1-3. a) Shu runa huañujpi ¿imara runauna tapurinun? b) Huaquin religionguna ¿imara rimanun huañunamanda?

BIBLIAGA riman shamuj punzhaunai “ña huañuna illanga” (Ricuchina 21:4). Tema 5​pi yachashcanchi quishpichinamanda huiñai causaira charina ushanchi. Shinajpi chara huañusha catinchi (Eclesiastés 9:5). Chiraigu huaquimbi tapurinchi: “Huañushca huasha ¿imara tucunchi?”.

² Maican huras aillu huañujpi o amigo huañujpi chi tapuira cutipashcara yachana ministishca an. Tapurishcanchichari: “Pai ¿maibira an? ¿Ricunzhu? ¿Turmindariunzhu? ¿Yanapana ushanzhu? ¿Shu punzha cutillara ricushun?”.

³ Religionguna cai tapuigunara shuj tunu cutipanun. Maicanguna yachachinun aliuna ahua pachama rinun, manaliuna ucu pachama rinun nisha. Shujcuna ninun shu runa huañushca huasha, alma causasha catiun, paihua huañuj ailluunahua tuparin. Shujcuna ninun huañushcauna taripashca tucushca huasha cutillara causarinun shu tunu aichaiyuj, astaumbas shu tunu runa o animal cuinta tucusha.

4. Religionguna ¿imara huañuimanda yachachinun?

⁴ Religionguna huañuimanda ashca iyaiguna rimashas, ñaca tucuiguna chimandallara yachachinun: huañushca huasha, almaga chara causasha catiun nisha. Chiga ¿ciertochu?

5, 6. Huañushca huasha ¿imara tucunchi?

⁵ Jehová Dios yachanmi imara tucunchi huañushca huasha, pai ninmi shu runa huañusha, chibi tucurin. Huañushca huasha, ricunara, uyanara, iyarinaras ña mana ushanchichu. Mana charinchi shu alma causasha catichu shuj lugarbi. *

⁶ Biblia nin huañushcauna “imaras mana yachanun”. Mana llaquinun, mana chijninun. Astaumbas nin “ña tarbana ima ruranaras yachanaras intindinaras pambariaushcai can riushca lugarbi, mana mas tianzhu” (leapai Eclesiastés 9:​5, 6, 10). Shinallara Salmo 146:4 nin maican runa huañusha “paihua iyaigunas” tucurin.

7. ¿Imara Jesús huañunamanda rimaca?

⁷ Jesús paihua amigo Lázaro huañushcai paita catijcunara nicami: “Ñucanchi llaquishca amigu Lázaro puñunmi. Puñushcamanda paita llicchachingaj riunimi”. ¿Imara nisha nica? Huasha intindichica: “Lázaro huañushcami” (Juan 11:​11-14). Jesusga huañuimanda rimashaga puñui cuintami nica. Pai mana nicachu Lázaro ahua pachama o paihua huañuj ailluunahua tuparingaj rica. Shinallara mana nicachu Lazaroga ucu pachai turmindariun, mana nicachu cutillara causarica shu tunu runai o animal cuinta tucusha. Mana, Lázaro huañujta puñushca cuintami aca. Bibliai shuj textoguna ricuchin huañuiga shu puñui cuintami an. Bibliaga yachachin, Jesusta catij Estebanda huañuchishcai “huañusha puñucami” (Rashcauna 7:60). Astaumbas apóstol Pablo quillcacami, maican Jesusta catijcunaga ‘huañusha puñunuca’ (1 Corintios 15:6).

8. ¿Imarasha yachanchi Yaya Dios ñucanchira mana huañunuchu rurashcara?

