1. Cari huarmi manara casarashallara, pariju causana ¿alichu an?

CASARANARA Jehová callarichica. Biblia ninmi, punda huarmira rurasha, carira cuca. Adán ashca cushihua paimanda nica: “Ñuca tullumanda tulluuna ñuca aichamanda aicha” (Génesis 2:​22, 23). Casna rasha Jehová Dios Adanda Evarasmi casarachica. Cunan timpugama Jehová munanmi cari huarmihua registro civilbi casarachu, manara pariju causashallara.

2. Jehová Dios ¿imasna familiaguna causanuchu munan?

² Jehová munanmi casarashcauna cushi causanuchu. Shinajpi ashca runauna cushi familia charingahua mana ushanushcachu. Bibliai tianmi ali iyaiguna, camachishcauna familiagunama, ali cushi causaira charinuchu (Lucas 11:28).

3, 4. a) ¿Imara cariga rurana an? b) ¿Imarasha cari huarmihua perdonarinuna ministishca an?

³ Biblia ninmi shu ali cari, paihua huarmira llaquihua respetohua cuiranmi (leapai Efesios 5:​25-29). Cariga huarmira llaquishcara ricuchinami. Shinallara paita cuiranmi, milli shimiunahua mana rimanachu an, mana macanachu an.

⁴ ¿Imara rurana an cariga huarmi pandarijpi? Bibliaga cariunara yachachinmi: “Canguna huarmiunara llaquichi. Paigunahua ama milli tucuichichu”  (Colosenses 3:19). Cariuna, iyarichi cangunas pandarijcunami anguichi. Shinallara Yaya Dios cangunara perdonachu munashaga, canguna huarmiunara perdonana anguichi (Mateo 6:​12, 14, 15). Cari huarmihua pariju perdonanusha, cushi familia charinungami.

5. ¿Imarasha cariga huarmira valichina an?

⁵ Jehová munanmi cari huarmira llaquihua valichichu. Cariga mascanami an huarmira imasna rasha yanapanara. Micunara, churarinara cuna an. Paihua huarmihua cuintaringaj timpu llucchisha, intindinami an imasna sintirishcara. Caiga ashca valishcami. Huarmira manali cuirajpi paihua oraciongunara Jehová mana uyangachari (1 Pedro 3:7). Jehová mana ricunzhu cari huarmimanda mas valij ashcara. Paita llaquijcunara ashcara valichinmi.

6. ¿Imara intindichin casarashca cari huarmihua “shu aichalla” tucunamanda?

⁶ Jesús yachachicami casarashca cari huarmi “mana ishquichu anaun astaun shu aichalla” (Mateo 19:6). Cari huarmihua parijumanda llaquinusha, shujcunahua mana tacarisha (Proverbios 5:​15-21; Hebreos 13:4). Casarashca cari o huarmi paigunapura pariju puñusha causanara, mana caran quiquin munashcara ranachu an (1 Corintios 7:​3-5). Cariga iyarinami an “mana imahuraspas pi runas paihua quiquin aichara chijnicachu”, astaumbas “carán, cuiran”. Cari paihua huarmira llaquishcara ricuchinami an. Huarmi paihua cari llaquishcara ricuchichu ashcara munanmi (Efesios 5:29).

7. ¿Imarasha tucui familiaguna shu pushaj uma cuinta ministinun?

⁷ Caran familia shu pushaj uma cuinta paigunapura alira tarbangahua ministinmi. Bibliaga 1 Corintios  11:3​pi riman: “Caran cari uma Cristomi; shinallara caran huarmi uma paihua carimi. Cristo uma Diosmi”.

8. ¿Imasnara huarmiga paihua carira respetora ricuchin?

⁸ Tucui cariuna pandarinunmi. Shinajpi huarmi paihua carira yanapajpi, intiru familia cushi sintiringami (1 Pedro 3:​1-6). Bibliaga yachachin: “Huarmiga paihua carira uyachu” (Efesios 5:33). Shinajpi, cari mana chi tunullara quirinara charijpi ¿imara rurana an? Shina ajpis huarmiga paihua carira respetashcara ricuchinami an. Biblia shinallara nin: “Huarmiuna, canguna cariunara uyana anguichi. Shinashas, shimira mana quirij cariunara ganashca anaunga, shimira mana uyashas, paiguna huarmiuna ali causashcara ricusha. Cariuna canguna sumaj causashcara canguna manzhashcaras ricusha quirinaungami” (1 Pedro 3:​1, 2). Huarmi ali rurashcaga yanapangami carira paihua quirishcara intindingahua respetangahuas.

9. a) Huarmiga paihua cari cuinta mana iyashaga ¿imara rurana ushan? b) ¿Ima camachishcara Tito 2:4, 5​pi huarmiunama tian?

