Cai tucushcai iyari: Jhony paihua amigogunahuas pujllaushcai paihua vecino autu ventanara shu pelotahua paquin.

Can Jhony asha, ¿imara ruranguima?

QUINSA RURANA CHARINGUI:

1. Callpasha llucshina.

2. Shujma culpana.

3. Vecinora cuintana ima pasaushcara, huajlichishcara pagana.

Maicambi A nishca ruranara ajllana munanguima. Astaun ima rurashcaras, mas ali an camba pandarishcaunara mana pacasha cuintangaj.

1. Ali rurana an.

   Biblia ninmi: “Tucui alirasha causangaj munasha” (Hebreos 13:18).

2. Can pandarishcara riparajpi shujcuna canda perdonanungami.

   Biblia ninmi: “Maican paihua manali rashcaunara pacaj mana cushira charingachu, shinajpi tucui mana pacasha rimaj, chita saquijpi sintij shungura paita ricuchingami” (Proverbios 28:​13).

3. Jehová Diosta cushiyachinguimi, chimi mas valij an.

   Biblia ninmi: “Jehová manali runaunara chijninmi, randi ali runaunahua amigo tucun” (Proverbios 3:​32).

Karina 20 huatayuj, paihua yayara pacana munaca uctalla manejashcamanda multara cunuca, llullasha mana catina ushaca. Karina nin: “Shu huata huasha ñuca yaya ñuca cushca multara ricuca yapa uctalla manejashcamanda. ¡Ashca problemagunara charicani!”.

¿Imara yachaunchi caimanda? Karina nin: “Pandarishcaunara huacachina mas llaquichin. Ima huras can rurashcara pagana angui”.

Biblia ninmi: “Tucui ñucanchi caran cuti pandanchi” (Santiago 3:​2). Imasna ña ricushcanchi pandarishcaunamanda mana pacasha rimajpi can mansu shungu charishcara ricuchingui, ali ñaupajma catiushcara.

Chi huasha can pandarishcaunamanda yachana angui. Shu malta huarmi Vanesa shutiyuj nin: “Ursarini ñuca pandarishcaunara ali runa tucungaj yanapachu. Cutillara casna tucujpi mas ali rurasha”. Catij problemagunai ¿imara ruranguima?

Camba yaya paihua bicicletara mañachijpi can paquisha. ¿Imara ruranguima?

• Mana imas rimasha, camba yaya mana riparachu munangui.

• Imasna pasashcara cuintasha.

• Ima tucushcara rimasha, shujma culpasha.

Shu examen rurasha mana ali llucshijpi ¿imara ruranguima?

• Rimashami examen shinzhimi aca nisha.

• Rimashami ñuca culpami aca mana estudiashcamanda.

• Rimashami profesor ñucahua cuntra ashcara.

 Iyari cai ishqui tucushcai, can angui 1) camba yaya 2) camba profesor. ¿Imara iyanunga paiguna can pandarishcara rimajpilla? ¿Imara iyanunga can pacajpi?

Cuna iyari pasashca huatai can ima manali rurashcara, huasha catij tapuigunara cutipai.

¿Imai pandarishcangui? Huasha ¿imara rurarcangui?

• Pacana munacani.

• Shujta culpacani.

• Uctalla cuintacani.

Can pandarishcara mana cuintasha, huasha ¿imasnara sintirishcangui?

• ¡Alimi! Tucui ñuca munashca cuinta llucshica.

• Manalichu. Sirtura rimana acani.

¿Imasnara mas ali rurana anmaca?

¿Imara chi pandashcamanda yachashcangui?

¿Imarasha huaquin runaunara shinzhi an paiguna pandarishcamanda rimangaj?

¿Imara runauna canmanda iyanunga tucui huras can pandarishcara pacana munajpi? Shinajpi ¿imara iyanunga can pandarishcara cuintajpi? (Lucas 16:10).