PUNTO 13
¿Bibliaga imara nin religiongunamanda?
1. ¿Tucui religionguna alichu an?
Tucui religiongunai tianmi Yaya Diosta tucui shunguhua casungaj munajcuna. Yaya Diosga paita llaquijcunara ricusha cushiyan, shinallara cuirangahua munanmi. Shinajpis ashca runauna religión shutii uchaunara ranushca (2 Corintios 4:3, 4; 11:13-15). Chiraigu radioibi, televisiombi cutin cutin nin, religionguna satirinushca guerragunai, huañuchinaunai, shinallara, huahuaunaras huajlichinushca ninmi. Caita ricusha ali shungu runauna piñarinushca. Leapai Mateo 24:3-5, 11, 12.
Ali religionga Diospa shuti Jehovara atunyachinmi, randi panda religiongunaga manali yachachisha, llullasha Diospa shutira manali saquichinushca. Shinallara huañushcaunamanda yachachishaga shujcunara pandachinushca. Randi Jehová Dios munanmi tucuiguna paita ali ricsinuchu. Leapai Romanos 6:23; 1 Timoteo 2:3-5.
2. Shamuj punzhaunai ¿religionguna imara tucungaranun?
Supai munashca cuinta causasha, quirij mani nijpis Yaya Dios yachanmi paiguna llulla ashcara (Santiago 4:4). Ñaupa Babilonia llactai panda religionguna callarinuca. Chiraigu Diospa Shimi tucui manali religiongunara ninmi “Atun Babilonia” nisha. Runaunara umachij, llaquichij religiongunara Yaya Dios ñallai tucuchingaraun. Leapai Ricuchina (Apocalipsis) 17:1, 2, 5, 16, 17; 18:8.
Tucurina punzha mana shamujllaira, Jehová Dios tucui religiongunamanda ali shungu runaunara tandachiun. ¿Imasnara tandachiun? Paihua cierto Shimira yachachisha tandachiun. Leapai Juan 6:45.
3. Ali shungura charijcuna ¿imara rurana anun?
Ali religionga caran tunu runapura llaquinusha causanuchu yanapan
Jehová Dios llaquinmi pai mandashcara tucui shunguhua pactachingahua munajta. Chiraigu cutin cutin nin, panda religiongunamanda ucta llucshichi nisha. Yaya Diosta cierto llaquishaga, paiguna causaira turcanunga Yaya Diosta cushiyachingaj. Leapai Ricuchina (Apocalipsis) 18:4.
Jesús huañushca huasha, ali shungura charij runauna apostolguna yachachishcaunara cushilla uyanuca. Jehová Dios chi mansu runaunara yachachica, ali gustu, cushilla causangahua. Shinallara ali causanara chapasha catinuchu Yaya Dios yanapaca. Chi mansu runauna cuinta, ñucanchis Jehová Dios camachishcara cushihua, tucui shunguhua pactachinami anchi. Leapai 1 Tesalonicenses 1:8, 9; 2:13.
Panda religionda saquisha, ali religionda catijcunara Jehová Dios cushilla chasquingami. Panda religionda saquijcuna Diospa amigoguna tucunun. Shinallara, intiru mundui Diosta ali sirvijcunahua aillu cuintami tucunun. Astaumbas huiñai causaira apingaranun ¿Casna ali causanara charingaj munanguichu? Leapai Marcos 10:29, 30; 2 Corintios 6:17, 18.
4. Runauna ali causanuchu Yaya Dios ¿imara rangaraun?
Panda religiongunara Jehová tucuchijpimi intiru mundui cushi causana tiangaraun. Shinallara mana caran muntun religionguna tiangachu. Intiru mundui tucui causajcuna Jehová Diosllara parijulla aduranunga. ¿Manzhu cai ali gustu cuintashcauna ali uyarin? Leapai Ricuchina (Apocalipsis) 18:20, 21; 21:3, 4.
