1. ¿Imara tapuringuichari cai librora estudiashca huasha?

CAI LIBROI ashca Bibliamanda yachachishcaunara ña yachashcangui, imasna Yaya Dios huiñai causaira cungaraun, huañushca huasha imara tucunchi, astaumbas huañushcauna causarinungami nisha (Eclesiastés 9:5; Lucas 23:43; Juan 5:​28, 29; Ricuchina 21:​3, 4). Maicambi ña Jehovahuaj testigoguna tandarinaunama riungui, paiguna ali religionmi nisha quiringui (Juan 13:35). Shinallara Jehová Dioshua ali amigo tucungaj callarishcangui paita sirvingaj ajllashcangui.  Chiraigu tapuringuichari: “¿Imara mas rurana ani Yaya Diosta sirvingahua?”.

2. ¿Imarasha Etiopía llactamanda runaga bautisaringaj munaca?

² Shinami shu runa Etiopía nishca llactamanda tapurica, Jesuspa punzhaunai. Jesús ña causarishca huasha, paihua catij Felipe, chi runara Diospa Shimimanda yachachisha, ricuchica Jesús Mesiasmi nisha. Cai etíope runaga ña alira intindishaga, chi ratullaira nica: “Caibimi yacu. ¿Imara arcan ñuca bautisaringaj?” (Rashcauna 8:​26-36).

3. a) Jesús paita catijcunara ¿imara mandaca? b) ¿Imasna runauna bautisarina anun?

³ Bibliaga pasajta ricuchinmi Jehová Diosta sirvina munashaga bautisarinami angui. Jesusga paita catijcunara mandacami: “Runaunara yachachichi tucui llactaunai, paigunara bautisaichi” (Mateo 28:19). Paiga bautisarisha casna ricuchica. Umallai yacura mana churarcachu, chi randiga paihua intiru aichara yacu ucui icuchishca tucuca (Mateo 3:16). Cunan punzhaunai shu Diosta sirvij runara bautisangahua, shinallarami yacu ucui intiru runara icuchina an.

4. Bautisarinaga ¿imara ricuchin?

⁴ Bautisarinaga shujcunara ricuchinmi shu runa intiru shunguhua Diospa amigo tucusha sirvina munashcara (Salmo 40:​7, 8). Chiraigu tapuringuichari: “¿Imara rurana ani bautisaringahua?”.

5. a) Manara bautisarishcallaira ¿imara rurana angui? b) ¿Imarasha valishca an Jehovahuaj testigoguna tandarinaunama ringaj?

⁵ Manara bautisarishcallaira, can Jehová Diosta, Jesustas ricsina angui. Bibliara estudiasha, ña yachangaj  callarishcangui (leapai Juan 17:3). Shinajpi ¿imara mas rurana angui? Biblia nin, Diospa munaimanda can ‘pactajta yachana’ angui (Colosenses 1:9). Jehovahuaj testigoguna tandarinaunaga yanapangami can Jehovahua ali amigo tucungaj. Chiraigumanda cai tandarinaunama mana pishiyanachu angui (Hebreos 10:​24, 25).

6. ¿Masna Bibliamanda yachana angui bautisaringahua?

⁶ Jehová mana chapacachu etíope runa intiru Bibliara intindichu bautisaringaj. Shinallara, Jehová Dios mana chapanzhu can intiru Bibliara ricsichu bautisaringaj (Rashcauna 8:​30, 31). Tucui huras Jehovamanda yachasha catingaraunchi (Eclesiastés 3:11). Shinajpi bautisaringahua, Diospa Shimimanda ñaupa punda yachanaunara ricsina, casunami angui (Hebreos 5:12).

7. ¿Imasna Bibliamanda yachanaga canda yanapashca?

⁷ Biblia intindichinmi “quirina illaj, mana ushaihuajchu Diosta cushiyachingaj” (Hebreos 11:6). Chiraigu bautisaringaj, can quirinami angui. Shinallara Bibliaga yachachinmi maican runauna ñaupa Corinto llactai, Jesusta catijcunara “uyasha quirinauca, bautisarinauca” (Rashcauna 18:8). Shinallara Bibliara estudiashcamanda Jehová Dios rimashca shimiunai, astaun Jesús huañushcamanda ñucanchira uchamanda, huañuimanda quishpichishcara mas quiringahua yanapashca (Josué 23:14; Rashcauna 4:12; 2 Timoteo 3:​16, 17).

8. ¿Imara animanga can yachaushcamanda rimangaj?

⁸ Can mas Bibliamanda yachasha, imasna camba  causaibi yanapashcara ricusha, camba quirina mas shinzhiyangami. Can yachaushcamanda shujcunara rimana munanguimi (Jeremías 20:9; 2 Corintios 4:13). Shinajpi ¿pitara cuintana munangui?