 ⁸ ¿Yaya Dios runaunara huañunuchu rurarca? Mana. Jehová Dios Adanda Evaras ali gustu huiñaigama causanuchu rurarcami. Astaumbas huiñaigama causangahua munaira cuca (Eclesiastés 3:11). Mana pi yaya gustanzhu paihua huahuauna ungunuchu huañunuchu. Shinallara ñucanchi Yaya Jehová Dios mana gustanzhu ñucanchi ungurinuchu huañunuchu ricungahua. Yaya Dios ñucanchira huiñaigama causangaj rurajpiga ¿imarasha huañunchi?

9. ¿Imarasha Yaya Dios Adanda Evaras mandashcara alimi, mana shinzhichu aca casungahua?

⁹ Ali gustu pamba Edembi tucui callarica. Jehová Dios, Adanda nicami: “Ali gustu pambai tiaj tucui yuramanda icsa undandagama micui nisha. Shina ajpis alira manalira yachana yuramanda, ama micunguichu, chi yuramanda micushaga, ursa huañunguimi” (Génesis 2:​9, 16, 17). Chi pasajta mandashcara mana shinzhichu aca casungahua. Jehová paiguna Ruraj ashcaraigu paillami yachaca paigunaj ima ali anara. Adán Evahuas Jehová Diosta casusha, paihua mandashcara respetashcara ricuchinunmaca pai cushcamanda agrasinunmaca.

10, 11. a) ¿Imasnara Satanasga Adanda Evaras Diosta mana casunuchu rurarca? b) Adán Evahua ña yachashallara ¿imara ruranuca?

¹⁰ Adán Evahua Yaya Diosta mana casunucachu. Satanás Evara rimaca: “¿Ciertochu Dios tucui yuraunamanda muyura ama micunguichichu cangunara nicairi?”. Eva paita cutipaca: “Ali gustu pambamanda yuraunai tiaj muyura micunara ushanchi. Astaumbas ali gustu pamba chaupii shayaj yuramanda muyura, Dios nica: ‘Ama micunguichichu, mana, mana apinguichu mana huañungahuas’” (Génesis 3:​1-3).

¹¹ Shina ajpis Satanás Evara nica: “Mana huañunguichichu. Dios yachanmi chi micushca punzhallara camba ñahuiunara pascarinungami, astaun Dios cuinta tucusha aliras manaliras riparanguichimi” (Génesis 3:​4-6). Satanás munaca Eva iyarichu paillara aliras manaliras ajllana ushashcara. Satanás Evara llullacami uyashca huasha ima tucunaras. Pai rimacami mana huañunguichu, chiraigu Eva chi muyura micucami. Chi huasha paiga, paihua carira muyura cusha paihuas micuca.  Adán Evas yachanucami, Jehová Dios chi muyumanda mana micuna anguichi nishcara. Micushaga chi ali mandashcara mana casushcara ricuchinuca. Paiguna ajllashcahua Adán Evandi paihua llaquishca ahua pachai tiaj Yayara mana respetashcara ricuchinuca. Ña yachashallara, mana casunuca, chiga manalichu aca.

12. ¿Imarasha Jehová Dios, Adán Evahua nanarishca sintirica?

¹² Jehová Dios ashca nanarishca sintirica Adán Evahuas. Pai paihua Yaya ashcara, paiguna mana respetashcara ricuchinuca. Iyari, can camba churira o ushira iñachingaj ashcara ursaringui. Shinajpi paiguna canhua cuntra tucusha, paiguna munashcallara ruranun. ¿Cierto yapa llaquirishca sintiringuima?

13. Jehová Dios ¿imara intindichica Adanda cuti allpa pulvumallara tigrangaraungui nisha?

¹³ Adán Evahua mana casusha, paiguna huiñai causaira chingachinuca. Jehová Dios Adanda nica: “Allpa pulvu angui, pulvumallara tigrangui” (leapai Génesis 3:19). Jehová Dios intindichica Adán cuti allpa pulvumallara tigrangaraun nisha, mana ima huras tiashca cuinta (Génesis 2:7). Huañusha, pai chibi tucurica.

14. ¿Imarasha huañunchi?

