1, 2. ¿Imarasha rimana ushanchi Bibliaga shu gustu cuyashca libro an?

¿IMASNARA sintiringui camba amigo shu cuyanara cujpi? Chita pascasha ricunara munangui. Astaumbas camba amigo iyarishcamanda can cushi sintiringui paita ashcara pagarachungui.

² Bibliaga Yaya Dios partimanda shu gustu cuyashcami an. Bibliai tucui tianmi shujta librogunai mana yachachishcauna. Biblia yachachin Yaya Dios ahua pachara, cai Allparas rurarca, shinallara ñaupa punda carira huarmiras rurarca. Ñucanchi problemaguna charishcai Biblia yanapan. Astaumbas yachachin imasna Dios cai Allpara shu gustu causana lugar rurangaraun.

3. Bibliara estudiashaga ¿imara yachangaraungui?

³ Bibliara estudiasha yachangaraungui Yaya Dios munanmi can paihua amigo tucuchu. Diosta mas ricsishaga paihuajma mas llutaringui.

4. a) ¿Masna shimiunai Bibliara quillcashca tian? b) ¿Masna copia Bibliamanda llucchinushca?

⁴ Bibliara 3.200 yali shujta shimiunai pasachinushca, shinallara Bibliara huaranga huaranga copia llucchinushca. Intiru mundui ashca runauna paiguna quiquin shimii Bibliara leana ushanun. Shinallara caran semana huaranga huaranga yali bibliagunara llucchinun. Bibliaga shujta librogunamanda mas yapa valishca an.

5. ¿Imara nisha nin Bibliaga “Diosmanda rimashcami”?

 ⁵ Bibliaga “Diosmanda rimashcami” (leapai 2 Timoteo 3:16). ¿Caita imara nisha nin? Shinallara Bibliara quillcajcuna runauna ajpis ¿imarasha ninchi Bibliaga Diospa shimi an? Bibliaga casnami cutipan: “Astaun Diospa santu runauna rimanauca Santu Ispíritu yachachishcasna” (2 Pedro 1:21). ¿Imasnara Yaya Dios chi runaunara pushaca? Intindingahua iyangui, shu jefe paihua secretariora shu cartara quillcachu mañan. ¿Pihuajta chi carta an? Jefehuajmi an, mana secretariohuaj. Shinallara Biblia Yaya Diosmanda shamun, mana Bibliara quillcajcunamanda. Yaya Dios paihua iyaigunara Bibliai quillcachica. Chiraigu cierto pacha intindinchi Bibliaga  ‘Diospa shimi’ an (1 Tesalonicenses 2:13; nota 2 ricungui).

6, 7. ¿Imarasha ninchi Bibliaga chimandallara riman?

⁶ Bibliara quillcangaj callarishcamanda tucuchinagama 1.600 huatauna pasacami. Bibliara quillcajcuna caran timpuunai causanuca. Huaquinguna estudiashcauna, shujcuna mana. Shu doctor aca, shujcuna allpara tarbasha cuirajcuna, aichahuara apijcuna, buriguunara cuirajcuna, profetaguna o Dios partimanda rimajcuna, juezguna, rey apuunas anuca. Shinajpis Bibliaga tucui huras chimandallara riman. *

⁷ Bibliai punda capituloguna intindichin imasna problemagunara cai Allpai callarishca, shinasha puchucai capituloguna nin, imasna Yaya Dios chi problemagunara tucuchisha, cai Allpara shu paraíso ruranga. Biblia huaranga huaranga huataunai runaunamanda cuintashcami, shinallara ricuchin Dios tucui huras paihua rimashcara pactachin.

8. ¿Ima ejemploguna ricuchin Bibliaga cientificoguna yachachishcaunamanda rimashaga mana pandanzhu?

⁸ Bibliaga cientificoguna yachachishcaunamanda rimashaga mana pandanzhu. Chiraigu yachanchi Diospajmanda libro ajta. Shu ejemplo tupanchi Levítico libroi, Yaya Dios israelitagunara nica imara rurana anuca ungüigunara mana apingahua, chiga shuj runauna mana yachanucachu. Bibliaga cierto riman Allpara “mana imais huarcuchiunzhu” (Job 26:7). Ashca  runauna iyaj anuca Allpaga shu pamba ajta, shinajpi Bibliaga ña yachachishca cai Allpa shu muyu cuinta ashcara (Isaías 40:22).

9. ¿Imara ricuchin Bibliamanda quillcajcuna mana llullasha quillcashcara?

⁹ Bibliaga historiamanda rimashaga ciertora riman. Shuj libroguna historiamanda rimasha paihua quillcajcuna ciertora mana cuintanushcachu. Iyari, huaquinguna paiguna llactauna guerrara pirdirishcaras mana rimanuca. Caita randi Bibliara quillcajcuna Israel llacta guerrara pirdishcara Bibliai cuintanuca. Shinallara paiguna mana ali rurashcaunamanda quillcanuca. Shu ejemplo tupanchi 1 Timoteo. Pablo nica: ashcara pandarijpi, Yaya Dios ñucara yanapahuaca turcaringaj nisha quillcaca (1 Timoteo 1:​12-15). Bibliara quillcajcuna mana llullasha rimashcamanda yachanchi Bibliaga Diosmanda shamun nisha, chiraigu Bibliai quirina ushanchi.

10. ¿Imarasha cunan punzhaunai Bibliaga ñucanchira yanapanzhu?

¹⁰ Bibliaga “Diosmanda rimashcami. Valinmi yachachingaj, camachingaj, alichingaj, ali causanara yachachingaj” (2 Timoteo 3:16). Bibliaga Diospa shimi ashcamanda cunan punzhai ñucanchira yanapanmi. Pai ñucanchira rurashcamanda ñucanchi iyashcaunara sintishcaunaras intindinmi. Astaumbas Jehová Dios yachan ñucanchi imara ministishcara o mana ministishcaras. Pai ñucanchimanda mas yachanmi, astaumbas cushi causachu munan.

