Diosta mas sirvingahua ajllana yanapanmi ñucanchi ursara, timpura ali utilizangaj mundu manara tucurijllaira (1Co 9:26; Ef 5:​15, 16). Familiahua adurana huras cuintanuna ushanguichi mushuj huatai mas Diosta sirvingaj pactachinara ajllangahua. Cai Tarbana quillcai ricuna ushangui imasna Diosta mas sirvingaj yachachishca temagunamanda, oracionda rurashca huasha maican pactachingaj ruranaunara ajllangui (Snt 1:5).

¿Aillumanda shujllas precursor regular tucuchu yanapanuna ushanguichichu? Precursorguna pactachina timpura mana pactachina ushangarauni nisha manzhai charisha, can cuinta pasauj precursorgunahua cuintanungui (Pr 15:22). Familiahua adurana huras shu precursorda tapusha cuintachina ushangui, huasha pactachina horariogunara quillcangui. Astaumbas ñaupa precursor ashcashaga ¿cutillara rurana ushanguimanzhu? Iyari, cuna pactachina ushanguichari.

¿Camba familiamanda maicambas precursor auxiliar tucuna ushanzhu shu quilla o mas quillauna? Ashca ursara mana charisha caran punzha shu ratuhua yachachina ushangui. Escuelai ashcamanda, tarbanai ashcamandas chaupi semanai mana llucshina ushashaga feriado quilla tiashcai, quillai pichca sábado o domingo punzhauna charishcais precursor tucuna ushanguichari. Shu calendarioi señalangui huaquin quillauna precursor tucungahua, huasha shu horariora quillcai (Pr 21:5).

PRECURSORGUNA SHINZHI TUCUICHI VIDEORA RICUSHCA HUASHA, CATIJ TAPUIGUNARA CUTIPAI:

• ¿Imasnara Jehová cuiraca Aamand panira? ¿Imara cai ñucanchira yachachin?