1, 2. ¿Ima tapuigunara huaquimbi ruranchi?

HUAHUAUNA ashca tapuigunara ruranun. Paigunara yachachishca huasha cutillara tapunun: “¿Imarasha?”. Ñucanchi ña paigunara cutipajllaira cuti tapusha catinun: “¿Imarasha?”.

² Maltauna, rucuuna ashas, tucuiguna tapuigunara ruranchi. Huaquimbi imara micushun, imara churarishun o imara randishun tapurinchi. Mana ajpiga causaimanda, shamuj punzhaunamandas tapurinchi. Shinajpi ali cutipanara mana tupangaj ushasha, mascanara saquinchi.

3. ¿Imarasha ashca runauna cutipanaunaras mana mascanun?

³ Ashca runauna valishca tapuigunaras charinun. Shinashas cutipanaunara mana mascanun. ¿Imarasha? Huaquin runauna quirinun Biblia cai tapuigunara cutipashcara, shinajpis cai libro shinzhi intindina ashcara iyarinun. Astaumbas escuelamanda profesorgunalla, sacerdotegunalla o pastorgunallas cutipanara ushanun nisha. Shujcuna manzhaira charishcamanda cutipanaunara mana mascanun. Can ¿imara iyaringui?

4, 5. a) ¿Ima valishca tapuigunara rurashcangui? b) ¿Imarasha cutipashcaunara mascasha catina angui?

⁴ Maicambi cai tapuigunara rurashcanguichari: “¿Imarangaj Dios causaira cushca? Huañushca huasha ¿imara tucunchi? Yaya Dios ¿pita an?”. Jesucristo sumaj yachachij aca. Pai nica: “Mañaichi, cui tucunguichimi. Mascaichi, tupanguichimi. Cayaichi, pascai tucunguichimi” (Mateo 7:7). Chiraigumanda, ama sambayaichu. Cierto cutipashcaunara tupanagama mascasha catilla.

 ⁵ Cutipashcaunara mascasha catishaga Bibliai tupanguillami (Proverbios 2:​1-5). Cai cutipashcaunaga mana shinzhichu an intindingahua. Astaumbas Bibliamanda yachausha cunan punzhaunai cushi causangahua yanapangami, shinallara shamuj punzhaunais gustu causaira charingaj. Ricushun cai shamuj tapuira.

6. ¿Imarasha ashca runauna quirinun Yaya Dios ñucanchira mana llaquishcara?

⁶ Intiru mundui ashca turmindusguna tian: ashca guerraguna, piñanuna, pugri runaunas tian. Ashca runauna ungurinun, turmindarinun, huañunun. Chiraigu huaquinguna tapurinun: “Yaya Dios ñucanchira llaquijpis ¿imarasha ashca turmindusguna tian?”.

7. a) ¿Imarasha ashca runauna quirinun Yaya Dios llaquichij ashcara? b)  Yaya Dios mana ima huras manalira ruranzhu nisha ¿imarasha quirina ushanchi?

⁷ Maican panda religiongunamanda pushajcunaga turmindusguna tiajpi Diospa munai ashcara ninun. Pai munashca cuinta tucuca ninun. Shina nishaga Yaya Diostami culpanun. Chiraigu ashca runauna Yaya Dios llaquichij ashcara quirinun. Shinajpi Yaya Diosga mana ima huras manalira ruranzhu. ¿Imamanda shina iyarina ushanchi? Bibliaga yachachin Yaya Dios runaunara mana llaquiunara apamun tintangaj nisha. Santiago 1:13 nin: “Shu runa tintai tucusha, ama nichu ‘Diosmanda tintashca ani,’ Dios mana ushanzhu manalihua tintai tucungaj, shinallara mana pitas tintanzhu”. Yaya Dios llaquiuna tiachu saquishca, shinajpis pai mana ima huras runaunara llaquiunara apamunzhu (leapai Job 34:​10-12). Ricushun shu ejemplo caita mas intindingahua.