⁹ Huarmiga paihua cari cuinta mana iyashaga ¿imara  rurana ushan? Pai iyashcara respetohua rimana ushan. Sara rimashcara paihua cari Abrahán mana gustarica. Shinajpi Jehová Abrahanda nica: “Paihua rimashcara uyai” (Génesis 21:​9-12). Cari rimashcaras Bibliahua mana cuntra ajpi, huarmiga carira yanapanami an (Rashcauna 5:29; Efesios 5:24). Shinallara ali huarmiga huasira cuiranami an (leapai Tito 2:​4, 5). Paihua cari, paihua huahuauna pai shina rashcara ricusha, mas llaquinungami, respetanungami (Proverbios 31:​10, 28).

10. ¿Imara Biblia riman llushpirinamanda, divorciarinamandas?

¹⁰ Huaquin casarashcauna uctalla llushpirinun, divorciarinun. Shinajpi Biblia nin “huarmi carimanda ama llushpirichu” astaun “cari ama ichuchu paihua huarmira” (1 Corintios 7:​10, 11). Ciertomi an huaquimbi shinzhi problemagunamanda runauna llushpirina o divorciarina ushanun. Shinajpi caita ali iyana angui. * Bibliaga ¿imara nin divorciarinamanda? Bibliaga yachachin divorciaringahua, shu casarashca cari o huarmi mana paihua quiquin carihua o huarmihua puñusha tacarisha divorciarina ushan (Mateo 19:9).

11. Huahuaunaga ¿imara mas ministinun?

¹¹ Yayauna tucui ushashca timpura canguna churiunahua pasaichi, cangunara ministinunmi. Tucuimanda yali Jehová Diosmanda yachachichu mas ministinunmi (Deuteronomio 6:​4-9).

12. ¿Imara yayauna rurana anun paiguna huahuaunara cuirangaj?

¹² Caran punzha Satanaspa mundui mas manali ranauna tian. Ñucanchi huahuaunara huajlichingaj munaj  runauna tian. Huahuaunara huajlichina ushanun. Maican yayauna huahuaunahua cai temamanda rimangaj shinzhi an. Shinajpi yayauna cai huajlichij runaunamanda, shujta llaqui pasanamandas yachachinami anun. Yayauna canguna huahuaunara cuirana anguichi (1 Pedro 5:8). *

13. ¿Imasna yayauna paiguna churiunara yachachina anun?

¹³ Yayauna paiguna huahuaunara alira rurachu yachachina anun. ¿Imasnara rurana ushangui? Huahuaunara  libachina ministijpis, piñarishcahua, yapajta milliyashcahua mana ruranguichu (Jeremías 30:11). Piñarishcai ama libachingui. Can mana munanguichari milliyashcahua rimangaj, shu espadahua chugrichishca cuintami an (Proverbios 12:18). Huahuaunara intindichinami angui imarasha casujcuna tucuchu ministishcami (Efesios 6:4; Hebreos 12:​9-11; nota 30 ricungui).

14, 15. ¿Imarasha huahuauna yayaunara casuna anun?

¹⁴ Shinzhi ajpis, Jesús paihua Yaya rimashcara tucui huras casucami (Lucas 22:42; Juan 8:​28, 29). Jehová munanmi huahuauna yayaunara casunuchu (Efesios 6:​1-3).

¹⁵ Maicambi huahua cuinta, yayaunara casungaj shinzhi anga. Shinajpi iyari: casujpiga Jehová Diosta, camba yayaunaras yapa cushiyachinguimi (Proverbios 1:8; 6:20; 23:​22-25). *

16. a) ¿Imasna rashara Satanás maltaunara manalira rurachin? b) ¿Imarasha ministishca an camba amigoguna Jehová Diosta llaquijcuna anuchu?

¹⁶ Satanás camba amigogunahua o shuj maltaunahua manalira rurachingaj munan. Pai yachanmi caita ahuantanara shinzhi anga. Ricushun shu ejemplo Dina nishca Jacobpa ushushimanda. Paiga Jehová Diosta mana llaquij amigogunara charicami, chiraigumanda ashca problemagunara tupaca pai, paihua familias (Génesis 34:​1, 2). Camba amigoguna Jehová Diosta mana llaquijpi, maicambi manalira rurangaj animanga. Chiga yapa llaquichingami, canda, camba familiara,  Jehová Diostas (Proverbios 17:​21, 25). Chiraigu camba amigoguna Jehová Diosta llaquijcuna anami anun (1 Corintios 15:33).

17. Familia ucui caran shuj, ¿imara rurana an?

¹⁷ Familia ucui tucuiguna, Jehová Dios rimashcaunara uyashaga problemagunara mana charinungachu. Chiraigumanda can cari asha, camba huarmira ashcara llaqui. Huarmi asha, camba carira respetasha yanapai, astaun Proverbios 31:​10-31 rimashca huarmi cuinta tucui. Huahuauna charishaga Yaya Diosta llaquingaj yachachi (Proverbios 22:6). Can cari o yaya asha, familiara alira cuirasha pushai (1 Timoteo 3:​4, 5; 5:8). Churiuna, yayaunara casuichi (Colosenses 3:20). Iyarishunchi, tucuiguna familiaibi pandarinchimi chiraigu mansu shungu asha perdonahuai nisha mañana anchi. Imasna ña ricushcanchi, Bibliai Jehová Dios yachachin caran shuj imara rurana anchi familia ucui.