tribunal Europeo de Derechos Humanos nica: “Shu ailluuna paiguna mana chasquina respetana munanun Jehovahuaj testigogunara yachachishcaunara shinallara yachaigunaras”. Shinallara Tribunal nica: “Cai turbarishcauna mana Jehovahuaj testigogunamandalla an, shuj aillu maican religionmanda ashas cai tunu turbarishcauna charina ushan”. b Cai turbarishcauna charishas Jehovahuaj testigoguna cai Biblia mandashcara casunun: “Pitas manalira manalihua ama pagaichichu. [...] Ranalla ajpi, canguna ushashca tupura, cushihua causaichi tucui runaunahua” (Romanos 12:17, 18).

 Biblia mandashca cuinta Jehovahuaj testigoguna “Señorbi quirij ajpi” casaranun, cai nisha nin ñucanchi cuinta quirinara charij runaunallahua casaranchi (1 Corintios 7:39). Cai Dios cushca mandashca ñucanchira ashcara yanapan. 2010 huatai Journal of Marriage and Family revista nica: “Carashcauna chi tunu religionllara charishas, Biblia chi tunu mandashcaunallara casusha mas cushi anun”.  c

 Jehovahuaj testigoguna casarashcaunara mana ninun paihua cari, huarmi mana testigo ajpi ichuna anguichi nisha. Biblia nin: “Shujcunama casna nini ñuca, mana Dios rimanzhu: Maican uqui shu mana quirij huarmira charisha, huarmi paihua pariju causasha nijpi, cari paita ama ichuchu. Shinallara huarmi mana quirij carira charisha, cari paihua pariju causasha nijpi, huarmi paita ama ichuchu” (1 Corintios 7:12, 13). Jehovahuaj testigoguna cai valishca mandashcara casunchi.