8, 9. ¿Ima ejemplo ricuchin Yaya Dios ñucanchi problemagunamanda mana culpa charishcara?

 ⁸ Iyaringui, shu yaya paihua churira ashca llaquishaga, ali causaira charichu yachachin, ña paihua churi rucuyasha piñarisha huasimanda rin. Malta huanra manalira rurangaj callarisha problemagunara tupan. Can ¿imara iyangui? ¿Chi yaya culpara charinzhu paihua churi problemaguna charishcamanda? ¿Paihua churi huasimanda richu saquishcamandas? Mana (Lucas 15:​11-13). Shinallara Yaya Diosta ñucanchi problemagunamanda mana culpana anchi. Chi yaya cuinta Yaya Dios runaunara paihua piñarinuchu, manaliras ruranuchu saquishca. Chiraigu iyarinami anchi turmindusguna tiajpi Yaya Dios chita mana rurarcachu.

⁹ Yaya Dios llaquiuna tiachu saquishaga, paillara yachan imarasha. Tema 11​pi Biblia ima mas yachachishcara yachangaraungui. Shinajpi Yaya Dios ñucanchira llaquishcara, ñucanchi problemagunamanda mana culpa charishcara ciertora quiringui. Paillami ñucanchi problemagunara alichina ushan (Isaías 33:2).

10. ¿Imarasha yachanchi Yaya Diosga mana ali runauna huajlichishcara alichingachu?

¹⁰ Yaya Dios santomi an (Ricuchina 4:8). Paiga chuyaj ali rurashcara ricuchin. Chiraigu paihuajpi quirina ushanchi. Shinajpi runaunamanda mana shina rimana ushanchi. Tucuiguna huaquimbi manalira ruranchi. Shinallara shu mandaj apu runaga alira rurangaj munashas manali runauna huajlichishcara alichingahua ushaira mana charinzhu. Yaya Diosllami manali runauna huajlichishcaras alichingaj ushaira charin. Astaumbas shina rurangaj munan. Chiraigu Yaya Dios tucui manaliras tucuchingami (leapai Salmo 37:​9-11).

11. Yaya Dios ñucanchi turmindusgunara ricusha ¿imasnara sintirin?

¹¹ Yaya Dios ñucanchi turmindusgunara ricusha ¿imasnara sintirin? Bibliaga yachachin Dios ali dirichu ruranara llaquijmi nisha (Salmo 37:28). Pai tucui alira manalira rashcaunara ricunmi. Chiraigu ñucanchi turmindusgunara ricusha ashca llaquirin. Biblia ninmi Noé punzhaunai cai mundui ashca manali rashcauna tiashcamanda, Dios “paihua shungüi yapa llaquirica” (Génesis 6:​5, 6). Astaumbas paihua iyaira mana turcashcachu (Santiago 1:17). Biblia ninmi Yaya Dios ñucanchira cuiranmi (leapai 1 Pedro 5:7).

12, 13. a) ¿Imarasha runaunara llaquinchi? b)  Cai mundui turmindusgunara tiajpi ricusha ¿imasnara sintirinchi? c) ¿Imarasha yachanchi Yaya Dios turmindusgunara manali rashcaunaras tucuchinga?

¹² Biblia nin Yaya Dios ñucanchira pai tunui ricuringaj rurashca (Génesis 1:26). Caita nisha nin pai cuinta sintirina ushanchi. Biblia yachachin “Dios llaquijmi” an nisha (1 Juan 4:8). Dios tucuira llaquishcamanda ruran. Chiraigu pai llaquij ashcamanda ñucanchis llaquinchi. Shina ajpi mana culpara charij runauna turmindusgunara charijpi ricusha llaqui sintirinchi, shinallara Yaya Dios chita ricusha mas llaquirin.