11, 12. a) ¿Ima Jesús ali yachachishcauna Mateo 5 a 7​pi tupanchi? b) ¿Ima shuj ali iyaigunara Bibliai tupanchi?

¹¹ Mateo 5 a 7​pi ali yachachishcauna tupanchi. Jesús  nica imasnara cushi causashun, imasnara shujcunahua ali apanunushun, imasnara Yaya Diosta oracionda rana, astaumbas imara iyarisha ricuna anchi cullquimanda nisha. Jesusga chi yachachishcauna 2.000 huatauna huashai rimashaga, cunangama yanapana ushanun.

¹² Bibliai ali iyaiguna ñucanchi familiahua cushi causangaj, ali tarbajcuna tucungaj, shujcunahua ali causangajpas yanapan. Shinallara ima tunu runaunaras, maibis causajcunara, maican problemaguna charijcunaras Bibliamanda iyaiguna ñucanchira yanapana ushanmi (leapai Isaías 48:17; nota 3 ricungui).

13. Isaías Babilonia llactamanda ¿ima tucungaraushcara rimaca?

¹³ Bibliai ashca profeciaguna ña pactarishca. Jehová Diosga Profeta Isaiasmanda rimacami Babilonia llacta imasna tucuchishca anga (Isaías 13:19). Babilonia llacta atun punguunahua rurashca aca, shu atun yacu muyuchishca. Isaías nica chi yacura largasha chaquichishca anga, shinallara punguuna pascashca anga. Shina ajpi Babiloniara mana macanusha llaquichinunga. Isaías rimaca chi llactara llaquichij shuti, Ciro nishca anga (leapai Isaías 44:​27–45:2; nota 4 ricungui).

14, 15. ¿Imasnara Jehová Diosga Isaiasmanda rimashca profecía pactarica?

¹⁴ Isaiasga chi profeciara 200 huatauna quillcashca huasha, shu suldaruuna Babilonia llactama macanungahua pactanuca. ¿Pita suldaruunara pushaca? Profecía rimashca cuinta, Persiamanda rey apumi Ciro nishca aca. Shina tucujpi cai profecía pactaringarauca.

¹⁵ Chi tutai Babilonia llactai istara rurarianuca. Paiguna atun rumihua sicachishca, shu yacu muyuchishca  llacta ucui tiashcamanda, cuirashca sintirinuca. Shinajpi Babilonia llacta mayambi Ciro paihua suldaruunahua atun yacura largasha chaquichinuca, yacura chaquichishca huasha suldaruuna pasana ushanuca. Shina rasha ¿imasnara rumihua sicachishca ucuma pasanuca? Isaías rimashca profecía cuinta punguuna pascashca  saquirinuca. Shina ajpi suldaruuna Babilonia llactara mana macanushas llaquichinuca.

16. a) Isaiasga ¿imara Babilonia llacta tucungaraun nisha rimaca? b) ¿Imarasha yachanchi Isaías profeciaga pactarica?

¹⁶ Isaiasga rimaca Babilonia llactai timpu pasashca huasha mana pis causashca anga. Pai quillcaca: “Ima huraspi chi llactai mana pis causanungachu” (Isaías 13:20). ¿Pactaricachu cai shimiuna? Ari, ñaupa Babilonia llacta tiashcai, cunan Irak llactaibi tian, Bagdad llacta mayambi. Shinallara chi lugarbi rumi muntunlla tian, mana pis causanzhu. Biblia rimashca cuinta Jehová Dios Babilonia llactara tucuchica (Isaías 14:​22, 23). *

17. ¿Imarasha Yaya Dios rimashca shimiunai quirina ushanchi?

¹⁷ Bibliamanda ashca profeciaguna ña pactarishcami, chiraigu Bibliai rimashcara huasha punzhauna ima  pasanara quirina ushanchimi. Shinallara quirinchi Jehová Dios cai Allpara alichingaraun shu ali gustu paraíso tucuchu (leapai Tito 1:2). Ari, ‘Jehová rimajpiga, pactachingami’ (Números 23:19). *

18. Apóstol Pabloga ¿imara nica Diospa shimimanda?

¹⁸ Ña ricushcangui Bibliaga shujta librogunamanda mas yapa valishca an, chimandallara riman. Historiamanda o cientificoguna yachachishcaunamanda rimashaga mana pandanzhu. Astaumbas ali yachachishcauna, ashca profeciaguna ña pactarishca tian. Apóstol Pablo quillcaca: “Diospa shimi causajmi, ushajmi”. Cai shimiuna ¿imara nisha nin? (Leapai Hebreos 4:12).

19, 20. a) Bibliaga ¿imasna canllarami yanapan? b) Canga ¿imasnara Biblia gustu cuyashcara pagarachungui?

¹⁹ Bibliaga camba causaira turcachina ushan. Canllara ricsiringahua yanapana ushanmi. Camba iyaigunara sintirinaunaras intindingahua yanapan. Maicambi Diosta llaquini nisha rimanchi. Shinajpi Diosta llaquishcara ricuchingahua Bibliai tiaj mandashcaunara casuna anchi.

²⁰ Bibliaga Yaya Diosmandami shamun. Pai munan Bibliara leachu, estudiachu, astaumbas llaquichu. Cai gustu Yaya Dios cuyashcara pagarachungui. ¿Imasnara pagarachushcara ricuchina ushangui? Bibliara estudiasha. Shina rasha shamuj temai intindinguimi Yaya Dios ima rangahua Allpara rurashca.