Camba llaquishca aillumanda ¿maicambas huañushcachu? Chi casna llaqui pasashcai tapurishcanguichari “¿Huañushca huasha causasha catinchichu? ¿Ñuca huañushca aillura cutilla ricuna ushashachu?”. Cai lecciombi, shamuj lecciombis Biblia cushiyachij cutipashcaunara ricungaraunchi.

1. ¿Huañushca huasha causasha catinchichu?

Huañuimanda rimasha Jesús nica huañujta puñushca cuinta an nisha. ¿Imasnara huañui puñuna cuinta an? Shu runa huañujta puñuushcai paihua rayai ima pasaushcara mana sintinzhu. Shu runa huañushca asha nanaira mana sintinzhu, mana turmindarinzhu. Biblia nin “huañushcaunaga imaras mana yachanunzhu” (leai Eclesiastés 9:5).

2. ¿Imasnara ñucanchira yanapan huañunamanda ima sirtu ajta yachana?

Ashca runauna huañunara, huañushcaunaras manzhanun. Cambas manzhai charijpi Biblia huañunamanda yachachishca canda ali sintingaj yanapanga. Jesús nica: “Sirtu shimi cangunara lugaryachingami” (Juan 8:32). Ashca religionguna yachachinun huañushca huasha alma causasha catin nisha shinajpis Biblia casna mana yachachinzhu. Chiraigu huañushca huasha mana pis turmindarinzhu. Huañushcauna mana imas yachashcamanda ñucanchira mana turmindachina ushanun. Mana ministinchi huañushcaunara adurana o imaras rurana paiguna ñucanchihua ama piñarinuchu nisha.

Huaquin runauna ninun huañushcaunahua cuintanuna ushanun nisha shinajpis chi mana sirtuchu. Imasna ña ricushcanchi “huañushcaunaga imaras mana yachanunzhu”. Huañushcaunahua cuintanunchi nij runauna supaigunahua cuintanurianungachari, supaiguna paigunara umachishcaraigu. Chiraigu huañunamanda sirtu ajta yachana supaigunamanda caruyachin. Jehová camachin huañushcaunahua ama cuintarinuchu nisha, pai yachan supaigunahua cuintanungaj mascajpi supaiguna ñucanchira turmindachina ushashcara (leai Deuteronomio 18:10-12).

3. Huañushca huasha ima sirtu tucushcara yachai

Intiru mundui huañunamanda runauna caran chican quirishcaunara charinun shinajpis mana tucui quirishcauna sirtu anun.

• Can causaushca lugarbi runauna huañushcaunamanda ¿imara quirinun?

 4. Huañunamanda sirtu yachana ñucanchira yanapan

Huañunamanda sirtu yachachishcara yachasha huañushcaunara mana manzhanchi. Leaichi Eclesiastés 9:10, huasha catij tapuimanda rimaichi.

• ¿Huañushcauna ñucanchira turmindachina ushanunzhu?

Huañunamanda Biblia sirtu yachachishcara ricsisha, huañushcaunara mana piñachina huañushcaunara aduranas llulla yachachishcara ña mana quirinchichu. Leaichi Isaías 8:19; Apocalipsis 4:11, huasha catij tapuimanda rimaichi:

• ¿Imara iyangui? ¿imasnara Jehová Dios sintinga shu runa huañushcaunara adurajpi, huañushcauna yanapaira mascajpi?

5. Huañunamanda sirtu yachana ñucanchira cushiyachin

Ashca runauna yachanushca causaibi manalira rurashcamanda huañusha turmindachishca anara. Shina ninujpis mana shina angachu huañushca huasha mana pis turmindaringachu, shinallara yapa manalira rajcunas mana turmindaringachu. Leaichi Romanos 6:7, TNM. Huasha catij tapuimanda rimaichi:

• Biblia yachachin maicans huañusha paihua uchaunamanda perdonashca tucushcara. Chiraigu ¿ni ushanchichu paiguna ñaupa ucharashcaunamanda turmindarianun nisha?

Jehovara mas ricsisha huañushcaunara pai mana turmindachishcara intindishun. Leaichi Deuteronomio 32:4; 1 Juan 4:8, huasha catij tapuigunamanda rimaichi:

• ¿Cai versiculogunai rimashcasna Llaquij Dios huañushcaunara turmindachichu saquingachu?

• Huañushcauna ima sirtu tucunara yachasha ¿imasnara can sintiringui?

 IMARA YACHASHCANGUI

Huañujpi chibi causai tucurin. Huañushcauna mana turmindarinunzhu, shujcunara mana turmindachinunzhu.

Iyaringaj

• ¿Huañushca huasha causasha catinchichu?

• Huañunamanda sirtura yachana ¿imasnara ñucanchira yanapan?

• Huañunamanda sirtura yachana ¿imasnara ñucanchira cushiyachin?