¹³ Cuna iyari: can cai mundui tiaj turmindusgunara, manali rashcaunaras tucuchingaj ushashaga ¿tucuchinguimanzhu? Ari, tucuchinguimi runaunara llaquishcamanda. Shinajpi Yaya Dios ¿imara ruranga? Pai tucui turmindusgunara manali rashcaunaras ñucanchira llaquishcamanda, ushaira charishcamandas tucuchingami. Can ciertora quirina ushangui Yaya Dios rimashca shimiuna cai libroi ñaupa punda pangaunai quillcashca  pactachingaraushcara. Shinajpi Dios rimashca shimiunai quiringaj paita mas ricsina anchi.

14. a) Yaya Dios ¿ima shuti an? b) ¿Imarasha yachanchi Yaya Dios munan ñucanchi paihua shutira rimachu, yachachichu?

¹⁴ Can shu amigo charina munashaga ¿imara ñaupa punda ningui? Camba shutira rimangui. Shinasha, Yaya Dios ¿shu shuti charin? Ashca religionguna ninun paihua shuti an Yaya Dios o Señor nisha, shinajpi chiguna mana shutichu. Titulogunallami an, imasna apu, presidente nisha. Diosllara nin paihua shuti an Jehová nisha. Biblia ninmi: “Camba shuti Jehová ajta, canllami tucui Allpamanda astaun Atun Dios angui” (Salmo 83:18 [82:19 shuj Bibliagunai]). Yaya Dios munan paihua shutira ñucanchi ricsichu, rimachu. ¿Imarasha caita yachanchi? Bibliara quillcajcuna huaranga huaranga cuti paihua shutira Bibliai quillcashcamanda (Éxodo 3:15; 6:3). Dios paihua shutira yachachin ñucanchi paihua amigoguna tucunuchu.

15. Jehová shuti ¿imara nisha nin?

¹⁵ Jehová shuti ¿imara nisha nin? Pai paihua rimashcara pactachina ushanmi, astaumbas paillarami ruran imaras  tucuchu. Mana pis, mana imas paita arcana ushan. Chiraigu Jehovallami cai shuti charina ushan. *

16, 17. a) ¿Imarasha Jehová Tucuira Ushaj Dios an? b) ¿Imarasha Jehová Dios huiñaigama causaj Rey Apu an? c) ¿Imarasha Jehová Dios Ruraj an?

¹⁶ Imasna ña ricushcanchi Salmo 83:18 Jehová Diosmanda nin: “Canllami [...] astaun Atun Dios angui”. Biblia shuj tituloguna charin Jehová Diosmanda  rimangaj. Ricuchina 15:3 nin: “Can rashcauna, Tucuira Ushaj Señor Dios, atunmi anaun, manzhanaitami anaun”. ¿Imara nisha nin cai título “Tucuira Ushaj”? Jehová Diosmanda mas yali tucuira ushaj mana tianzhu intindichin. 1 Timoteo 1:17 nin Jehová “huiñaigama causaj Rey Apu” an. Cai título ricuchin Jehová mana callarij mana tucurij Diosmi an. Shinallara Salmo 90:2 yachachin Dios huiñai huiñaigama causaj an. Caita yachana sumajmi an.

¹⁷ Bibliaga yachachin Jehová Dioslla tucuira Ruraj ajta. Ricuchina 4:11 nin: “Señor, can valijmi angui sumajyachishcaras, ahuayachishcaras, ushairas apingaj. Can tucuira rarcangui, paiguna can munashcamanda tianaun, shinallara rashca anauca”. Casnami an, Jehová Dios tucuira ahua pachai tiaj angelgunara, estrellagunara, lamarbi tiaj aichahuaunara, yurai tiaj muyuunaras rurashca.

18. a) ¿Imarasha maican runaunaga iyarinun Diospa amigo mana tucuna ushanchi? b) Bibliaga ¿imara yachachin Diospa amigo tucunamanda?