9, 10. a) ¿Pigunahua can yachaushcamanda rimana ushangui? b) ¿Imara rurana angui congregacionhua pariju Bibliamanda yachachinama llucshingaj?

⁹ Huaquimbi can yachaushcamanda camba aillura, amigogunara, vecinogunara, escuelai o tarbanai cumpañajcunaras rimana ushangui. Cai sumajmi an, shinajpi tucui huras llaquihua, respetohua rimangui. Chi huasha congregacionhua pariju Bibliamanda yachachingaj llucshina ushangaraungui. Ña purunturishca sintirijpi canda Bibliamanda yachachij testigora rimana ushangui, congregacionhua Bibliamanda yachachingaj llucshina munani nisha. Yachachij testigo can ña purunturishca ajpi ricusha, can Biblia rimashca cuinta causajpi cangunaga ishqui Tandarijcunara Cuirajcunahua tandaringuichi.

¹⁰ Chi tandarinai Tandarijcunara Cuirajcuna, canhua rimanunga yachangaj can Bibliamanda ñaupa punda yachanaunara intindishcara, quirishcaras, astaun Biblia mandashca cuinta causashcara. Paiguna ricununga can ciertora pacha Jehovahuaj testigo tucuna munashcara. Iyaripai, Tandarijcunara Cuirajcuna tucui huauqui paniunaras cuiranun, candas shinallara. Chiraigu paigunahua cuintaringaj mana manzharingui (Rashcauna 20:28; 1 Pedro 5:​2, 3). Chi tandarina huasha, Tandarijcunara Cuirajcunaga can Bibliamanda yachachingaj llucshina ushangui nisha rimanunga.

11. ¿Imarasha Bibliamanda yachachinama manara llucshishcallaira ansa turcaigunara rurana anchi?

 ¹¹ Huaquimbi Tandarijcunara Cuirajcunaga, Bibliamanda yachachinama manara llucshishcallaira, ansa turcaigunara rurana angui nisha rimanunga. ¿Imarasha caita ministishca an? Bibliamanda yachachishaga Diospa partimanda rimanchi. Chiraigu ñucanchi causaihua paita ahuayachina anchi (1 Corintios 6:​9, 10; Gálatas 5:​19-21).

12. ¿Imarasha tucuiguna aripintirina anchi?

¹² ¿Imara mas rurana angui manara bautisarishcallaira? Apóstol Pedro nicami: “Aripintirichi, Diosma tigraichi, canguna uchaunara pichai tucungaj” (Rashcauna 3:19). ¿Imara an aripintirinaga? Ñaupa timpuuna manali rashcaunamanda tucui shunguhua llaquirinami anchi. Astaumbas can ñaupa uchara ruraj asha, aripintirinami angui. Shinajpis ¿can tucui huras alira rurangaj ursarisha? Shinallara aripintirinami angui, tucuiguna uchara ruranchi, chiraigu Jehová ñucanchira perdonachu ministinchi (Romanos 3:23; 5:12).

13. “Tigraichi” nishca ¿imara ricuchin?

¹³ Ñucanchi rurashcaunamanda ¿llaquirinallachu anchi? Mana. Apóstol Pedro nica: “Tigraichi”. Caita ricuchin manalira ranara saquinami anchi, alira rurangaj. Caita iyari: can mana ricsishca lugarma riungui, chi huasha shuj ñambima riushcara riparangui. ¿Imara rurangaraungui? Alinlla riusha, chapausha, cutillara ali ñambima tigranguimi. Shinallara Bibliara estudiasha intindingaraungui can  huaquin turcaigunara, chara rurana ashcara. Chiraigu turcarina ajpi, turcaringui alira rurasha catingaj.

14. ¿Imara rurana anchi Yaya Diospajma mingaringahua?

¹⁴ Shinallara manara bautisarishcallaira, Yaya Diospajma mingarina angui. Caita rurangahua shu runaga shungumanda shu oraciombi Diosta nin, canda adurangaj, sirvingaj ñuca causaibi pundai churashami nisha (Deuteronomio 6:15).

15, 16. ¿Imarasha shu runa Diospajma mingaringa?

¹⁵ Jehová Diosllara sirvisha nisha, shu cari paihua huarmira huañunagama llaquisha nishca cuintami an. Iyari huaquin noviogunai. Novioga caran punzha paihua noviara mas ricsishaga, paita llaquingaj callarin, paihua casarana munanmi. Caiga yapa valishca decisión asha, tucuibi pactachina munan, paihua noviara ashcara llaquishcamanda.

¹⁶ Can Jehová Diosta ricsisha catisha, paita llaquingaj callaringui, pai munashca cuinta sirvingaj munangui. Caita yanapanga Diospajma mingaringaj. Jesús paita catijcunara nica: “Pihuas ñucallara catisha nisha, ‘Mana imaschu ani,’ nichu” (Marcos 8:34). Caita ricuchin Jehová Diosta ñaupa pundai casunami anchi. Shinallara can munashcaras rurana randi, Diospa munaira ruranara mas valishcami anga (leapai 1 Pedro 4:2).

