Casarashaga ña shu mushuj familia tucun. Yayaunaraga llaquinara, respetanaras mana ima huras saquishas, cunaga paihua cari o huarmi mas llaquishca tucun. Shinajpi huaquin camba ailluunaga can casarashcara mana chasquinungachari. Shina ajpis Bibliamanda iyaiguna yanapangami camba cari o huarmi yayaunahua mana piñanusha causangaj shinallara camba familiahuas ali apanunungajpas.

BIBLIA NINMI: “Yayaras mamaras llaquinami angui” (Efesios 6:2). Masna huata charishas, tucui huras ministirinmi camba yayaunara valichinara, respetanas. Astaun iyarina angui camba cari o huarmi paihua yayaunara ricungaj ringahua timpura ministin. “Llaquina [...] mana chijninzhu”, chiraigu camba huarmi o cari paihua ailluhua mas apanunujpi ama piñaringuichu (1 Corintios 13:4; Gálatas 5:26).

CAMANA USHANGUICHARI:

• Ama yapajta ninguichu casna: “Camba ailluga tucui huras ñucara piñanun” o “Camba mama ñucahua mana ima huras cushiyanzhu” nisha

• Camba cari o huarmi sintishcasna sintipai

BIBLIA NINMI: “Caimanda shu runa paihua yayara paihua mamara saquinga, paihua huarmihua llutaringami. Paiguna ishqui shu aichalla tucunaungami” (Efesios 5:31). Casarashca huashas, camba yayauna chara canda cuiranara munanungami chiraigu camba familiara yanapangahua cutin cutin shamununga.

Cangunami pariju cuintanusha ajllana anguichi imaira ailluuna mana satirina anun nisha paigunahua rimangaj llaquinuna shimiunahua rimanami an. Tucui rimashas mana llaquichinachu (Colosenses 4:6). Llullu shungura, mansu shungura, mana dsas piñarij shunguras charinaga yanapanmi camba ailluunahua ali apanunungahua shinallara “parijumanda ahuantanuichi llaquishcahua” nishcaras pactachingaj (Efesios 4:2).

CAMANA USHANGUICHARI:

• Paihua causaibi paihua ailluuna yapa satirinun nisha turbarishaga camba carihua o huarmihua ama piñariushca huras cuintaringui

• Ailluuna satirinujpiga imara rashunri nisha cangunapura ñaupa punda cuintaringuichi