¹⁸ Maican runaunaga Yaya Diosmanda yachausha manzharinun. Pai yapa ursayuj yapa santo yapa carui tiashcamanda ñucanchira mana llaquishcara iyarinun. Shinajpis Yaya Diosga mana munanzhu ñucanchi chi tunu iyarichu. Paiga munan can paita ricsichu. Ñucanchi amigo tucungahua munan. Biblia nin Yaya Dios: “Sirtu pacha caran ñucanchimanda pai mana caruichu” (Rashcauna 17:27). Can shina rurajpiga Yaya Dios nin cambajma ‘mayanllayamusha’ camba amigo tucusha nisha (Santiago 4:8).

19. a) Diospa amigo tucungaj ¿imara rurana angui? b)  ¿Imara Jehová Diosmanda yachasha canda cushiyachin?

¹⁹ Diospa amigo tucungaj ¿imara rurana angui? Jesús casna nisha cutipaca: “Caimi huiñai causai, canda sapalla sirtu Dios ajta ricsinauchu, shinallara can cachamushca Jesucristoras” (Juan 17:3). Jehová Diosmanda Jesusmandas yachasha catishaga paigunara mas alira ricsingui paihua amigo tucungui. Shinallara huiñai causaira charina ushangui. Caigama ña yachashcangui “Dios llaquijmi” an (1 Juan 4:16). Shinajpi ¿imara mas Diosmanda yachana ushanchi? Bibliaga nin Jehová ‘atun ali shungura, pai ahuantashcara, paihua chapaisiqui shungu, ali shungu’ ajta (Romanos 2:4). Shinallara yachachin Jehová ali Dios, “perdonaisiqui” an (Hebreos 8:12). Yaya Dios chapaisiqui, chuyaj shunguyuj an (2 Pedro 3:9; Ricuchina 15:4). Bibliara estudiashaga mas paimanda sumajta yachangaraungui.

20, 21. Yaya Diosta can mana ricuna ushashaga ¿imasnara paihua amigo tucuna ushangui?

²⁰ Yaya Diosta can mana ricuna ushashaga ¿imasnara  paihua amigo tucuna ushangui? (Juan 1:18; 4:24; 1 Timoteo 1:17). Bibliara leashaga Diospa iyashcaunara, sintirishcaunaras mas ricsinguimi (Salmo 27:4; Romanos 1:20). Jehová Diosmanda mas yachashaga paita mas llaquingui.

²¹ Shinallara yachangaraungui Jehová Dios ñucanchi llaquishca Yaya ashcara (Mateo 6:9). Pai ñucanchira causaira cushca, ali gustu causangahua. Shu yaya paihua huahuaunara llaquishcamanda shina causanuchu munan (Salmo 36:9). Bibliaga yachachin can, Jehová amigo tucuna ushangui (Santiago 2:23). Ricui, Tucuira Ruraj Jehová Diosga can paihua amigo tucuchu munan.

22. Shu runa can Jehová amigo tucungaj arcajpiga ¿imara rurana angui?

²² Bibliara estudianara saqui nisha huaquin runauna canda rimanungachari. Maicambi preocuparinun religionda saquichu. Shinajpi shuj runauna can Jehová amigo tucungaj arcajpiga ¿imara rurana angui? Bibliara estudianara ama saquinguichu. Yaya Dios mas ali amigo an.

23, 24. a) ¿Imarasha tapuigunara rurasha catina angui? b) Shamuj temai ¿imara yachashun?

²³ Bibliara estudiashaga huaquin yachachishcaunara mana intindinguichu. Chiraigumanda ministishaga, tapuigunara rurangui, yanapahuai nisha mañangui. Jesús nicami mansu shungura charichi huahuauna cuinta. Imasnara ña ricushcanchi huahuauna ashca tapuigunara ruranun (Mateo 18:​2-4). Shinallara Yaya Dios munan can, camba tapuigunara cutipanara tupangaj. Chiraigu Bibliara riparasha estudiangui astaumbas can yachashcara cierto ashcara ricungui (leapai Rashcauna 17:11).

²⁴ Yaya Diosta ali ricsingahua Bibliara estudiasha catipai. Shamuj temai yachashun imarasha Bibliaga shujta libroguna cuinta mana ajta.