17. ¿Imarasha huaquin runauna Diospajma mana mingarinun?

¹⁷ Maican runaunaga Jehová Diosllara sirvisha nishcara mana pactachina ushashachu manzhashcamanda,  Diospajma mana mingarinun. Paita mana llaquichinara munanun. Huaquinguna iyarinun, Diospajma mana mingarishcamanda, pai mana taripangachu nisha.

18. ¿Imara yanapanga pandarina manzhaira saquingahua?

¹⁸ Can Jehová Diosta llaquinaga pandarina manzhaira saquingahua yanapangami. Shina ajpi paillarami casusha sirvisha catingaj yanapanga (Eclesiastés 5:4; Colosenses 1:10). Astaumbas ricungaraungui Diospa munaira pactachina mana shinzhi ashcara. Apóstol Juan rimacami: “Diosta llaquina casnami, ñucanchi pai mandashcaunara pactachingaj. Dios mandashcaunaga mana turminduscunachu” (1 Juan 5:3).

19. ¿Imarasha Jehová Diospajma mingaringahua mana manzhanachu angui?

¹⁹ Mana ministirinzhu ucha illaj anara, Jehová Diospajma mingaringaj. Pai mandan ñucanchi pactachina ushashca tupulla (Salmo 103:14). Astaumbas alira rurangaj Jehová canda yanapangami (Isaías 41:10). Biblia ninmi: “Paillarami camba ñambira alira pushanga”. Chiraigu Jehová Diosllai intiru shunguhua quiringui (Proverbios 3:​5, 6).

20. ¿Imara rurana angui Diospajma mingarishca huasha?

²⁰ ¿Can Jehová Diospajma mingaringahua ña purunturishca angui? Can Diospajma mingarishaga, ña purunturishca angui bautisaringahua.

21, 22. ¿Imasnara tucuigunama can quirishcara ricuchingaraungui?

²¹ Camba congregaciombi maicandas cuiraj huauquira rimangui, Jehová Diospajma mingarishcani,  bautisarina munani nisha. Chi huasha Tandarijcunara Cuirajcuna, canhua pariju Diospa Shimimanda ñaupa punda yachanaunamanda ricununga. Paigunaga, can purunturishca ajpi ricusha, shamuj Jehovahuaj testigogunaj asambleai bautisarina ushangui nisha rimanunga. Asambleai shu yachachishcara uyanai ricuchinga imara an bautisarina. Cai yachachishcara uyana cuj huauquiga tucui bautisaringaraujcunara  ishqui tapuira ruranga. Can cutipashcai “quirinimi, nisha” ricuchingaraungui (Romanos 10:10).

²² Chi huasha, can bautisaringaraungui. Yacu ucui icuchishca tucungui. Can bautisarishaga tucuigunama ricuchingui, can Diospajma mingarishcara, chi ratumandallara Jehovahuaj testigo tucushcara.

23. ¿Imara ricuchin “Yaya shutii, Churi shutii, Santu Ispíritu shutiis” bautisarinaga?

²³ Jesús mandacami paihua catijcunara “Yaya shutii, Churi shutii, Santu Ispíritu shutiis” bautisarinuchu (leapai Mateo 28:19). ¿Imara yachachin cai shimiuna? Ricuchin ñucanchi quirinchi Jehová mandana ushaira charishcara, pai imasna Jesusraigu paihua munaira pactachishcara, shinallara imasna Jehová paihua espíritu santohua paihua munaira pactachishcara (Salmo 83:18; Mateo 28:18; Gálatas 5:​22, 23; 2 Pedro 1:21).

24, 25. a) ¿Imara ricuchin bautisarina? b) ¿Imara ricushun shamuj temai?

²⁴ Bautisarinaga sumaj valishcami. Intiru aichara yacu ucui icuchishca ajpi, can ñaupa causaira saquishcara ricuchingui. Yacumanda llucshisha, shu mushuj causaira Jehovahua munaira rurangaj callaringui. Chi ratumandalla Diosta sirvij ashcara ricuchingui. Iyari, can mana mingarishcangui shu runara, organizacionda, tarbanaras. Camba causaira Jehová Diospajma mingarishcangui.

²⁵ Can Jehová Diospajma mingarishcamanda, paihua mas amigo tucuna ushangui (Salmo 25:14). Bautisarishcamanda ña quishpirishca ani nisha, mana iyanachu angui. Apóstol Pablo quillcacami: “Canguna alma quishpinamanda manzhashcahua chucchushcahua tarabaichi” (Filipenses 2:12). Bautisarinaga callarinallami an. Shina ajpi, ¿imasnara Diospa amigo tucusha catina ushangui? Cai puchucai tema yachachinga.