¹⁴ Adán Evahua paiguna Yaya Diosta casushca ashaga, cunan punzhaunai chara causana  catinunmaca. Paiguna mana casusha, ucha rasha shu timpu huasha huañunuca. Uchaga shu milli ungüi shina, ñucanchi punda yayaunamanda ungüira apishcanchi. Tucui runauna uchayuj pagarishcamanda huañunchi (Romanos 5:12). Jehová Diosga mana munacachu runauna ima huraspas huañunuchu nisha. Chiraigu Biblia riman huañuiga shu ‘chijnijmi’ an (1 Corintios 15:26).

15. Huañuimanda cierto shimira yachana ¿maican llulla yachachinamanda caruyachin?

¹⁵ Ashca religionguna yachachinun huañushcauna shuj lugarbi causasha catinun, ñucanchi paigunara yanapana ushanchi nisha. Maicambas huañujpi paihua ailluuna religiongunara pushajcunara cullquira cunun chi runamanda oracionda rasha mañachu o misa rurachu. Biblia yachachinmi huañushcauna mana turmindarinunzhu. Ñucanchi paigunahua rimana yanapana mana ushanchi. Paigunas ñucanchira rimana yanapana huajlichinas mana ushanunzhu. Chiraigu paigunara mana manzhanachu anchi. Huañuimanda cierto shimira yachana, llulla yachachinamanda caruyachin.

16. ¿Ima llulla ashca religionguna huañushcaunamanda yachachinun?

¹⁶ Satanás panda religiongunahua ñucanchira umachin astaumbas huañushcauna chara causasha catishcara iyachu munan. Chiraigu maican religionguna yachachinun huañushca huasha causasha catinchi shuj lugarbi. Camba religión shina ¿yachachinzhu? o Biblia rimashcara ¿yachachinzhu? Satanás cai llullaunahua runaunara Diosmanda caruyachin.

17. Manaliuna ucu pachai rupanun nisha yachachishcara ¿imarasha Jehovamanda piñasha yachachinun?

 ¹⁷ Ashca religionguna huañunamanda yachachisha, Jehovamanda piñasha rimanun. Huaquinguna ninun manaliuna ucu pachai rupanunga. Chi mana ciertochu an, Jehová mana ima huras casna runaunara turmindachingachu (leapai 1 Juan 4:8). Can ¿imara iyanguima shu yaya paihua churi maquira rupachisha castigajpi? Manali yaya ajta iyaringuimi, paihua amigo tucungahua mana munanguichu. Shinallara Satanás munan ñucanchi Jehovamanda iyachu.

18. ¿Imarasha huañushcaunara mana manzhana anchi?

¹⁸ Huaquin religionguna yachachinun huañushca huasha, aya tucunchi. Shinallara ninun chi ayaunara respetasha manzhaira charina anchi, paiguna ali ayauna, manali ayauna ashcaraigu. Ashca runauna chi llullara quirishcamanda huañushcaunara manzhanun. Astaumbas huaquinguna huañushcaunara ahuayachinun aduranun, Jehová Diosta adurana randimanda. Iyaringui huañushcauna mana imas sintinunzhu mana imaras ruranunzhu. Chiraigu mana manzhaira charina anchi. Jehová ñucanchira Ruraj Cierto Diosmi an. Paillarami adurana anchi (Ricuchina 4:11).

19. Huañuimanda ciertora yachanaga ¿imasnara yanapan?

¹⁹ Huañuimanda ciertora yachana, religión llulla yachachinamanda caruyachin. Shinallara Jehová shamuj punzhaunai ima gustu rurangaraushcara ali intindingahua yanapan.

20. ¿Ima tapuira shamuj temai yachangaraunchi?

²⁰ Ashca timpu huashai, shu Diosta sirvij Job, tapucami: “Shu runa huañujpi, ¿cutillara causana ushangachu?” (Job 14:14). Shamuj temai yachangaraunchi Biblia cutipashcara.